ការខិតខំប្រឹងប្រែងរបស់ក្រុមហ៊ុន Xiaomi នៅក្នុងការបង្កើតនូវបន្ទះឈីបផ្ទាល់ខ្លួនហាក់ដូចជាមិនមានព័ត៌មានច្រើនទម្លាយឱ្យដឹងនោះទេ ប៉ុន្តែក្រុមហ៊ុន Xiaomi បានបង្កើតនូវទំព័រមួយនៅលើ Weibo សម្រាប់ធ្វើការបង្ហាញនូវបន្ទះឈីបថ្មីរបស់ខ្លួនដែលមានឈ្មោះថា Pinecone ។ ពេលនេះ អ្នកគាំទ្រពិតជានឹងភ្ញាក់ផ្អើលដោយសារតែក្រុមហ៊ុន Xiaomi បានប្រកាសនូវកាលបរិច្ឆេទនៃការប្រកាសបង្ហាញនូវបន្ទះឈីបថ្មី Pinecone របស់ខ្លួនហើយគឺនៅថ្ងៃទី 28 ខែកុម្ភៈខាងមុខនេះ។
នាពេលបច្ចុប្បន្ន វាមានក្រុមហ៊ុនផលិតស្មាតហ្វូនតែ 3 ប៉ុណ្ណោះក្នុងពិភពលោក ដែលផលិតនូវបន្ទះឈីបផ្ទាល់ខ្លួននោះគឺក្រុមហ៊ុន Samsung (Exynos) ក្រុមហ៊ុន Apple (A-Series) និងក្រុមហ៊ុន Huawei (Kirin)។ ប៉ុន្តែ ពេលនេះក្រុមមហ៊ុន Xiaomi នឹងក្លាយជាក្រុមហ៊ុនផលិតស្មាតហ្វូនទី 2 របស់ប្រទេសចិនដែលផលិតនូវបន្ទះឈីបខ្លួនឯង។ ក្រុមហ៊ុន Xiaomi បានបង្ហាញនូវស្មាតហ្វូន Redmi 2A អស់រយៈពេល 2 ឆ្នាំកន្លងមកហើយដែលស្មាតហ្វូននេះប្រើប្រាស់នូវបន្ទះឈីប Leadcore ។ ក្នុងការសហការភាពជាដៃគូររបស់ក្រុមហ៊ុន Leadcore និងក្រុមហ៊ុន Xiaomi នឹងធ្វើការបង្កើតនូវបន្ទះឈីបថ្មីមួយទៀតដែលមានឈ្មោះថា Pinecone ដែលនឹងត្រូវប្រកាសបង្ហាញវត្តមានជាផ្លូវការនៅចុងខែនេះ។
គួរបញ្ជាក់ផងដែរថា ស្មាតហ្វូន Xiaomi Mi 5C ត្រូវបានគេរំពឹងថានឹងក្លាយជាស្មាតហ្វូនដំបូងបំផុតដែលនឹងប្រើប្រាស់នូវបន្ទះឈីប SoC Pinecone នេះ ប៉ុន្តែប្រភពព័ត៌មានខ្លះនិយាយថាស្មាតហ្វូននេះអាចនឹងប្រើប្រាស់នូវបន្ទះឈីប Snapdragon 625 ផងដែរ។ វានៅមិនទាន់មានព័ត៌មានជាក់លាក់អំពីស្មាតហ្វូន Xiaomi ស៊េរីថ្មីណាផ្សេងទៀតដែលនឹងប្រើប្រាស់នូវបន្ទះឈីបថ្មីនេះនៅឡើយទេ៕