ក្រុមហ៊ុន Apple នៅមិនទាន់បានបញ្ជាក់អំពីចំនួនជាក់លាក់នៃការលក់នាឡិកាស្មាតវ៉ច Apple Watch នៅឡើយទេនៅក្នុងរបាយការណ៍ប្រាក់ចំណូលនៃត្រីមាសរបស់ខ្លួន។ នៅថ្ងៃនេះ ក្រុមហ៊ុនស្រាវជ្រាវមួយឈ្មោះថា Canalys បានចេញផ្សាយនូវរបាយការណ៍មួយដែលរៀបរាប់យ៉ាងលម្អិតអំពីការប៉ាន់ស្មានទៅលើចំនួននៃនាឡិកាឆ្លាតវៃ Apple Watch ដែលបានចែកចាយនៅក្នុងទីផ្សារពិភពលោកនោះ។ ក្រុមហ៊ុនមួយនេះបានប៉ាន់ស្មានថា ការនាំចេញរបស់នាឡិកាឆ្លាតវៃ Apple Watch មានចំនួនរហូតដល់ទៅ 6 លានគ្រឿងដែលក្រុមហ៊ុន Apple អាចរកប្រាក់ចំណេញបានដល់ទៅ 2.6 ពាន់លានដុល្លារអាមេរិចនៅក្នុងត្រីមាសទី 4 នៅក្នុងឆ្នាំ 2016 នេះ។ ការនាំចេញរបស់នាឡិកាឆ្លាតវៃ Apple Watch នៅក្នុងត្រីមាសទី 4 ឆ្នាំ 2016 នេះបង្ហាញពីការកើនឡើងដល់ទៅ 12% បើធៀបជាមួយនឹងត្រីមាសទី 4 ឆ្នាំ 2015 ។
ក្រុមហ៊ុន Canalys បានបញ្ជាក់នៅក្នុងការប្រកាសរបស់ខ្លួនថា “វាគឺជាត្រីមាសដ៏ល្អបំផុតរបស់ក្រុមហ៊ុនបច្ចេកវិទ្យាយក្ស Apple ។ នាឡិកាឆ្លាតវៃ Apple Watch បានរកប្រាក់ចំណូលឱ្យក្រុមហ៊ុន Apple ដល់ទៅ 2.6 ពាន់លានដុល្លារនៅក្នុងត្រីមាសទី 4 ឆ្នាំ 2016 ដែលមានចំនួនជិតដល់ 80% នៃប្រាក់ចំណេញរបស់ស្មាតវ៉ចទាំងអស់។
ក្រុមហ៊ុន Canalys បានលើកឡើងទៀតថា នាឡិកា Apple Watch Series 1 បានផ្តល់នូវលក្ខណៈកាន់តែពិសេសអស្ចារ្យសម្រាប់នាឡិកាស្មាតវ៉ច Series 2 ដែលធ្វើឱ្យចំនួននៃការលក់មានការកើនឡើងខ្លាំងនៅក្នុងឆ្នាំ 2016 នេះ។ ពេញមួយឆ្នាំ 2016 នាឡិកា Apple Watch ទទួលបានចំណែកទីផ្សាររហូតដល់ទៅ 49% នៃចំនែកទីផ្សារស្មាតវ៉ចទាំងអស់ដែលបានលក់ចេញបានចំនួន 11.9 លានគ្រឿង នេះបើតាមការលើកឡើងរបស់ AppleInsider។ សម្រាប់ក្រុមហ៊ុនផលិតស្មាតវ៉ចជាច្រើនទៀតដូចជា ក្រុមហ៊ុន Fitbit មានចំណែកទីផ្សារសរុបដល់ទៅ 17% ខណៈពេលដែលក្រុមហ៊ុន Samsung មានចំណែកទីផ្សារដល់ទៅ 15% ។ ជាមួយគ្នានេះផងដែរ សម្រាប់ម៉ាកយីហោជាច្រើនទៀតមានចំណែកទីផ្សារដល់ទៅ 19% ។
ក្រុមហ៊ុនស្រាវជ្រាវ Canalys ក៏បានបង្ហាញថា ក្រុមហ៊ុន Xiaomi ក៏មានកំណត់ត្រានៃការលក់នាឡិកាឆ្លាតវៃ Mi Band របស់ខ្លួនផងដែរ។ តាមការសិក្សាបានបង្ហាញថា ក្រុមហ៊ុន Xiaomi បាននាំចេញនូវនាឡិកាស្មាតវ៉ច Mi Band បានចំនួនដល់ទៅ 5.5 លានគ្រឿងទៅកាន់ទីផ្សារសំខាន់ៗរបស់ខ្លួនដូចជាប្រទេសឥណ្ឌា ប្រទេសប៉ូឡូញ និងប្រទេសរុស្សី។ សម្រាប់ត្រីមាសបន្ទាប់ ក្រុមហ៊ុន Canalys នៅតែជឿជាក់ថា នាឡិកាឆ្លាតវៃ Apple Watch នៅតែនាំមុខគេនៅក្នុងចំណែកទីផ្សារដដែល។ ក្រុមហ៊ុន Samsung ក៏នឹងពង្រឹងនូវការនាំចេញនាឡិកា Gear S3 Classic និង Frontier របស់ខ្លួនផងដែរខណៈពេលដែល Android Wear 2.0 នឹងធ្វើការដាក់ឱ្យប្រើប្រាស់នៅលើនាឡិកាឆ្លាតវៃស៊េរីថ្មីចំនួន 2 គ្រឿងរបស់ក្រុមហ៊ុន LG នៅក្នុងខែនេះ៕
