វាហាក់ដូចជាប្រព័ន្ធប្រតិបត្តិការ Android Nougat ទើបតែប្រកាសជាផ្លូវការទើបតែប៉ុន្មានថ្ងៃប៉ុណ្ណោះ ប៉ុន្តែតាមពិតទៅប្រព័ន្ធប្រតិបត្តិការនេះត្រូវបានក្រុមហ៊ុន Google I/O បង្ហាញតាំងពីខែមីនា ឆ្នាំមុនមកម្ល៉េះ។ សម្រាប់ឆ្នាំ 2017 នេះវិញ ក្រុមហ៊ុន Google I/O ក៏គ្រោងនឹងធ្វើការប្រកាសបង្ហាញនូវប្រព័ន្ធប្រតិបត្តិការ Android ថ្មីចុងក្រោយបំផុតរបស់ខ្លួនផងដែរ។
ក្រុមហ៊ុន Google ហាក់ដូចជាបានដឹងអំពីអ្វីដែលអ្នកប្រើប្រាស់ចង់បាន ហើយក្រុមហ៊ុន Google បានបន្ថែមនូវមុខងារថ្មីប្លែកៗដែលកាន់តែងាយស្រួលក្នុងការប្រើប្រាស់ និងអស្ចារ្យជាទីបំផុត។ ថ្មីៗនេះ យើងបានលេចលឺព័ត៌មានមួយដែលបញ្ជាក់ថាឈ្មោះ Oreo នឹងយកទៅប្រើប្រាស់សម្រាប់ប្រព័ន្ធប្រតិបត្តិការ Android ថ្មីនេះ។
លោក Hiroshi Lockeimer ដែលជាអ្នកគ្រប់គ្រងផ្នែកប្រព័ន្ធប្រតិបត្តិការ Android, Chrome OS និង Play បានបង្ហោះនូវរូបភាព GIF មួយនៃរូបនំ Oreo ដែលផ្តល់នូវតម្រុយថា ប្រព័ន្ធប្រតិបត្តិការ Android ថ្មីនេះ នឹងមានឈ្មោះថា Android Oreo ជាក់ជាមិនខាន។ យ៉ាងណាមិញ យើងនឹងដឹងព័ត៌មាននេះ កាន់តែច្បាស់នៅក្នុងខែមីនាខាងមុខនេះ៕