ស្មាតហ្វូនដែលផលិតឡើងនៅក្នុងប្រទេសចិនតែងតែមានតម្លៃមិនសូវជាថ្លៃប៉ុន្មាននោះទេ ដោយសារតែមានការប្រកួតប្រជែងគ្នាខ្លាំងនៅលើទីផ្សារទាំងការរចនារូបរាង និងរបកគំហើញនៃបច្ចេកវិទ្យាថ្មីៗ។ លោកអ្នកអាចធ្វើការក្រឡេកមើលទៅកាន់ក្រុមហ៊ុនបច្ចេកវិទ្យាធំៗ ដែលត្រូវបានគេចាត់ទុកថាផលិតនូវផលិតផលល្អជាច្រើន។ ក្រុមហ៊ុនបច្ចេកវិទ្យាទាំងនោះ មានដូចជា Xiaomi, Meizu, Lenovo និង Huawei ដែលតែងតែបញ្ចេញនូវស្មាតហ្វូនដែលមានសមត្ថភាពខ្លាំង។ ខាងក្រោមនេះ គឺជាស្មាតហ្វូន Android របស់ប្រទេសចិនដែលមានតម្លៃថ្លៃគួរសមផងដែរ និងជាស្មាតហ្វូនដែលទទួលបានការគាំទ្រខ្លាំងនៅក្នុងប្រទេសចិន។
.jpg)
1.Xiaomi Mi Mix តម្លៃ៖ 800 ដុល្លារ
Xiaomi ជាក្រុមហ៊ុនបច្ចេកវិទ្យាមួយដែលមានការរីកចម្រើនលឿននៅក្នុងប្រទេសចិន ប៉ុន្តែក្រុមហ៊ុននេះមិនបានលក់ស្មាតហ្វូនរបស់ខ្លួននៅក្នុងសហរដ្ឋអាមេរិច ឬទ្វីបអ៊ឺរ៉ុបនោះទេ។ ស្មាតហ្វូនស៊េរីថ្មី Xiaomi Mi Mix មានអេក្រង់ទំហំធំ 6.4 អ៊ីងដែលមានផ្ទៃកញ្ចក់ដល់ទៅ 93% ធំជាងអេក្រង់របស់ iPhone 7 Plus ដែលមានទំហំអេក្រង់ត្រឹមតែ 5.5 អ៊ីងតែប៉ុណ្ណោះ។ ជាមួយនឹងសេរ៉ាមិចស្រោបនៅខាងក្រោយបានធ្វើឱ្យស្មាតហ្វូននេះមានភាពស្រស់ស្អាតទាក់ទាញ និងមិនងាយឆ្កូតនោះទេ។ ខណៈពេលដែលអ្នកប្រើប្រាស់កំពុងតែរង់ចាំមើលនូវស្មាតហ្វូនស៊េរីថ្មីឆ្នាំ 2017 របស់ក្រុមហ៊ុន Apple និងក្រុមហ៊ុន Samsung ដែលល្បីថាមានកញ្ចក់អេក្រង់ពេញតែម្តងនោះ ស្មាតហ្វូន Mi Max នេះបានដាក់លក់ភ្លាមៗចូលទៅក្នុងទីផ្សារជាច្រើនខែផងដែរ។
.jpg)
2.Xiaomi Mi Note 2 តម្លៃ៖ 630 ដុល្លារ
ប្រសិនបើលោកអ្នកកំពុងតែស្វែងរកនូវស្មាតហ្វូនដែលមានលក្ខណៈទាន់សម័យ ស្រស់ស្អាត និងដំណើរការលឿននោះលោកអ្នកគួរតែជ្រើសរើសនូវស្មាតហ្វូន Xiaomi Mi Note 2 ។ វាមានរូបរាងស្រដៀងគ្នាទៅនឹងហ្វាប់ប្លេត Galaxy Note 7 ដែរដែលមានអេក្រង់គែមកោងយ៉ាងទាក់ទាញ ប៉ុន្តែវាមិនផ្ទុះនោះទេ។ ស្មាតហ្វូននេះអាចរកទិញបានតែនៅក្នុងតំបន់អាស៊ីតែប៉ុណ្ណោះ។
3.Honor Magic តម្លៃ៖ 710 ដុល្លារ
Xiaomi មិនមែនជាក្រុមហ៊ុនផលិតស្មាតហ្វូនដែលតែងតែបញ្ចេញនូវផលិតផលប្លែកៗអស្ចារ្យនោះទេ ក្រុមហ៊ុន Huawei ក៏ជាក្រុមហ៊ុនល្បីឈ្មោះនៅចិនធំជាងគេផងដែរ។ ថ្មីៗនេះ ក្រុមហ៊ុនមួយនេះបានបញ្ចេញនូវស្មាតហ្វូន Honor Magic ដែលមានអេក្រង់គែមកោង ស៊ុមព័ទ្ធកញ្ចក់អេក្រង់កាន់តែតូច និងមានភាពស្រស់ស្អាតជាទីបំផុត។ ស្មាតហ្វូននេះមានភាពទាក់ទាញខ្លាំងជាមួយនឹងរូបរាងរបស់វា ហើយជាពិសេសប្រព័ន្ធដំណើរការ និងប្រព័ន្ធកាមេរ៉ារបស់វាពិតជាខ្លាំងមែនទែន។
4.Huawei Mate 9 តម្លៃ៖ 600 ដុល្លារ
Huawei Mate 9 ត្រូវបានគេចាត់ទុកថាជាស្មាតហ្វូនដែលពោរពេញទៅដោយសមត្ថភាព និងមានរូបរាងស្រស់ស្អាតទាក់ទាញជាទីបំផុតរបស់ក្រុមហ៊ុន Huawei ។ ស្មាតហ្វូននេះមានតម្លៃ 600 ដុល្លារដែលមានតម្លៃថោកជាងស្មាតហ្វូន iPhone និង Pixel ។ ស្មាតហ្វូននេះស្រោបដោយលោហធាតុ និងមានការប្រើប្រាស់នូវប្រព័ន្ធកាមេរ៉ាភ្លោះផងដែរ។ ស្មាតហ្វូននេះមានសមត្ថភាពដំណើរការបានលឿនជាមួយនឹងកញ្ចក់អេក្រង់ភ្លឺច្បាស់ និងមានម៉េមូរីធំដែលអាចផ្ទុកទិន្នន័យបានច្រើនថែមទៀតផង។
5.OnePlus 3T តម្លៃ៖ 440 ដុល្លារ
OnePlus 3T គឺជាស្មាតហ្វូនដំបូងរបស់ក្រុមហ៊ុន OnePlus ដែលផ្តល់នូវបទពិសោធន៍កាន់តែអស្ចារ្យក្នុងការប្រើប្រាស់ និងជារបកគំហើញថ្មីដែលមានការរចនារូបរាងកាន់តែអស្ចារ្យមិនធ្លាប់មាន។ ស្មាតហ្វូននេះមានតម្លៃ 440 ដុល្លារ ហើយសមត្ថភាពរបស់វាមិនចាញ់ស្មាតហ្វូនដែលមានតម្លៃ 800 ដុល្លារនោះទេ។ ស្មាតហ្វូននេះប្រើប្រាស់នូវបន្ទះឈីប Snapdragon 821 រ៉េមផ្ទុកទិន្នន័យបណ្តោះអាសន្នទំហំ 6GB ហើយស្មាតហ្វូន OnePlus 3T នេះមានល្បឿនលឿន និងមានការពង្រឹងទៅលើប្រព័ន្ធកាមេរ៉ាថែមទៀតផង។ វាពិតជាស្មាតហ្វូនដ៏ល្អមួយសម្រាប់លោកអ្នក។
6.Huawei P9 តម្លៃ៖ 450 ដុល្លារ
ក្រុមហ៊ុន Huawei មានកំណើនកើនឡើងខ្លាំងបើធៀបជាមួយនឹងឆ្នាំមុន ហើយក្រុមហ៊ុនបច្ចេកវិទ្យានេះបានក្លាយជាក្រុមហ៊ុនដែលឈរនៅចំណាត់ថ្នាក់លេខ 3 បន្ទាប់ពីក្រុមហ៊ុន Samsung និង Apple ។ ស្មាតហ្វូន P9 នេះទទួលបានភាពល្បីល្បាញតាំងពីឆ្នាំ 2016 ដោយសារតែលក្ខណៈសម្បត្តិ និងប្រព័ន្ធកាមេរ៉ាភ្លោះរបស់វា។ វាមានការរចនារូបរាងកាន់ស្រោបដោយលោហធាតុកាន់តែស្រស់ស្អាត និងប្រើប្រាស់នូវប្រព័ន្ធប្រតិបត្តិការ Android ចុងក្រោយគេដែលផ្តល់នូវលក្ខណៈទំនើបសម្រាប់អ្នកប្រើប្រាស់។ បន្ថែមពីនេះទៀត ស្មាតហ្វូននេះដំណើរការលឿន ហើយថែមទាំងពង្រឹងទៅលើកាមេរ៉ា Wide-Aperture f/1.1 ដែលអាចចាប់យករូបភាពបានច្បាស់ល្អ។ ស្មាតហ្វូននេះមានតម្លៃសមរម្យជាងក្រុមហ៊ុន Samsung និងក្រុមហ៊ុន Apple ។
7.Honor 8 តម្លៃ៖ 400 ដុល្លារ
Honor 8 មានអេក្រង់ទំហំ 5.2 អ៊ីងហើយត្រូវបានគេចាត់ទុកថាជាស្មាតហ្វូនដែលមានការរចនារូបរាងស្រស់ស្អាតស្រោបដោយកញ្ចក់ និងលោហធាតុជាមួយគ្នារួមទាំងកាមេរ៉ាភ្លោះនៅពីក្រោយទំហំ 12 មេហ្គាភិចសែល។ ស្មាតហ្វូននេះមានថាមពលថ្មខ្លាំងរហូតដល់ទៅ 3000mAh ហើយវាអាចប្រើប្រាស់បានរយៈពេលដល់ទៅ 9 ម៉ោងដែលលោកអ្នកអាចធ្វើកិច្ចការងារជាច្រើនជាមួយនឹងស្មាតហ្វូនស៊េរីទំនើបមួយនេះ។ មិនតែប៉ុណ្ណោះ វាប្រើប្រាស់នូវ Skin ថ្មីស្រស់ស្អាតនៅពីលើប្រព័ន្ធប្រតិបត្តិការ Android ដែលផ្តល់នូវបទពិសោធន៍កាន់តែប្លែកមួយទៀតសម្រាប់លោកអ្នក។ វាមានមុខងារថ្មីៗដែលអាចចូលទៅដំណើរការកម្មវិធីបានលឿន និងរហ័សទាន់ចិត្តជានិច្ច។
8.ZTE Axon 7 | 7 Mini តម្លៃ៖ 400 ដុល្លារ | 300 ដុល្លារ
ក្រុមហ៊ុន ZTE បានធ្វើការដាក់បង្ហាញនូវស្មាតហ្វូន 2 ស៊េរីម៉ូដែលចូលទៅក្នុងទីផ្សាររបស់សហរដ្ឋអាមេរិចនោះគឺ ZTE Axon 7 ដែលមានអេក្រង់ទំហំ 5.5 អ៊ីង និង Axon 7 Mini ដែលមានទំហំអេក្រង់ 5.2 អ៊ីង។ លោកអ្នកអាចរកទិញស្មាតហ្វូននេះបាននៅក្នុងតម្លៃ 400 ដុល្លារសម្រាប់ Axon 7 ។ ស្មាតហ្វូននេះប្រើប្រាស់នូវបន្ទះឈីប Snapdragon 820 រ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំត្រឹមតែ 64GB ហើយសម្រាប់តម្លៃរបស់ Axon 7 Mini គឺត្រឹមតែ 300 ដុល្លារតែប៉ុណ្ណោះ។ អ្វីដែលគួរឱ្យចាប់អារម្មណ៍សម្រាប់ស្មាតហ្វូនត្រកូល Axon នេះគឺការប្រើប្រាស់នូវប្រព័ន្ធបំពងសំឡេង Speakers ភ្លោះដែលលឺពិរោះរណ្តំចិត្ត និងច្បាស់ល្អជានិច្ច។
9.LeEco Le Pro 3 តម្លៃ៖ 400 ដុល្លារ
LeEco គឺជាស្មាតហ្វូនស៊េរីថ្មីដែលមានការពង្រឹងទៅលើ Hardware ដោយខ្លួនឯង និងបានប្រឡូកចូលទៅក្នុងទីផ្សារស្មាតហ្វូនទើបតែបានប៉ុន្មានឆ្នាំប៉ុណ្ណោះ។ ស្មាតហ្វូន Le Pro 3 បានក្លាយជាស្មាតហ្វូនដំបូងបំផុតដែលបានដាក់លក់នៅក្នុងសហរដ្ឋអាមេរិច ហើយនេះបង្ហាញពីជំហានដ៏ធំមួយរបស់ក្រុមហ៊ុនបច្ចេកវិទ្យាមួយនេះ។ តើមានមានលក្ខណៈពិសេសអ្វីខ្លះសម្រាប់ Le Pro 3 នេះ? ស្មាតហ្វូននេះមានតម្លៃ 400 ដុល្លាររូបរាងស្រស់ស្អាត ទាក់ទាញនឹងប្រើប្រាស់នូវបន្ទះឈីប Snapdragon 821 រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 64GB និងប្រើប្រាស់នូវរន្ធផត USB-C ។
10.Xiaomi Mi 5s | Mi 5s Plus តម្លៃ៖ 400 ដុល្លារ
Xiaomi ជាក្រុមហ៊ុនបច្ចេកវិទ្យាដែលតែងតែនិយាយអំពីបច្ចេកវិទ្យាថ្មីបានបង្ហាញនូវស្មាតហ្វូនស៊េរីថ្មី Mi 5s និង Mi 5s Plus ដែលមានរូបរាងស្រស់ស្អាត និងតម្លៃសមរម្យផងដែរ។ ស្មាតហ្វូននេះទ្រទ្រង់នូវការប្រើប្រាស់ 4G LTE Band និងមានលក្ខណៈសម្បត្តិគួរឱ្យចាប់អារម្មណ៍ជាច្រើនទៀតផងដែរ។ ប្រសិនបើលោកអ្នកចាប់អារម្មណ៍ទៅលើស្មាតហ្វូនរបស់ក្រុមហ៊ុន Xiaomi លោកអ្នកគួរតែជ្រើសរើសនូវស្មាតហ្វូនស៊េរីថ្មីនេះសម្រាប់ការប្រើប្រាស់នៅក្នុងកិច្ចការងារប្រចាំថ្ងៃរបស់លោកអ្នក។
11.Meizu M3X តម្លៃ៖ 330 ដុល្លារ
ជាមួយនឹងការរចនារូបរាងស្រោបដោយកញ្ចក់នៅផ្នែកខាងក្រោយ ស្មាតហ្វូន Meizu M3X បានក្លាយជាស្មាតហ្វូនមួយដែលមានរូបរាងស្រស់ស្អាត និងទាក់ទាញចិត្តមែនទែន។ ស្មាតហ្វូននេះប្រើប្រាស់នូវ Flyme OS រួមជាមួយនឹងម៉េមូរីក្នុងម៉ាស៊ីនទំហំធំដល់ទៅ 64GB និងបន្ទះឈីប Helio P20 របស់ក្រុមហ៊ុន MediaTek ដែលពង្រឹងទៅដល់សមត្ថភាពនៃការដំណើរការបានយ៉ាងល្អឥតខ្ចោះ។
12.Xiaomi Redi Note 4 តម្លៃ៖ 200 ដុល្លារ
Redmi Note 4 ជាស្មាតហ្វូនដែលមានតម្លៃសមរម្យដែលត្រូវបានផលិតឡើងដោយក្រុមហ៊ុន Xiaomi សម្រាប់សហរដ្ឋអាមេរិច និងនៅក្នុងទ្វីបអ៊ឺរ៉ុប។ ស្មាតហ្វូននេះស្រោបដោយលោហធាតុ និងប្រើប្រាស់នូវប្រព័ន្ធស្កែនក្រយ៉ៅដៃដែលអាចដំណើរការបានលឿន រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 64GB ហើយតម្លៃរបស់វាវិញគឺត្រឹមតែ 200 ដុល្លារតែប៉ុណ្ណោះ។
13.Honor 6X តម្លៃ៖ 250 ដុល្លារ
ស្មាតហ្វូនស៊េរីថ្មីដែលត្រូវបានបង្កើតឡើងដោយក្រុមហ៊ុន Honor ដែលមានភាពទាក់ទាញនោះគឺម៉ូដែល Honor 6X ។ ស្មាតហ្វូននេះមានរូបរាងស្រស់ស្អាត ហើយបើនិយាយអំពីផ្នែក Hardware របស់វាក៏អស្ចារ្យសមល្មមក្នុងការប្រើប្រាស់ផងដែរ។ លោកអ្នកនឹងពេញចិត្តជាមួយនឹងមុខងារពិសេសៗជាច្រើនដែលបានបំពាក់នូវលើស្មាតហ្វូនស៊េរីទំនើបមួយគ្រឿងនេះ។
14.LeEco Le S3 តម្លៃ៖ 250 ដុល្លារ
ស្មាតហ្វូនស៊េរីថ្មី LeEco Le S3 ដែលមានតម្លៃត្រឹមតែ 250 ដុល្លារអាមេរិចបានដាក់លក់ហើយនៅលើទឹកដីរបស់សហរដ្ឋអាមេរិច ហើយលោកអ្នកពិតជាពេញចិត្តជាមួយនឹងការរចនារូបរាងដ៏ស្រស់ស្អាតរបស់ស្មាតហ្វូនស៊េរីថ្មីនេះ។ វាមានរូបរាងស្រស់ស្អាតនិងតម្លៃសមរម្យថែមទៀតផង។ Le S3 មានអេក្រង់ទំហំ 5.5 អ៊ីងជាមួយនឹងកម្រិតភាពច្បាស់ Full HD បន្ទះឈីប Snapdragon 652 រ៉េមផ្ទុកទិន្នន័យបណ្តោះអាសន្នទំហំ 3GB កាមេរ៉ាខាងក្រោយទំហំ 16 មេហ្គាភិចសែលដែលអាចទ្រទ្រង់នូវវីដេអូកម្រិត 4K បានថែមទៀត។
15.Meizu M5 Note តម្លៃ៖ 200 ដុល្លារ
Meizu M5 Note ជាស្មាតហ្វូនដែលមានតម្លៃសមរម្យជាមួយនឹងអេក្រង់ទំហំ 5.5 អ៊ីងដែលប្រើប្រាស់នូវ Flyme OS ការរចនារូរាងទាក់ទាញ ស្រស់ស្អាត និងការប្រើប្រាស់នូវ mBack Key សម្រាប់ការវិលត្រឡប់ទៅ Menus វិញបានផងដែរ។ ស្មាតហ្វូននេះមានការពង្រឹងទៅលើប្រព័ន្ធកាមេរ៉ា និងថាមពលថ្មដែលកាន់តែផ្តល់នូវភាពសន្សំសំចៃក្នុងការប្រើប្រាស់ថែមទៀតផង។
16.Xiaomi Redmi 4 តម្លៃ៖ 130 ដុល្លារ
Redmi 4 គឺជាស្មាតហ្វូនដែលមានតម្លៃថោកជាងគេដែលលោកអ្នកអាចស្វែងរកទិញបាននៅក្នុងតម្លៃលក់ត្រឹមតែ 130 ដុល្លារប៉ុណ្ណោះ។ ស្មាតហ្វូននេះប្រើប្រាស់នូវថាមពលថ្មកម្លាំងដល់ទៅ 4100mAh និងមានការពង្រឹងទៅលើប្រព័ន្ធកាមេរ៉ាផងដែរ។ ស្មាតហ្វូននេះមានអេក្រង់ទំហំ 5 អ៊ីងភ្ជាប់ជាមួយនឹងប្រព័ន្ធស្កែនក្រយ៉ៅដៃ និងដំណើរការនូវ MIUI ដែលផ្តល់នូវបទពិសោធន៍មួយកាន់តែប្លែកសម្រាប់អ្នកប្រើប្រាស់ថែមទៀតផង៕
