លោកប្រធានាធិបតី Trump ធ្លាប់បានប្រើសំឡេងខ្លាំងៗ ក្នុងការហៅក្រុមហ៊ុនបច្ចេកវិទ្យា Apple ឱ្យត្រឡប់មកកាន់ទឹកដីសហរដ្ឋអាមេរិចវិញនៅក្នុងអំឡុងពេលយុទ្ធនាការឃោសនារបស់ខ្លួន។ លោកជឿជាក់ថា ក្រុមហ៊ុន Apple គួរតែសាងសង់នូវរោងចក្រផលិតទូរស័ព្ទ iPhones នៅក្នុងទឹកដីសហរដ្ឋអាមេរិច មិនមែននៅក្នុងប្រទេសចិននោះទេ។ លោក Donald Trump នៅតែបន្តរការជម្រុញឱ្យលោក Tim Cook និងក្រុមហ៊ុន Apple ធ្វើការផ្លាស់ប្តូររោងចក្ររបស់ខ្លួនមកកាន់ទឹកដីសហរដ្ឋអាមេរិច។ នៅក្នុងសន្និសីទកាសែតមួយនៅឯ Goldman Sachs នៅថ្ងៃអង្គារិ៍ លោក Luca Maestri ដែលជាប្រធានផ្នែកហិរញ្ញវត្ថុរបស់ក្រុមហ៊ុន Apple បានឆ្លើយតបទៅនឹងការបន្តររិះគន់របស់លោក Donald Trump ទៅលើក្រុមហ៊ុន Apple ដែលមានរោងចក្រផលិតនៅក្នុងប្រទេសចិន។
លោកបាននិយាយថា យើងបានរួមចំណែកយ៉ាងធំធេងសម្រាប់សេដ្ឋកិច្ចរបស់សហរដ្ឋអាមេរិចជាច្រើន ទស្សវត្សកន្លងមកហើយ។ យើងបានវិនិយោគទឹកប្រាក់រាប់ពាន់លានដុល្លារនៅក្នុងសហរដ្ឋអាមេរិច។ កាលពី 10 ឆ្នាំមុននេះ យើងបានផ្តល់នូវការងារជាង 2 លានកន្លែងនៅក្នុងប្រទេសមួយនេះ នៅក្នុងការអភិវឌ្ឍសហគមន៍ ហាងលក់រាយជាច្រើនរបស់យើង មជ្ឈមណ្ឌលសេវាកម្ម និងតាមរយៈក្រុមហ៊ុនផ្គត់ផ្គង់ជាច្រើនទៀត។
បើទោះបីជាមិនបានបញ្ជាក់អំពីគម្រោងក្នុងការសាងសង់រោងចក្រនៅក្នុងទឹកដីសហរដ្ឋអាមេរិចក្តី ចម្លើយរបស់លោក Maestri បានផ្តល់នោះគឺបង្កប់ន័យរួចទៅហើយថា ក្រុមហ៊ុន Apple នៅតែរក្សារោងចក្រផលិតទូរស័ព្ទ iPhone របស់ខ្លួនដដែលនៅក្នុងប្រទេសចិន។ លើសពីនេះទៅទៀត ក្រុមហ៊ុន Apple បានលើកឡើងទៅហើយថាក្រុមហ៊ុនបានបង្កើតនូវការងារជាច្រើននៅក្នុងសហរដ្ឋអាមេរិចរួចហើយ មិនមែនគ្រាន់តែការសាងសង់នូវរោងចក្រនោះទេ។
ទោះជាយ៉ាងណាក៏ដោយ ប្រធានផ្នែកហិរញ្ញវត្ថុរូបនេះមិនបានច្រានចោលគំនិតក្នុងការសាងសង់នូវរោងចក្រផលិតទូរស័ព្ទ iPhone នៅក្នុងទឹកដីសហរដ្ឋអាមេរិចនោះទេ ។ លោកបានបន្ថែមថា “វាពិតជាលំបាកមែនទែនក្នុងការព្យាករណ៍អំពីរឿងនេះនោះ។ រដ្ឋាភិបាលរបស់លោក Trump ក៏មិនទាន់បានចាត់វិធានការលើកទឹកចិត្តណាមួយពិសេសក្នុងការសាងសង់រោងចក្រនៅក្នុងទឹកដីសហរដ្ឋអាមេរិចផងដែរ។” តាមការបញ្ជាក់របស់ប្រធានផ្នែកហិរញ្ញវត្ថុនេះ ក្រុមហ៊ុន Apple ពិតជាមិនមានគម្រោងក្នុងការផ្លាស់ប្តូររោងចក្រផលិតទូរស័ព្ទ iPhone ទៅកាន់សហរដ្ឋអាមេរិចនោះទេ៕