បើពិនិត្យមើលត្រឡប់ទៅកាន់ខែកុម្ភៈឆ្នាំមុននេះ លោក Terry Gou ដែលជានាយកប្រតិបត្តិរបស់ក្រុមហ៊ុន Foxconn បានបង្ហាញថា អាជីវកម្មស្មាតហ្វូនរបស់ក្រុមហ៊ុន Sharp មានទឹកប្រាក់សរុប 3.8 ពាន់លានដុល្លារអាមេរិច។ ក្រុមហ៊ុនបច្ចេកវិទ្យា Sharp បានផ្តល់ជូននូវបច្ចេកវិទ្យាអេក្រង់ជាច្រើនប្រភេទអេក្រង់ IGZO Display ហើយក្រុមហ៊ុននេះក៏ឈានជើងចូលទៅក្នុងការផលិតនូវបន្ទះអេក្រង់ប្រភេទ OLED Display ។ ខណៈពេលដែលចំនួននៃការផលិតនូវបន្ទះអេក្រង់ OLED នៅមិនទាន់ដឹងថាមានចំនួនប៉ុណ្ណាសម្រាប់ក្រុមហ៊ុន Apple នោះទេ ប៉ុន្តែក្រុមហ៊ុន Sharp បានឈានជើងមួយជំហានទៀតក្នុងការផលិតនូវអេក្រង់បច្ចេកវិទ្យាថ្មី ហើយក្រុមហ៊ុន Foxconn មានគោលដៅក្នុងការសាងសង់វាឱ្យសម្រេចឡើង។ ពេលនេះ វាមានពាក្យចចាមអារ៉ាមជាច្រើនបញ្ជាក់ថា រោងចក្រនេះនឹងធ្វើការសាងសង់នៅក្នុងសហរដ្ឋអាមេរិច នេះបើយោងតាម Nikkei ដែលដកស្រង់សម្តីរបស់លោក Terry Gou ថ្លែងនៅក្នុងសន្និសីទមួយនៅក្នុងតៃវ៉ាន់កាលពីម្សិលមិញនេះ។
រោងចក្រផលិតអេក្រង់ត្រូវបានគេរំពឹងថា នឹងចំណាយទឹកប្រាក់ប្រមាណជា 7 ពាន់លានដុល្លារអាមេរិច ហើយវាអាចបង្កើតនូវការងារចន្លោះពី 30,000 ទៅ 50,000 ការងារនៅក្នុងសហរដ្ឋអាមេរិច។ ចំនែករោងចក្រមួយផ្សេងទៀតប្រហែលជាសាងសង់នៅក្នុងរដ្ឋ Pennsylvania ។ ត្រឡប់ទៅកាន់ខែធ្នូវិញ លោក Masayoshi Son ដែលជាប្រធានក្រុមហ៊ុន SoftBank របស់ប្រទេសជប៉ុនដែលគ្រប់គ្រងក្រុមហ៊ុន Sprint នឹងជាដៃគូអាជីវកម្មរបស់ក្រុមហ៊ុន Foxconn បានទំនាក់ទំនងជាមួយនឹងលោក Terry Gou មុនពេលដែលលោកទៅជួបជាមួយនឹងលោកប្រធានាធិបតី Donald Trump ហើយថែមទាំងសន្យាក្នុងការវិនិយោគទឹកប្រាក់ 50 ពាន់លានដុល្លារនៅក្នុងសហរដ្ឋអាមេរិចថែមទៀតផង។
លោក Tim Cook ដែលជានាយកប្រតិបត្តិរបស់ក្រុមហ៊ុន Apple និងនាយកប្រតិបត្តិជាន់ខ្ពស់ជាច្រើននាក់ទៀត ក៏បានជួបជាមួយនឹងលោកប្រធានាធិបតី Trump មុនពេលដែលប្រធានាធិបតីរូបនេះ ស្បថចូលកាន់ដំណែងនៅក្នុងការិយាល័យ ហើយវា គឺជាផ្នែកមួយនៃការសន្យារបស់គាត់ “Buy American, Hire American” ក្នុងការកោះហៅរោងចក្រផលិតជាច្រើនត្រលប់មកកាន់សហរដ្ឋអាមេរិចវិញ ហើយថែមទាំងលុបបំបាត់ពន្ធ និងការលើកទឹកចិត្តផ្សេងទៀត។ ក្រុមហ៊ុន Apple ត្រូវបានគេដឹងថានឹងដាក់បង្ហាញនូវទូរស័ព្ទ iPhone 8 អេក្រង់ OLED នៅក្នុងឆ្នាំនេះ ហើយតម្រូវការនៃការផលិតបន្ទះអេក្រង់នេះ គឺផ្គត់ផ្គង់មកពីក្រុមហ៊ុន Samsung ប៉ុន្តែក្រុមហ៊ុន Apple ក៏កំពុងតែបង្កើតនូវរោងចក្រសម្រាប់ផ្គត់ផ្គង់នូវបន្ទះអេក្រង់សម្រាប់ក្រុមហ៊ុនខ្លួនផងដែរ៕
