កាលពីថ្ងៃទី 16 ខែកុម្ភះ ឆ្នាំ 2017 កន្លងទៅនេះ ក្រុមហ៊ុន Samsung Electronics Co.,Ltd បានបង្ហាញចេញនូវចក្ខុវិស័យស្តីពីការអភិវឌ្ឍន៍ផលិតផលគ្រឿងបរិក្ខាបច្ចេកវិទ្យាជំនាន់ថ្មីទំនើបៗជាច្រើនរបស់ខ្លួននៅក្នុងព្រឹត្តិការណ៍ “The 2017 Samsung Southeast Asia and Oceania Forum” ដែលបានប្រារព្ធធ្វើឡើងនៅប្រទេសសិង្ហបុរី។ ដែលពិិធីនេះ គឺមានការចូលរួមពីសំណាក់អ្នកសារព័តមានជាច្រើនមកបណ្តាប្រទេសនានានៅក្នុងតំបន់អាស៊ីប៉ាស៊ីហ្វិក និងអូសេអានី នៅក្នុងនោះកម្ពុជា ក៏មានវត្តមានក្រុមអ្នកសារព័តមាននៃព្រះរាជាណាចក្រកម្ពុជាផងដែរ រួមមានដួចជា ទស្សនាវដ្តី ពិភពអេឡិចត្រូនិក ស្ថានីយ៍ទូរទស្សន៍ CTN និងគេហទំព័រ FreshNews។
សំរាប់សមិទ្ធិផលថ្មីៗរបស់ Samsung ដែលបានបង្ហាញចេញនៅក្នុងព្រិត្តការណ៍នោះ រួមមានដូចជា ទូរទស្សន៍ QLED TVs, បច្ចេកវិទ្យា Family Hub 2.0 refrigerator, FlexWash Laundry System, ម៉ាស៊ីនបោកគក់-សំងួតដ៏ទំនើប Washer-dryer និងផលិតផល VR7000 POWERbot …ជាដើម ដែលផលិតផលថ្មីៗទាំងនេះ បានបង្ហាញចេញនូវលក្ខណះកាន់តែងាយស្រួលដល់ការរស់នៅប្រចាំថ្ងៃនៃអ្នកប្រើប្រាស់ទាំងភាពជាឯកជន និងសម្រាប់ប្រើប្រាស់ទៅតាមតម្រូវការជាច្រើនទៀត។
យោងតាមប្រសាសន៍របស់លោកអគ្គនាយក និងជានាយកប្រតិបត្តិជាន់ខ្ពស់របស់ក្រុមហ៊ុន Samsung Electronics ប្រចាំតំបន់ Southeast Asia and Oceania លោក Yong Sung Jeon បានមានប្រសាសន៍លើកឡើងថា ក្រុមហ៊ុន Samsung Electronics មិនត្រឹមតែគិតគួររិះរកគំនិតក្នុងការច្នៃបង្កើតផលិតផលបច្ចេកវិទ្យាថ្មីៗ ដើម្បីបំពេញតម្រូវការទីផ្សារនៃអ្នកប្រើប្រាស់តែមួយមុខប៉ុណ្ណោះទេ ប៉ុន្តែពួកយើងបានគិតគួរបង្កើតផលិតផលណា ដែលបានផ្សារភ្ជាប់មកជាមួយនៅលក្ខណះងាយស្រួលបំផុត សុវត្ថិភាពខ្ពស់បំផុតសម្រាប់ការប្រើប្រាស់ក្នុងជីវភាពរស់នៅប្រចាំថ្ងៃរបស់ពួកគេផងដែរ។
លោកបានបន្ថែមថា បើទោះបីជាមានបញ្ហាប្រឈមមួយចំនួនបានកើតឡើងកំឡុងឆ្នាំ 2016 ក៏ដោយក៏ ក្រុមហ៊ុន Samsung Electronics នៅតែបន្តបោះជំហានទៅមុខជានិច្ច ហើយយើងនឹងបន្តសម្លឹងឆ្ពោះទៅមុខជានិច្ចជាមួយនឹងការបង្កើតនូវអ្វីដែលថ្មីៗ កាន់តែមានភាពឆ្លាតវៃនៅពេលអនាគត ដើម្បីផ្តល់ជូនដល់អតិថិជនរបស់យើង។ សម្រាប់គ្រឿងបរិក្ខាប្រើប្រាស់ក្នុងផ្ទះ ក្រុមហ៊ុន Samsung Electronics បានធ្វើការអភិវឌ្ឍន៍ចេញនូវទូរទស្សន៍ស្តើងប្រភេទស្មាតធីវីស៊េរីថ្មីបំផុត ដែលបានបំពាក់ដោយនៅបច្ចេកវិទ្យាកញ្ចក់អេក្រង់ប្រភេទ QLED ឬហៅថា QLED TVs ដែលមានស៊េរីដូចជា Q7,Q8 និងQ9 ជាដើម។
ក្រុមហ៊ុន Samsung Electronics បានបញ្ជាក់ថា ក្រៅពីបំពាក់ដោយកញ្ចក់អេក្រង់ប្រភេទ QLED ហើយទូរទស្សន៍ស្មាតធីវីស៊េរីថ្មីដ៏អស្ចារ្យនេះ ក៏បានភ្ជាប់បន្ថែមនូវបច្ចេកវិទ្យា Quantum dot ដែលបច្ចេកវិទ្យាជួយធ្វើឲ្យផ្ទៃកញ្ចក់អេក្រង់បង្ហាញចេញនៅផ្ទាំងទស្សនីយភាពបានកាន់តែរស់រវើកច្បាស់ភ្លឺថ្លាត្រជាក់ភ្នែកជាមួយនឹងពណ៌ដុតច្បាស់បែបធម្មជាតិពិតៗតែម្តង។ ជាងនេះទៅទៀត QLED TVs ជំនាន់ថ្មីនេះ មិនត្រឹមតែអាចបង្ហាញចេញនូវសាច់ពណ៌ និងពន្លឺនៃផ្ទៃរូបភាពវីដេអូបានច្បាស់ម៉ដ្ឋខៃ 100% នោះទេ អេក្រង់របស់វា ក៏បានបន្ថែមនូវកម្រិតពន្លឺប្រភេទ HDR កម្រិត 1,500-2,000 ដែលធ្វើឲ្យគុណភាពរូបភាពបង្ហាញចេញមកកាន់តែមានគុណភាពអស្ចារ្យគ្មានគូប្រៀប។
នៅក្នុងព្រឹត្តិការណ៍ “The 2017 Samsung Southeast Asia and Oceania Forum” ក្រៅតែពីបានបង្ហាញចេញនូវទូរទស្សន៍ស្មាតធីវីដ៏អស្ចារ្យនេះ ហើយ Samsung Electronics ក៏បានធ្វើការអភិវឌ្ឍន៍បន្ថែមលើសេវាកម្មកាន់តែឆ្លាតវៃសម្រាប់ប្រើជាមួយទៀតផងដូចជា Samsung Smart Remote ដែលអាចទ្រទ្រង់ក្នុងការចុចបញ្ជាបានជាមួយនឹងឧបករណ៍អេឡិចត្រូនិករបស់ Samsung ជាច្រើនទៀតក្រៅពីទូរទស្សន៍ ហើយជាពិសេសវាអាចធ្វើការបញ្ជាដោយការប្រើសំឡេងជំនូសឲ្យការចុចលើប៊ូតុង។ Samsung Smart View App ដែលជាសេវាកម្មមួយដ៏ពិសេសបំផុត ដែលអាចប្រើប្រាស់បានទាំងនៅលើឧបករណ៍ Android និង iOS ដែលវាអនុញ្ញតិ្តឲ្យអ្នកប្រើប្រាស់នូវឧបករណ៍ទាំងពីរនេះ ទទួលបានបទពិសោធន៍ថ្មីក្នុងការប្រើប្រាស់ជាមួយ Smart Hub លក្ខណះឯកជនបានយ៉ាងត្រឹមត្រូវនៅលើទូរស័ព្ទរបស់ពួកគេ។
នៅថ្ងៃដដែលនោះ Samsung Electronics ក៏បានបង្ហាញចេញនូវសមិទ្ធិផលបច្ចេកវិទ្យាថ្មីៗមួយចំនួនទៀតដូចជា Family Hub 2.0 refrigerator ដែល បានអភិវឌ្ឍន៍ថ្មីចេញពីជំនាន់ Family Hub 1.0 ដែលក្រុមហ៊ុន បានប្រកាសចេញកាលពីឆ្នាំទៅផងដែរ, នៅក្នុងនោះរួមមានដូចជា ប្រព័ន្ធបោកគក់ថ្មី FlexWash Laundry System, បច្ចេកវិទ្យាម៉ាស៊ីនត្រជាក់ World First Wind-Free wall mounted air conditioner និង VR7000 POWERbot ដែលពួកវា ត្រូវបានក្រុមហ៊ុន Samsung Electronics បានធ្វើបទបង្ហាញម្តងរួចមកហើយ កាលពីថ្ងៃព្រឹតិ្តការណ៍ពិពណ៌ផលិតផលបច្ចេកវិទ្យា (CES 2017) សហរដ្ឋអាមេរិក ហើយបច្ចេកវិទ្យាទំនើបៗ ទាំងអស់នេះ នឹងមានបំពាក់នៅលើឧបករណ៍របស់ Samsung ដែលត្រៀមបង្ហាញខ្លួនលើទីផ្សារក្នុងពេលឆាប់ៗនាឆ្នាំ 2017 នេះ៕
