នៅទីបំផុត ក្រុមហ៊ុន Nokia ប្រហែលជាអាចឈរជើងនៅលើទីផ្សារឡើងវិញបន្ទាប់ពីដកខ្លួនចេញក្នុងការប្រកួតប្រជែងស្មាតហ្វូនអស់រយៈពេលជាង 2 ឆ្នាំកន្លងមកនេះ។ ក្រុមហ៊ុន Nokia ក្នុងភាពជាម្ចាស់របស់ក្រុមហ៊ុន HMD Global ហាក់ដូចជាមានគោលដៅច្បាស់លាស់ឡើងវិញក្នុងការប្រកួតប្រជែងនៅក្នុងទីផ្សារ ដោយក្រុមហ៊ុនបានចាប់ផ្តើមនូវការផលិតស្មាតហ្វូនចាប់ពីថ្នាក់ទាប ថ្នាក់កណ្តាល និងលំដាប់ប្រណិតដើម្បីប្រកួតប្រជែងជាមួយនឹងក្រុមហ៊ុន Apple និងក្រុមហ៊ុន Samsung ផងដែរ។ យុទ្ធសាស្ត្រនេះបានចាប់ផ្តើមចាប់តាំងពីក្រុមហ៊ុន HMD Global បានប្រកាសបង្ហាញនូវស្មាតហ្វូន Nokia 6 ដំបូងបំផុតសម្រាប់ឆ្នាំ 2017 នេះដែលមានការកម្មង់ទិញដល់ទៅ 1 លានគ្រឿងនៅក្នុងប្រទេសចិន។
ពេលនេះ ក្រុមហ៊ុនក៏បានត្រៀមខ្លួនរួចរាល់ក្នុងការចូលរួមក្នុងព្រឹត្តិការណ៍តាំងពិពរណ៍ Mobile World Congress 2017 ដែលធ្វើឡើងនៅចុងខែនេះនៅទីក្រុងបាសេឡូណា។ យោងទៅតាមការបញ្ជាក់របស់ Venture Beat បានឱ្យដឹងថា ក្រុមហ៊ុន Nokia គ្រោងនឹងធ្វើការប្រកាសបង្ហាញនូវស្មាតហ្វូនជាច្រើនទៀតដូចជា Nokia 5, Nokia 3 និងស្មាតហ្វូនដែលជាកំណែទម្រង់ថ្មីរបស់ Nokia 3310 រួមទាំងការដាក់លក់នូវ Nokia 6 ទៅកាន់ទីផ្សារពិភពលោកផងដែរ។
ខាងក្រោមនេះគឺជាលក្ខណៈសម្បត្តិរបស់ស្មាតហ្វូន Nokia 3 ដែលត្រូវបានគេទម្លាយឱ្យដឹង។
អេក្រង់
ស្មាតហ្វូនមួយនេះនឹងប្រើប្រាស់នូវអេក្រង់ទំហំ 5 អ៊ីងប្រភេទ HD 720p ។ គួរបញ្ជាក់ផងដែរថា ក្រុមហ៊ុន Nokia ក៏វិនិយោគទៅលើការប្រើប្រាស់នូវអេក្រង់ Edge-To-Edge OLEDs រួមទាំងអេក្រង់ដែលអាចបត់បានផងដែរ ហើយបន្ទះអេក្រង់ថ្មីនេះក៏អាចនឹងដាក់បង្ហាញផងដែរ។
បន្ទះឈីប
ស្មាតហ្វូន Nokia 3 នឹងប្រើប្រាស់នូវបន្ទះឈីប Qualcomm Snapdragon 425 ដែលខ្ពស់ជាងការប្រើប្រាស់នូវបន្ទះឈីប Qualcomm 400 ។ សម្រាប់បន្ទះឈីប Qualcomm 600 និង 800 ប្រហែលជាទុកសម្រាប់ប្រើប្រាស់ទៅលើស្មាតហ្វូនថ្នាក់កណ្តាល និងលំដាប់ប្រណិត។ បន្ទះឈីប Snapdragon 425 អាចមានសមត្ថភាពដំណើរការបានខ្ពស់ជាងបន្ទះឈីប Snapdragon 415 ដែលធ្លាប់បានប្រើប្រាស់នៅលើផលិតផលជាច្រើននៅក្នុងឆ្នាំ 2016 ។
ប្រព័ន្ធប្រតិបត្តិការ
ស្មាតហ្វូន Nokia 6 បានប្រើប្រាស់នូវប្រព័ន្ធប្រតិបត្តិការ Android Nougat OS ហើយសម្រាប់ស្មាតហ្វូន Nokia 3 ក៏ប្រហែលជាប្រើប្រាស់នូវប្រព័ន្ធប្រតិបត្តិការនេះដូចគ្នាដែរ។
ម៉េមូរី និងរ៉េម
ស្មាតហ្វូននេះនឹងប្រើប្រាស់នូវរ៉េមផ្ទុកទិន្នន័យបណ្តោះអាសន្នទំហំ 2GB និងម៉េមូរីក្នុងម៉ាស៊ីនទំហំ 16GB ។ ស្មាតហ្វូននេះក៏មានសមត្ថភាពមិនចាញ់ស្មាតហ្វូនផ្សេងទៀតដែរគឺអាចដំណើរការកម្មវិធីធំៗបានដោយគ្មានបញ្ហា ហើយសម្រាប់ហ្គេមធំៗក៏វាអាចដំណើរការបានដូចគ្នា។
កាមេរ៉ា
ស្មាតហ្វូននេះនឹងបំពាក់នូវកាមេរ៉ាខាងក្រោយទំហំ 12 មេហ្គាភិចសែល និងកាមេរ៉ាខាងមុខទំហំ 5 មេហ្គាភិចសែលដែលអាចថតរូបភាពបានច្បាស់។
តម្លៃ និងកាលបរិច្ឆេទ
ស្មាតហ្វូននេះនឹងដាក់លក់នៅក្នុងតម្លៃ 200 ដុល្លារអាមេរិច ហើយវាគ្រោងនឹងដាក់លក់នៅក្នុងខែមីនា ឬមេសាខាងមុខនេះ។ ការដាក់លក់ Nokia 3 គឺនៅគ្រប់ទីផ្សារពិភពលោកមិនមែនតែប្រទេសចិននោះទេ៕
ប្រភពពី ibtimes.com