រហូតមកទល់ពេលនេះ មានពាក្យចចាមអារ៉ាមជាច្រើន ដែលបញ្ជាក់ថា ក្រុមហ៊ុន Samsung កំពុងតែខិតខំយ៉ាងខ្លាំងក្នុងការអភិវឌ្ឍ និងរចនារូបរាងកាន់តែប្លែកសម្រាប់ម៉ូដែល Galaxy S8 ហើយពេលនេះព័ត៌មានថ្មីអំពីលក្ខណៈសម្បត្តិរបស់ទូរស័ព្ទនេះក៏ត្រូវបានទម្លាយទៀតហើយដោយគណនីឈ្មោះថា Evan Blass ។ ថ្មីៗនេះ អ្នករចនារូបរាងស្មាតហ្វូនលោក Benjamin Geskin ក៏បានចែករំលែកនូវរូបភាពថ្មីមួយទៀតដ៏ស្រស់ស្អាតដែលគេគិតថាពិតជារូបភាព Renders របស់ទុរស័ព្ទ Samsung Galaxy S8 ។
លោក Geskin ត្រូវបានគេស្គាល់ច្រើនដោយសារតែលោកតែងតែបង្ហាញនូវរូបភាពរបស់ទូរស័ព្ទស៊េរីថ្មីជាច្រើនដោយពឹងផ្អែកទៅលើការបែកធ្លាយ និងពាក្យចចាម អារ៉ាមជាច្រើនដែលបាននិយាយអំពីទូរស័ព្ទនោះ។ រូបភាព Renders ថ្មីមួយនេះត្រូវបានចែករំលែកបន្តដោយគណនី Evan Blass ដែលបង្ហាញយ៉ាងច្បាស់អំពីប្រព័ន្ធស្កែនក្រយ៉ៅដៃដែលស្ថិតនៅផ្នែកខាងក្រោយនៃទូរស័ព្ទ Samsung Galaxy S8 នេះ។ រូបភាព Render ថ្មីរបស់ទូរស័ព្ទ Galaxy S8 ថ្មីនេះគឺមានស៊ុមព័ទ្ធជុំវិញអេក្រង់តូចមែនទែន។
រូបភាពដែលត្រូវបានទម្លាយដោយគណនី Blass នេះ គឺត្រូវបានគេអះអាងថាជាគំរូរបស់ទូរស័ព្ទ Galaxy S8 ។ នៅផ្នែកខាងក្រោយរបស់ទូរស័ព្ទនេះ បានប្រើប្រាស់នូវប្រព័ន្ធស្កែនក្រយ៉ៅដៃ ហើយវាថែមទាំងប្រើប្រាស់នូវរន្ធផត USB-C ហើយប្រហែលជារក្សាទុកនូវរន្ធដោត 3.5mm Audio Jack ដដែលដែលផ្ទុយពីព័ត៌មានពាក្យចចាមអារ៉ាមជាច្រើនបានលើកឡើងកាលពីពេលមុននេះ។ ចំនែកព័ត៌មានបែកធ្លាយជាច្រើនកាលពីពេលថ្មីៗនេះបានបង្ហាញថា ផ្នែកខាងមុខរបស់ទូរស័ព្ទ Galaxy S8 អាចនឹងមានទំហំអេក្រង់ 2 ផ្សេងគ្នាដែលមិនមានប៊ូតុង Home នោះទេ។ ខាងក្រោមនេះគឺជាលក្ខណៈសម្បត្តិរបស់ទូរស័ព្ទ Galaxy S8 ដែលត្រូវបានបែកធ្លាយ។
ទូរស័ព្ទ Samsung Galaxy S8 នឹងមានអេក្រង់ទំហំ 5.8 អ៊ីង និងអេក្រង់ទំហំ 6.2 អ៊ីងកម្រិតភាពច្បាស់ QHD រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 64GB ភ្ជាប់ជាមួយនឹងរន្ធ microSD ដែលមានទំហំដល់ទៅ 256GB ថាមពលថ្មកម្លាំង 3000mAh និង3500mAh រន្ធផត USB-C រន្ធដោតកាស 3.5 mm Jack កាមេរ៉ាខាងក្រោយទំហំ 12 មេហ្គាភិចសែល កាមេរ៉ាខាងមុខទំហំ 8 មេហ្គាភិចសែលភ្ជាប់ជាមួយនឹង f/1.7 Aperture និងកម្មវិធី Software ថ្មីៗដែលមានដូចជា Samsung DeX, Biby Assistant និង Force Touch ផងដែរ។ ទូរស័ព្ទ Galaxy S8 ត្រូវបានគេដឹងថានឹងប្រកាសបង្ហាញខ្លួននៅថ្ងៃទី 29 ខែមីនាខាងមុខនេះ ហើយវានឹងដាក់លក់នៅថ្ងៃទី 21 ខែមេសា៕
