នៅថ្ងៃនេះ ក្រុមហ៊ុនបច្ចេកវិទ្យា LG បានបញ្ចេញនូវវីដេអូខ្លីមួយជាផ្លូវការ ដែលបញ្ជាក់យ៉ាងច្បាស់ថា មុខងារពិសេសមួយក្នុងចំណោមមុខងារពិសេសជាច្រើនសម្រាប់ស្មាតហ្វូន LG G6 គឺស្មាតហ្វូននេះ នឹងប្រើប្រាស់នូវប្រព័ន្ធការពារការជ្រាបទឹក (Water Resistance) ។ នៅក្នុងវីដេអូនេះមិនបានបញ្ជាក់អំពីអ្វីផ្សេងទៀតនោះទេ ដូចនេះយើងនៅមិនទាន់ដឹងថាតើប្រព័ន្ធការពារការជ្រាបទឹកដែលបំពាក់នៅលើស្មាតហ្វូន LG G6 នេះមានលក្ខណៈពិសេសបែបណានោះ? នៅក្នុងមុខងារនេះ យើងអាចប៉ាន់ស្មានបានថា ស្មាតហ្វូននេះយ៉ាងហោចណាស់ទទួលបាននូវវិញ្ញាប័នបត្រ IPx7 ដែលមានលក្ខណៈដូចគ្នាទៅនឹងប្រព័ន្ធការពារការជ្រាបទឹកដូចទៅនឹងស៊េរី iPhone 7 ដែរ។
អ្វីដែលគួរឱ្យចាប់អារម្មណ៍នោះគឺថា ក្រុមហ៊ុន LG បានបង្ហោះនូវវីដេអូមួយដែលមានឈ្មោះថា “G6: Water Resistance” ដំបូងបំផុត ក្រោយមកក៏ផ្លាស់ប្តូរឈ្មោះទៅជា “G6: Pool” ។ តាមរយៈការប្រកាសលើកមុននេះ ក្រុមហ៊ុន LG នឹងប្រកាសបង្ហាញនូវស្មាតហ្វូន LG G6 នៅថ្ងៃទី 26 ខែកុម្ភៈខាងមុខនេះនៅក្នុងព្រឹត្តិការណ៍ MWC 2017 ។ ស្មាតហ្វូននេះនឹងចាប់ផ្តើមដាក់លក់នៅក្នុងខែមីនានៅក្នុងទីផ្សារមួយចំនួនប៉ុណ្ណោះ ប៉ុន្តែ LG G6 នឹងដាក់លក់នៅក្នុងសហរដ្ឋអាមេរិចផងដែរមុនខែមេសា។ ក្រៅពីប្រព័ន្ធការពារការជ្រាបទឹក ស្មាតហ្វូន LG G6 នឹងភ្ជាប់ជាមួយលក្ខណៈពិសេសជាច្រើនទៀតគឺអេក្រង់ 5.7 អ៊ីង FullVision ជាមួយនឹងកម្រិតភាពច្បាស់ 1440 x 2880 ភិចសែល ប្រព័ន្ធកាមេរ៉ាភ្លោះ Wide-Angle និងប្រព័ន្ធប្រតិបត្តិការ Android 7 Nougat ភ្ជាប់ជាមួយនឹង LG UX 6.0 ផងដែរ។
ស្មាតហ្វូន LG G6 នេះគឺមានរូបរាងខុសគ្នាទាំងស្រុងពីស្មាតហ្វូន LG G5 ដែលបានបង្ហាញវត្តមានកាលពីឆ្នាំមុនគ្រាន់តែវានៅតែរក្សារូបរាងធ្វើពីលោហៈធាតុដដែល។ ស្មាតហ្វូននេះនឹងប្រើប្រាស់នូវបន្ទះឈីប Snapdragon 821 រ៉េមផ្ទុកទិន្នន័យបណ្តោះអាសន្នទំហំ 4GB USB Type-C ម៉េមូរីក្នុងម៉ាស៊ីនទំហំ 32GB និងថាមពលថ្មខ្លាំង 3200mAh ៕