សម្រាប់ឆ្នាំ 2017 នេះក្រុមហ៊ុន Huawei បានចាប់ផ្តើមឈានជើងចូលទៅក្នុងទឹកដីសហរដ្ឋអាមេរិចដោយនាំយកនូវទូរស័ព្ទ Huawei Mate 9 ដែលជាទូរស័ព្ទទំនើបទាន់សម័យដ៏ល្អបំផុតសម្រាប់ប្រកួតប្រជែងជាមួយនឹងក្រុមហ៊ុនបច្ចេកវិទ្យាជាច្រើនទៀតនៅក្នុងសហរដ្ឋអាមេរិច។ យ៉ាងណាមិញ បើទោះបីជាទើបតែបញ្ចេញនូវទូរស័ព្ទ Huawei Mate 9 ក្តី ពេលនេះ ក្រុមហ៊ុន Huawei ក៏ត្រៀមខ្លួននៅក្នុងការប្រកាសបង្ហាញនូវទូរស័ព្ទស៊េរីថ្មីមួយទៀតផងដែរ គឺ Huawei P10 ។ យើងធ្លាប់បានឃើញនូវពាក្យចចាមអារ៉ាមជាច្រើនរួមទាំងការបែកធ្លាយជាច្រើនផងដែរអំពីទូរស័ព្ទ Huawei P10 ដែលមើលទៅពិតជាស្រស់ស្អាតទាក់ទាញបំផុត។ Huawei P9 គឺជាទូរស័ព្ទរបស់ក្រុមហ៊ុន Huawei ដំបូងបំផុត ដែលប្រើប្រាស់នូវមុខងារប្រព័ន្ធកាមេរ៉ាភ្លោះ Dual-Camera ដែលជាការសហការជាមួយនឹងក្រុមហ៊ុន Leica ហើយយើងសង្ឃឹមថា ទូរស័ព្ទ Huawei P10 ក៏នឹងធ្វើការពង្រឹងទៅលើប្រព័ន្ធកាមេរ៉ាផងដែរ។
ការពង្រឹងទៅលើប្រព័ន្ធកាមេរ៉ា គឺជារឿងសំខាន់ ហើយរឿងសំខាន់មួយទៀតនោះ គឺពាក់ព័ន្ធជាមួយនឹងតម្លៃ។ គណនី @Ricciollo1 របស់បណ្តាញសង្គម Twitter បានប្រកាសថា ទូរស័ព្ទ Huawei P10 នឹងមានតម្លៃថ្លៃជាងគេបំផុតនៅក្នុងទូរស័ព្ទត្រកូលស៊េរី P ។ នៅក្នុងសារនេះ គឺមិនបានបញ្ជាក់អំពីតម្លៃពិតប្រាកដរបស់ទូរស័ព្ទ P10 នេះនៅឡើយទេ ប៉ុន្តែយើងអាចប៉ាន់ស្មាននូវតម្លៃតាមទូរស័ព្ទត្រកូលស៊េរី P បានផងដែរ។ សម្រាប់ទូរស័ព្ទ Huawei P9 ប្រើប្រាស់នូវម៉េមូរីទំហំ 32GB ហើយវាមានតម្លៃប្រហែលជា 644 ដុល្លារអាមេរិច ចំនែកទូរស័ព្ទ Huawei P9 Plus មានតម្លៃប្រហែលជា 805 ដុល្លារអាមេរិច។ គណនី @Ricciolo1 ក៏បានបញ្ជាក់នៅលើបណ្តាញសង្គម Twitter ថា ទូរស័ព្ទ P10 នឹងមិនមានតម្លៃថ្លៃដូច Huawei Mate 9 Porsche Design ដែលដាក់លក់នៅក្នុងតម្លៃខ្ពស់ដល់ទៅប្រហែលជា 1498 ដុល្លារអាមេរិច។
តើវាអាចមានន័យថាទូរស័ព្ទ Huawei P10 ឬទូរស័ព្ទ P10 Plus មានតម្លៃខ្ពស់ជាង 805 ដុល្លារអាមេរិច? សម្រាប់តម្លៃរបស់វាយើងនៅមិនទាន់អាចនិយាយបាននោះទេ ប៉ុន្តែឆាប់ៗនេះក្រុមហ៊ុន Huawei ពិតជាប្រកាសអំពីព័ត៌មានបន្ថែមរបស់ទូរស័ព្ទនេះជាក់ជាមិនខាន។ ទោះបីជាទូរស័ព្ទ Huawei P10 មានតម្លៃខ្ពស់យ៉ាងណាក៏ដោយ លក្ខណៈសម្បត្តិរបស់វាក៏គួរឱ្យចាប់អារម្មណ៍ផងដែរ។ ទូរស័ព្ទនេះត្រូវបានគេជឿជាក់ថា នឹងពង្រឹងទៅលើប្រព័ន្ធកាមេរ៉ា ហើយវាថែមទាំងមានអេក្រង់គែមកោងទំហំ 5.5 អ៊ីងជាមួយនឹងកម្រិតភាពច្បាស់ 2560x1440 ប្រព័ន្ធស្កែនក្រយ៉ៅដៃ និង Hardware ប្រហែលទៅនឹងទូរស័ព្ទ P9 ដែរ៕