ខណៈពេលដែលមនុស្សគ្រប់គ្នាកំពុងតែងឿងឆ្ងល់អំពីស្មាតហ្វូនស៊េរីថ្មីដែលក្រុមហ៊ុន Nokia នឹងត្រូវដាក់បង្ហាញនៅឆ្នាំនេះ ពេលនេះគេហទំព័រ JD.com (គេហទំព័រធំជាងគេនៅក្នុងប្រទេសចិន និងជាដៃគូសហការផ្តាច់មុខក្នុងការដាក់លក់នូវស្មាតហ្វូន Nokia 6) បានចុះផ្សាយអំពីស្មាតហ្វូន Nokia 8 ហើយ។ នៅក្នុងការចុះផ្សាយជាវីដេអូនេះ គេហទំព័រនេះបានបង្ហាញអំពីរូបភាព 3D-Render ដែលស្របទៅតាមការចង់បានរបស់អតិថិជនអ្នកប្រើប្រាស់។
តម្លៃរបស់ស្មាតហ្វូន Nokia 8 មានតម្លៃ 3188 យ័ន (ប្រហែលជា 460 ដុល្លារអាមេរិច) ខណៈពេលដែលតម្លៃរបស់ស្មាតហ្វូន Nokia 6 មានតម្លៃ 2300 យ័ន ។ ឥឡូវនេះ គេហទំព័រ JD បានបង្ហាញត្រឹមតែលក្ខណៈពិសេសសំខាន់ៗរបស់ស្មាតហ្វូនស៊េរីថ្មីដូចជាស្មាតហ្វូននេះនឹងស្រោបដោយស៊ុមជាលោហៈ និងប្រើប្រាស់នូវប្រព័ន្ធ LTE Connectivity ។
ពាក្យចចាមអារ៉ាមមួយចំនួនបានបញ្ជាក់ថា ស្មាតហ្វូនស៊េរីថ្មីនេះនឹងមានអេក្រង់ទំហំ 5.7 អ៊ីងប្រភេទ Super AMOLED (កម្រិតភាពច្បាស់ QHD) កាមេរ៉ាខាងក្រោយទំហំ 24 មេហ្គាភិចសែលភ្ជាប់ជាមួយនឹងមុខងារ OIS កាមេរ៉ាខាងមុខទំហំ 12 មេហ្គាភិចសែលសម្រាប់ថតរូប Selfies បានច្បាស់បំផុត រួមជាមួយនឹងបន្ទះឈីប Snapdragon ចុងក្រោយបំផុត និងការពង្រឹងទៅលើម៉េមូរីផងដែរ។
គួរបញ្ជាក់ផងដែរថា ក្រុមហ៊ុន Nokia នឹងនាំយកនូវស្មាតហ្វូន Nokia 3 និង Nokia 5 ទៅចូលរួមនៅក្នុងព្រឹត្តិការណ៍តាំងពិពរណ៍ MWC ផងដែរ។ សូមទស្សនាវីដេអូរបស់ស្មាតហ្វូន Nokia 8 ដែលបង្ហោះដោយ Concept Creator Channel នៅលើ YouTube ។