ក្រុមហ៊ុន Samsung Electronics Co., Ltd បានធ្វើការប្រកាសចេញនូវម៉ូនីទ័រអេក្រង់កោងស៊េរីថ្មី បំផុតម៉ូដែល CH711 Quantum Dot នៅក្នុងវេទិកា Samsung Forum ឆ្នាំ 2017 ដែលបង្ហាញពីភាពលេចធ្លោរក្នុងការដឹកនាំផ្នែកឧស្សាហកម្មទៅលើបច្ចេកវិទ្យាអេក្រង់។ នៅក្នុងវេទិកានេះ ក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះក៏បានដាក់បង្ហាញនូវអេក្រង់ម៉ូនីទ័រលេងហ្គេម Quantum Dot ស៊េរីមុនម៉ូដែល CFG70 និង CF791 ផងដែរដើម្បីធ្វើការបង្ហាញពីការវិវត្តន៍មួយជំហានទៀតរបស់ក្រុមហ៊ុននៅក្នុងបច្ចេកវិទ្យាអេក្រង់កោងនេះ។
ក្នុងការរចនានូវរូបរាងដ៏ស្រស់ស្អាតរបស់ម៉ូនីទ័រស៊េរីថ្មីនេះ ម៉ូនីទ័រអេក្រង់កោង CH711 Quantum Dot របស់ក្រុមហ៊ុន Samsung មានពីរជម្រើសសម្រាប់ធ្វើការជ្រើសរើសគឺ 27 អ៊ីញ និង 31 អ៊ីញដែលផ្តល់នូវពណ៌ពន្លឺរូបភាពច្បាស់ ត្រជាក់ភ្នែកដែលធ្វើឱ្យលោកអ្នកពេញចិត្តជានិច្ចជាមួយនឹងសមត្ថភាពដ៏អស្ចារ្យរបស់ម៉ូនីទ័រនេះ។ ជាមួយនឹងការប្រើប្រាស់នូវភាពកោងដល់ទៅ 1800R និងកម្រិតនៃការលំងាកបានដល់ទៅ 178 ដឺក្របានធ្វើឱ្យម៉ូនីទ័រអេក្រង់កោង CH711 ផ្តល់នូវភាពច្បាស់គ្រប់ជ្រុង និងគ្រប់ផ្នែកទាំងអស់នៅក្នុងបន្ទប់។ ម៉ូនីទ័រនេះមានការរចនារូបរាងយ៉ាងទាន់សម័យដែលធ្វើឱ្យអ្នកទស្សនាអាចធ្វើការមើលបានមិនថាបញ្ឈរ ឬផ្តេកនោះទេ។ បើនិយាយពីកម្រិតពណ៌របស់អេក្រង់ម៉ូនីទ័រនេះវិញ វាប្រើប្រាស់នូវពណ៌ RGBs ជិត 125% និងកម្រិតភាពច្បាស់ 2560 x 1440 WQHD ដែលធ្វើឱ្យម៉ូនីទ័រនេះច្បាស់ល្អគ្រប់ពេលវេលា និងគ្រប់ទីកន្លែង។
អេក្រង់ម៉ូនីទ័រ CH711 មានរូបរាងស្តើង ជាមួយនឹងការរចនាមកប្រភេទ 360 ដឺក្រេដែលលោកអ្នកអាចដាក់ភ្ជាប់ទៅក្នុងគេហដ្ឋាន ឬកន្លែងណាមួយដែលលោកអ្នកពេញចិត្ត។ ភាពស្រស់ស្អាតរបស់វាពិតជាទាក់ទាញប្រកបដោយភាពប្រណិតបំផុត ពិសេសវាប្រើប្រាស់នូវរន្ធដោត HDMI ដែលស្ថិតនៅជើងទម្រររបស់វាដែលពិតជាគ្មានកន្លែងណាទាស់នោះទេ។ អេក្រង់ម៉ូនីទ័រ CH711 ស៊េរីថ្មីនេះនឹងដាក់ឱ្យកម្មង់ទិញបាននៅក្នុងខែមេសា ឆ្នាំ 2017 ។
ការបង្កើតនូវអេក្រង់ម៉ូនីទ័រសម្រាប់អ្នកជំនាញ និងលោកអ្នកដែលចូលចិត្តលេងហ្គេម ពួកគេបានជ្រើសរើសនូវអេក្រង់ម៉ូនីទ័រលេងហ្គេម CFG70 ទំហំ 24 អ៊ីញ និង 27 អ៊ីញដែលប្រើប្រាស់នូវបច្ចេកវិទ្យា Quantum Dot ពីក្រុមហ៊ុន Samsung ដែលធ្វើឱ្យរូបភាពភ្លឺច្បាស់ត្រជាក់ភ្នែក។ អេក្រង់ម៉ូនីទ័រ CFG70 ផ្តល់នូវលក្ខណៈពិសេសៗជាច្រើនសម្រាប់លោកអ្នកដែលចូលចិត្តលេងហ្គេមដូចជា “Gaming UX” User Interface និងបច្ចេកវិទ្យាមួយចំនួនទៀតដែលពង្រឹងទៅលើគុណភាពរូបភាពភ្លឺច្បាស់នៅក្នុងប្រភេទហ្គេម FPS, RTS, RPG និង AOS ។
បើទោះបីជាអេក្រង់ម៉ូនីទ័រ CFG70 នេះបានប្រកាសបង្ហាញវត្តមានចាប់តាំងពីចុងឆ្នាំ 2016 មកក្តី វានៅតែទទួលបានការគាំទ្រខ្លាំងនឹងឈានមុខគេនៅក្នុងវិស័យម៉ូនីទ័រអេក្រង់កោង។ វិទ្យាស្ថានលើកកម្ពស់ការអភិវឌ្ឍរចនាម៉ូដនៅក្នុងប្រទេសជប៉ុន (JDP) ថ្មីៗនេះក៏ទើបតែប្រគល់ពានរង្វាន់កិតិ្តយសប្រចាំឆ្នាំ “Good Design Awards” ផងដែរទៅលើការប្រើប្រាស់នូវបច្ចេកវិទ្យាថ្មីៗជាច្រើនដែលពង្រឹងទៅលើគុណភាពរូបភាពភ្លឺច្បាស់ដូចពិតៗ។ អ្វីដែលកាន់តែអស្ចារ្យទៀតនោះ JDP ក៏ទទួលស្គាល់ទៅលើប្រសិទ្ធិភាព និងប្រព័ន្ធដំណើរការខ្លាំងនៃម៉ូនីទ័រអេក្រង់លេងហ្គេម CFG70 ផងដែរ។
ចំនែកអេក្រង់ម៉ូនីទ័រ Quantum Dot CG791 វិញមានកម្រិតភាពកោងត្រឹមតែ 1500R និងកម្រិត Ultra-Wide 21:9 Aspect Ratio ដែលរចនាមកជាមួយនឹងគុណភាពរូបភាពម៉ត់ច្បាស់ និងផ្តល់នូវកែខៃពណ៌តាមចិត្តដែលលោកអ្នកចង់បាននៅក្នុង Settings ។ អេក្រង់ម៉ូនីទ័រនេះប្រើប្រាស់នូវបច្ចេកវិទ្យា Picture-By-Picture (PBP) ដែលអ្នកប្រើប្រាស់ជាច្រើនអ្នកអាចធ្វើការទាញយកនូវទិន្នន័យធំៗមកដាក់បង្ហាញនៅលើអេក្រង់ម៉ូនីទ័រនេះបានតាមរយៈការភ្ជាប់ជាមួយនឹងរន្ធ HDMI ឬរន្ធ DP Input Source ជាពិសេសរូបរាងរបស់អេក្រង់ម៉ូនីទ័រនេះដាក់នៅកន្លែងណាក៏ស្រស់ស្អាតដែរ។ អេក្រង់ម៉ូនីទ័រនេះអាចដំណើរការងារបានច្រើនក្នុងពេលតែមួយ និងមានល្បឿនលឿនថែមទៀតផង។
ការប្រើប្រាស់នូវបច្ចេកវិទ្យា Picture-in-Picture (PIP) ក៏អនុញ្ញាតឱ្យអ្នកប្រើប្រាស់ធ្វើការផ្លាស់ប្តូរនូវមាតិកានៅលើអេក្រង់បានដោយបាត់បង់នូវកម្រិតភាពច្បាស់ ឬគុណភាពនៃរូបភាពនោះទេ។ ជាមួយនឹងការរចនារូបរាងដ៏សក្តិសមនេះបានធ្វើឱ្យអេក្រង់ម៉ូនីទ័រនេះផ្តល់នូវអារម្មណ៍ស្រស់ស្រាយជានិច្ចសម្រាប់អ្នកទស្សនា ហើយអេក្រង់ម៉ូនីទ័រនេះលោកអ្នកក៏អាចប្រើប្រាស់ជា Workstation ឬនៅក្នុងបន្ទប់ការិយាល័យផងដែរ៕