វាហាក់ដូចជាគ្មានអាថ៌កំបាំងទៀតនោះទេ ដែលថា ទូរស័ព្ទ iPhone ស៊េរីថ្មី នឹងមានលក្ខណៈពិសេសអស្ចារ្យជាច្រើនបើធ្វើការប្រៀបធៀបជាមួយនឹងទូរស័ព្ទត្រកូល iPhone នាពេលបច្ចុប្បន្ននេះ។ យើងបានលឺនូវពាក្យចចាមអារ៉ាមជាច្រើន ដែលបានបញ្ជាក់ថា ទូរស័ព្ទ iPhone ស៊េរីថ្មីនេះ នឹងប្រើប្រាស់នូវអេក្រង់ថ្មីដែលបង្កប់នូវប្រព័ន្ធស្កែនក្រយ៉ៅដៃ បច្ចេកវិទ្យាបញ្ចូលថ្ម Wireless Charging និងជាច្រើនទៀត។ អតិថិជនជាច្រើនកំពុងតែទន្ទឹងចង់ដឹង និងចង់មើលឃើញនូវរូបរាងពិតប្រាកដយ៉ាងដូចម្តេចខ្លះសម្រាប់ទូរស័ព្ទ iPhone ស៊េរីថ្មីនេះនោះ។ ទូរស័ព្ទ iPhone 8 មិនត្រឹមតែជាទូរស័ព្ទដែលគួរឱ្យចាប់អារម្មណ៍ខ្លាំងប៉ុណ្ណោះទេ ប៉ុន្តែវាថែមទាំងជាប្រាក់ចំណូលយ៉ាងធំសម្រាប់ក្រុមហ៊ុន Apple ថែមទៀតផង។
ក្រុមហ៊ុន Foxconn ដែលជារោងចក្រតម្លើងនូវទូរស័ព្ទ iPhones ដែលបានធ្វើការទៅលើផ្នែកនេះ ចាប់តាំងពីវត្តមានរបស់ទូរស័ព្ទ iPhone ដំបូង ហើយកំណើននៃទូរស័ព្ទ iPhone ក៏កើនខ្លាំងឡើងៗផងដែរ។ នៅក្នុងរបាយការណ៍ហិរញ្ញវត្ថុចុងក្រោយនេះ បានបង្ហាញថា វាមានការកើនឡើងដល់ទៅ 29% បើធៀបនឹងឆ្នាំមុនដែលធ្វើឱ្យតម្លៃនៃភាគហ៊ុនមានការកើនឡើង ហើយពេលនេះ វាមានពាក្យឃោសនាបំផ្លើសជាច្រើនទៅលើទូរស័ព្ទ iPhone 8 ផងដែរ នេះ បើតាមការបញ្ជាក់របស់ Bloomberg ។
ប៉ុន្តែលោកអ្នកប្រហែលជាបានដឹងច្បាស់ហើយថា ក្រុមហ៊ុនបច្ចេកវិទ្យាធំក្រៅពីក្រុមហ៊ុន Apple ក៏នៅមានក្រុមហ៊ុនបច្ចេកវិទ្យាជាច្រើនទៀតដូចជាក្រុមហ៊ុន Huawei, Xiaomi, Sony, HP និងជាច្រើនទៀតដែលកំពុងតែរីកកាន់តែធំឡើងៗផងដែរ។ ក្រុមហ៊ុន Apple ប្រហែលជាមានគម្រោងក្នុងការតម្លើងនូវរោងចក្រមួយដើម្បីផលិតនូវអេក្រង់នៅក្នុងទឹកដីសហរដ្ឋអាមេរិចនាពេលដ៏ខ្លីខាងមុខនេះ ហើយក្រុមហ៊ុន ក៏អាចនឹងសាងសង់នូវរោងចក្រមួយបន្ថែមទៀតនៅក្នុងទីក្រុង Shenzhen នៃប្រទេសចិនផងដែរ។ ថ្មីៗនេះ ក្រុមហ៊ុននេះ ទើបតែទិញយកក្រុមហ៊ុន Sharp Corp ដែលជាក្រុមហ៊ុនបច្ចេកវិទ្យាយក្សរបស់ប្រទេសប៉ុនផងដែរ។ អ្វីដែលកាន់តែអស្ចារ្យបំផុតនោះ គឺថា វត្តមានរបស់ទូរស័ព្ទ iPhone អាចរកប្រាក់ចំណេញបានដល់ទៅពាក់កណ្តាលនៃប្រាក់ចំណេញសរុបរបស់ក្រុមហ៊ុន Apple ជាពិសេសសម្រាប់ត្រីមាសចុងក្រោយនេះដែលធ្វើឱ្យភាគហ៊ុនរបស់ក្រុមហ៊ុន Foxconn មានការកើនឡើងខ្លាំងផងដែរ។
គួរបញ្ជាក់ផងដែរថា នៅក្នុងពេលអនាគតដ៏ខ្លីខាងមុខនេះ ប្រាក់ចំណូលសុទ្ធ (Net Income) របស់ក្រុមហ៊ុននេះ ប្រហែលជាអាចធ្លាក់ចុះដល់ទៅ 13% ប៉ុន្តែភាពជោគជ័យរបស់ទូរស័ព្ទ iPhone 8 នឹងធ្វើឱ្យមានសន្ទុះកើនឡើងខ្លាំងវិញ។ នៅក្នុងពេលដ៏វែងខាងមុខនេះ កុំព្យូទ័រ និងទីផ្សារស្មាតហ្វូនអាច នឹងមានការធ្លាក់ចុះហើយវាក៏អាចជាបញ្ហាមួយដ៏ធំសម្រាប់ក្រុមហ៊ុន Foxconn ប៉ុន្តែថ្មីៗនេះ ការវិនិយោគទៅលើបច្ចេកវិទ្យា VR និងបច្ចេកវិទ្យាឆ្លាតវៃ AI ក៏នឹងធ្វើឱ្យរោងចក្រនេះ ជោគជ័យនៅក្នុងការផលិតរបស់ខ្លួនផងដែរ។ វិស័យនៃការផលិតមនុស្សយន្ត ក៏អាចក្លាយជាចំណាប់អារម្មណ៍បន្ទាប់របស់រោងចក្រនេះផងដែរ៕