Huawei ដែលជាក្រុមហ៊ុនបច្ចេកវិទ្យាផលិតស្មាតហ្វូនធំបំផុតចំណាត់ថ្នាក់លេខ 3 លើពិភពលោកត្រូវបានគេរាយការណ៍ថា កំពុងតែធ្វើការបង្កើតនូវជំនួយការ Digital Voice Assistant ខ្លួនឯងដើម្បីប្រកួតប្រជែងជាមួយនឹងកម្មវិធី Siri (របស់ក្រុមហ៊ុន Apple) កម្មវិធី Google Assistant (របស់ក្រុមហ៊ុន Google) និងកម្មវិធី Alexa (របស់ក្រុមហ៊ុន Amazon) ។
ក្រុមហ៊ុន Huawei បានបង្កើតនូវក្រុមការងារមួយដែលមានវិស្វរករច្រើនជាង 100 នាក់នៅក្នុងទីក្រុង Shenzhen ប្រទេសចិនដែលនៅក្នុងជំហានដំបូងនេះមានគោលដៅក្នុងការអភិវឌ្ឍទៅលើបច្ចេកវិទ្យាជំនួយការឆ្លាតវៃ Digital Smart Assistant នេះបើតាមការបញ្ជាក់របស់ Bloomberg ។ ជំនួយការឆ្លាតវៃ Digital Assistant របស់ក្រុមហ៊ុន Huawei មានគោលដៅឱ្យអ្នកប្រើប្រាស់ទាំងអស់អាចធ្វើការសន្ទនាជាភាសាចិនបាន។ ប្រភពមួយរបស់ Bloomberg បានអះអាងថា ក្រុមហ៊ុន Huawei នៅតែសហការជាមួយនឹងក្រុមហ៊ុន Google និងក្រុមហ៊ុន Amazon ដើម្បីផ្តល់នូវសេវាកម្មជាច្រើនសម្រាប់ស្មាតហ្វូនរបស់ខ្លួនជាលក្ខណៈអន្តរជាតិ។ ជំនួយការឆ្លាតវៃរបស់ក្រុមហ៊ុន Huawei អាចនឹងក្លាយជាដៃគូប្រកួតប្រជែងដ៏ធំជាមួយនឹងកម្មវិធី Siri របស់ក្រុមហ៊ុន Apple ដែលកំពុងតែប្រើប្រាស់នៅលើ iPhones ផងដែរ។
បើទោះបីជាក្រុមហ៊ុន Huawei មានគោលដៅក្នុងការសហការជាមួយនឹងក្រុមហ៊ុន Google ជាបន្តរទៀតនោះក្តី ការបង្កើតនូវជំនួយការឆ្លាតវៃ AI Assistant ផ្ទាល់ខ្លួននោះប្រាកដជាបង្ករនូវការប៉ះទង្គិចគ្នាជាក់ជាមិនខានពិសេសទៅដល់គម្រោងរបស់ក្រុមហ៊ុន Google ក្នុងការជម្រុញឱ្យក្រុមហ៊ុនផលិតស្មាតហ្វូនជាច្រើនប្រើប្រាស់់នូវជំនួយការឆ្លាតវៃរបស់ខ្លួននោះ។ នាពេលបច្ចុប្បន្ននេះ ជំនួយការឆ្លាតវៃ Google Assistant បានដាក់ឱ្យប្រើប្រាស់នៅលើស្មាតហ្វូន Pixel, Google Home និង Android Wear 2.0 Smartwatches ផងដែរ។
សម្រាប់ការប្តេជ្ញាចិត្តរបស់ក្រុមហ៊ុន Huawei ជាមួយនឹងក្រុមហ៊ុន Amazon ក្រុមហ៊ុនបច្ចេកវិទ្យាយក្សមួយនេះក៏បានប្រើប្រាស់នូវជំនួយការឆ្លាតវៃ Alexa នៅលើស្មាតហ្វូន Mate 9 របស់ខ្លួនដែលដាក់លក់នៅក្នុងសហរដ្ឋអាមេរិចផងដែរកាលពីខែមុននេះ។ ស្មាតហ្វូន Huawei Mate 9 នេះបានដាក់លក់នៅក្នុងប្រទេសចិន និងបណ្តាទីផ្សារប្រទេសនៅអាស៊ានជាច្រើនទៀតនៅក្នុងខែវិច្ឆិកា ឆ្នាំ 2016 ។ ជំនួយការឆ្លាតវៃ Digital Assistant របស់ក្រុមហ៊ុន Huawei សម្រាប់ស្មាតហ្វូនរបស់ខ្លួននៅក្នុងប្រទេសចិននេះគឺជាការវិនិយោគទី ២ នៅក្នុងវិស័យ AI ។ ងាកទៅកាន់ខែតុលាវិញ ក្រុមហ៊ុន Huawei បានប្រកាសថាក្រុមហ៊ុនមានគម្រោងក្នុងការផ្តល់ទុន UC Berkeley នៅក្នុងភាពជាដៃគូក្នុងការស្រាវជ្រាវកម្រិតជ្រៅ ចក្ខុវិស័យរបស់កុំព្យូទ័រ ការអភិវឌ្ឍទៅលើភាសាធម្មជាតិ នេះបើយោងទៅតាម TechCrunch ។
ក្រុមហ៊ុន Huawei មានមហិច្ឆិតាធំក្នុងផែនការគម្រោងរបស់ខ្លួននាពេលអនាគត។ លោក Richard Yu ធ្លាប់បានបញ្ជាក់កាលពីខែមុននេះ នៅក្នុងព្រឹត្តិការណ៍តាំងពិពរណ៍ CES 2017 ថា ក្រុមហ៊ុន Huawei មានគោលដៅក្នុងការក្លាយខ្លួនជាក្រុមហ៊ុនផលិតស្មាតហ្វូនលំដាប់ទីមួយនៅក្នុងឆ្នាំ 2021 ៕
