ថ្មីៗនេះ យោងតាមការបង្ហាញព័តមាននៅក្នុងគេហទំព័រផ្លូវការរបស់ Ford ដែលមានមូលដ្ឋាននៅសហរដ្ឋអាមេរិក បានអោយដឹងថា រថយន្ត Ford Fiesta ST ស៊េរីឆ្នាំ 2017 បានទទួលនូវពានរង្វាន់ Kelly Blue Book Award 2017 សម្រាប់រថយន្តស៊េរីធុនតូចបែប Sport ដ៏ស្រស់ស្អាត និងជារថយន្តមួយ ដែលចំណាយទៅលើការថែទាំមានតម្លៃទាបបំផុតប្រៀបធៀបទៅហ្នឹងរថយន្តថ្មីៗជាច្រើនម៉ាកផ្សេងទៀត។
រថយន្ត Fiesta ST មានអត្រានៃការស៊ីសាំងត្រឹមតែ 26 mpg (ទីក្រុង) 33 mpg (ការបើកបរនៅលើផ្លូវ Highway) និង 29 mpg (ការបើកបរនៅលើផ្លូវទីក្រុង និងផ្លូវ Highway) ។ រថយន្ត Fiesta ST នេះ ប្រើប្រាស់នូវចង្កឹះដៃ 6 វគ្គជាមួយនឹងកម្លាំងម៉ាស៊ីន EcoBoost® 4 ស៊ីឡាំងទំហំ 1.6 លីត្រ ដែលផ្តល់សន្ទុះខ្លាំងដល់រថយន្តថែមទៀតផង។
ជារៀងរាល់ឆ្នាំ ក្រុមហ៊ុន Kelly Blue Book តែងតែផ្តល់នូវពានរង្វាន់ទៅដល់រថយន្តស៊េរីថ្មីជាច្រើន ដែលមានការចំណាយទៅលើការថែទាំទាបនៅក្នុងរយៈពេល 5 ឆ្នាំដំបូងរបស់ខ្លួន។ ពានរង្វាន់នេះ ត្រូវបានប្រគល់ជូនដោយត្រូវពិចារណាទៅលើផ្នែកសំខាន់ៗមួយចំនួនដូចជាការចំណាយទៅលើប្រេងឥន្ធនៈ ការចំណាយទៅលើការធានារ៉ាប់រង ការចំណាយទៅលើការថែទាំ និងជួសជុលជាដើម៕