Bixby គឺជាជំនួយការឆ្លាតវៃ AI ថ្មីបំផុតរបស់ក្រុមហ៊ុន Samsung ដែលមានលក្ខណៈពិសេសប្លែកដែលមានគោលបំណងក្នុងការប្រកួតប្រជែងជាមួយនឹងដៃគូជាច្រើនរបស់ខ្លួននៅលើទីផ្សារ។ ព័ត៌មានថ្មីចុងក្រោយបំផុតដែលបានដឹងអំពីក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងនេះ បានបញ្ជាក់ថា ក្រុមហ៊ុន Samsung ប្រហែលជាមានមហិច្ឆិតាធំជាងនេះទៀត។
លោក Chosun Biz ដែលជាបុគ្គលិកម្នាក់របស់ក្រុមហ៊ុនបច្ចេកវិទ្យា Samsung Electronics នៅសហរដ្ឋអាមេរិច បានបញ្ជាក់ថា ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះកំពុងតែសម្លឹងរកមើលទិញនូវក្រុមហ៊ុនបច្ចេកវិទ្យាជាច្រើនដែលកំពុងតែធ្វើការនៅលើផ្នែកបច្ចេកវិទ្យាឆ្លាតវៃ AI ។ ដើម្បីសម្រេចនូវមហិច្ឆិតារបស់ខ្លួន ក្រុមហ៊ុន Samsung បានត្រៀមទឹកប្រាក់ចំនួន 1 ពាន់លានដុល្លារសហរដ្ឋអាមេរិច។
នៅក្នុងឆ្នាំ 2016 ក្រុមហ៊ុនបច្ចេកវិទ្យា Samsung បានទិញយកអាជីវកម្មចំនួន 10 ដែលក្នុងនោះមានការទិញយកក្រុមហ៊ុន Viv Labs ដែលជាក្រុមហ៊ុនមួយធ្លាប់បង្កើតនូវកម្មវិធី Siri សម្រាប់ក្រុមហ៊ុន Apple ។ អ្វីដែលគួរឱ្យកត់សម្គាល់ទៀតនោះ ក្រុមហ៊ុន Samsung ទើបតែចំណាយទឹកប្រាក់ 8 ពាន់លានដុល្លារអាមេរិចដើម្បីទិញភាគហ៊ុនរបស់ក្រុមហ៊ុន Harman International សម្រាប់ផ្តោតទៅលើវិស័យរថយន្តថែមទៀត។ ក្រៅពីការទិញទាំងអស់នេះ ក្រុមហ៊ុន Samsung ក៏នឹងវិនិយោគទុនបន្តទៀតនៅក្នុងវិស័យបច្ចេកវិទ្យា AI ។
យើងនឹងរង់ចាំមើលជាបន្តរទៀតថា តើទីបំផុតក្រុមហ៊ុន Samsung អាចនឹងក្លាយជាក្រុមហ៊ុនដឹកនាំគេនៅក្នុងវិស័យផ្នែក Mobile Software ដែរឬទេ? លោក Chosun Biz បានបញ្ជាក់ទៀតថា ក្រុមហ៊ុន Samsung ក៏បាត់បង់នូវឱកាសខកខានម្តងរួចមកហើយក្នុងការទិញយក Android OS នៅក្នុងឆ្នាំ 2005 ដែលពេលនេះ វាមានឥទ្ធិពលខ្លាំងបំផុតនៅលើទីផ្សារ៕
