នៅពេលដែល Leakster បានទម្លាយនូវតម្លៃរបស់ស្មាតហ្វូន Galaxy S8 នៅលើបណ្តាញសង្គម Twitter ដែលមានតម្លៃចាប់ផ្តើម 849 ដុល្លារអាមេរិចនោះ យើងបានប្រមូលនូវព័ត៌មានជាច្រើនដែលពាក់ព័ន្ធទៅនឹងរឿងនេះផងដែរ។ ថ្មីៗនេះ តាមរយៈការបង្ហោះមួយរបស់អ្នកលេងជនជាតិអ៊ុយក្រែនម្នាក់បានបញ្ជាក់អំពីតម្លៃ និងពណ៌របស់ស្មាតហ្វូន Galaxy S8 និង Galaxy S8+ ដែលមានតម្លៃ 950 ដុល្លារ និង 1050 ដុល្លារអាមេរិច។ យ៉ាងណាមិញ សូមចងចាំថាតម្លៃរបស់វាគឺប្រែប្រួលទៅតាមប្រទេសនីមួយៗមិនមែនដូចគ្នានោះទេ ហើយអ្នកដែលបានបង្ហោះនៅក្នុងបណ្តាញសង្គម Twitter ក៏បានលុបនូវសារបង្ហោះអំពីតម្លៃនៃស្មាតហ្វូននេះចោលផងដែរ។
នៅពេលនេះ ប្រភពបែកធ្លាយមួយទៀតពីប្រទេសចិនបានបង្ហាញអំពីតម្លៃរបស់ស្មាតហ្វូន Galaxy S8 ដែលមានតម្លៃចាប់ផ្តើមប្រហែលជា 885 ដុល្លារអាមេរិច។ តម្លៃនេះគឺដាក់លក់នៅក្នុងទីផ្សារនៃប្រទេសចិនតែប៉ុណ្ណោះ ដូចនេះវានៅមិនទាន់ច្បាស់ជាក់លាក់នៅឡើយទេ។
សរុបមក តម្លៃលក់របស់ស្មាតហ្វូន Galaxy S8 គឺចាប់ផ្តើមពីតម្លៃជាង 800 ដុល្លារអាមេរិច អេក្រង់គែមកោង Edge-to-Edge ហើយវាមានពាក្យចចាមអារ៉ាមថាទំហំអេក្រង់មានដល់ទៅ 83% នៃតួខ្លួនរបស់វា។ ទន្ទឹមគ្នានេះផងដែរ វាមានរបាយការណ៍ជាច្រើនដែលបានបញ្ជាក់ថាទូរស័ព្ទ iPhone 8 អេក្រង់ OLED នឹងដាក់លក់នៅក្នុងតម្លៃដល់ទៅ 1000 ដុល្លារអាមេរិច ចំនែកទូរស័ព្ទ LG G6 នឹងមានតម្លៃថ្លៃជាង LG G5 ។ ចាប់តាំងពីក្រុមហ៊ុន Apple និងក្រុមហ៊ុន Samsung បានធ្វើការផ្លាស់ប្តូរទៅលើបច្ចេកវិទ្យា ការរចនារូបរាង និងអេក្រង់នោះ តម្លៃរបស់ស្មាតហ្វូនទាំងនេះមិនថោកនោះទេ។
ហេតុផលទាំងអស់នេះហើយជាមូលហេតុដែលធ្វើឱ្យតម្លៃរបស់ស្មាតហ្វូនទាំងនេះមានការកើនឡើងខ្លាំងនៅឆ្នាំនេះនោះ។ ការប្រើប្រាស់នូវបច្ចេកវិទ្យាអេក្រង់ OLED បច្ចេកវិទ្យាកាមេរ៉ាភ្លោះ និងការពង្រឹងទៅលើលោហធាតុសម្រាប់យកមកផលិតនូវស្មាតហ្វូនដ៏អស្ចារ្យនេះ៕