ព័ត៌មានចុងក្រោយបានឲ្យដឹងថា ក្រុមហ៊ុន Samsung នឹងប្រកាសចេញកំពូលស្មាតហ្វូនបងប្អូន Galaxy S8 នៅថ្ងៃទី 29 កុម្ភះ 2017 នេះ ដែលព័ត៌មានកន្លងមកថានឹងប្រកាសនៅខែមេសា។ ការទន្ធឹងរងចាំសម្រាប់អ្នកប្រើប្រាស់ដែលនិយមប្រើត្រកូល Galaxy S កំពុងតែអន្ទះសារខ្លាំងឡើងៗពីមួយថ្ងៃទៅមួយថ្ងៃខណះដែលព័ត៌មានជាច្រើនបានកំពុងតែនិយាយពីពួកវាច្រើនឡើងៗមិនដាច់។ ហើយឥលូវនេះយើងក៏ទទួលបានព័ត៌មានចុងក្រោយមួយទៀតពីគណនីធ្វិស្ទ័រដែលមានឈ្មោះថា @Onleaks និង @GearIndia ដែលបានបង្ហាញចេញវីដេអូបែប render ដំបូងពីលក្ខណះសម្បត្តិរូបរាងខាងក្រៅនៃកំពូលស្មាតហ្វូនបងប្អូន Galaxy S8។
រូបក្នុងវីដេអូនេះបានបង្ហាញយ៉ាងច្បាស់ថា Samsung Galaxy S8 នៅតែរក្សាការរចនាបែប glass-aluminum design ដូចជំនាន់ S7 ដដែល (មានតួរខ្លួនផលិតពីលោហះនិងស្រោបពីលើដោយកញ្ចក់)។ កន្លងមកមានព័ត៌មានបាននិយាយថា Galaxy S8 នឹងបំពាក់នូវកញ្ចក់អេក្រង់ទំហំ 5.7 អ៊ីញ ខណះដែល Galaxy S8 Plus នឹងបំពាក់កញ្ចក់អក្រង់ទំហំធំរហូតដល់ទៅ 6.2 អ៊ីញប្រភេទ Super AMOLED ដូចគ្នា។ ក្នុងវីដេអូយើងឃើញថាកញ្ចក់អេក្រង់របស់ជំនាន់ Galaxy S8 នេះមើលទៅមានផ្ទៃបង្ហាញស្ទើរពេលតែម្តងគឺគ្មានគែមអេក្រង់ឆ្វេងស្តាំដូចជំនាន់មុនទៀងទេ ហើយគែមលើក្រោមវិញក៏កាន់តែរួមតូចជាងជំនាន់មុនទៀតផងខណះដែលប៊ូតុងហូមស្គ្រីនខាងក្រោមអេក្រង់ត្រូវបានលុបបំបាត់ចោល និងទ្រនាប់សម្រាប់ស្កែនម្រាមដៃក៏ត្រូវប្តូរមកខាងក្រោយអែបកាមេរ៉ាវិញ។
ដោយឡែកសម្រាប់ប៊ូតុងសម្រាប់កំនត់សំឡេង, ប៊ូតុងបិទបើក-ចាក់សោរអេក្រង់ និងរន្ធដាក់ស៊ីមកាតគឺស្ថិតនៅទីតាំងដូចជំនាន់មុនៗដដែល។ នៅផ្នែខាងក្រោមយើងឃើញមានរន្ធបំពងសំឡេង រន្ធម៉ិចស្រូបសំឡេង រន្ធដោត USB-C និងរន្ធដោតកាសខ្នាត 3.5មម។ ព័ត៌មានផ្សេងៗទៀងបានបន្ថែមថា កំពូលស្មាតហ្វូនបងប្អូន Samsung Galaxy S8 នឹងបំពាក់មកជាមួយបច្ចេកវិទ្យាដោះសោរទូរស័ព្ទដោយប្រើប្រស្រីភ្នែក (iris scanner) ដែលក្រុមហ៊ុនបានប្រើនៅលើជំនាន់ Galaxy Note 7 កាលពីឆ្នាំទៅ និងបច្ចេកវិទ្យាជំនួយការសំឡេងថ្មី Bixby AI ថែមទៀតផង៕
