បន្ទាប់ពីក្រុមហ៊ុន Foxconn បានទិញយកក្រុមហ៊ុន Sharp ដែលជាក្រុមហ៊ុនផលិតនូវបន្ទះអេក្រង់ដ៏ល្បីល្បាញនៅក្នុងប្រទេសជប៉ុន បានជូនដំណឹងទៅកាន់ក្រុមហ៊ុន Samsung ថា ក្រុមហ៊ុនរបស់ខ្លួន នឹងបញ្ឈប់នូវការចែកចាយនូវបន្ទះអេក្រង់ LCD របស់ខ្លួនតទៅទៀតហើយ ដោយក្រុមហ៊ុន Sharp កំពុងតែផ្តោតទៅលើការបង្កើតនូវទូរទស្សន៍ Sharp Aquos TVs ស៊េរីថ្មីខ្លួនឯងវិញ។
អ្វីដែលគួរឱ្យភ្ញាក់ផ្អើលនោះ ក្រុមហ៊ុនបច្ចេកវិទ្យាយក្ស Samsung Electronics បានងាកទៅរកដៃគូប្រកួតប្រជែងធំរបស់ខ្លួនក្រុមហ៊ុន LG Display ហើយក្រុមហ៊ុនទាំងពីរនេះក៏បានយល់ព្រមនៅក្នុងកិច្ចព្រមព្រៀងមួយផងដែរនោះគឺ ក្រុមហ៊ុន LG នឹងចាប់ផ្តើមដឹកជញ្ជូននូវបន្ទះអេក្រង់ LCD Panels ទៅកាន់ក្រុមហ៊ុន Samsung នៅក្នុងខែកក្កដាខាងមុខនេះ។ ព័ត៌មានទាំងអស់នេះ ជាការបញ្ជាក់របស់លោកនាយកប្រតិបត្តិ Han Sang-beom នៃក្រុមហ៊ុន LG Display ។
វាគឺជាលើកទី 1 ហើយដែលក្រុមហ៊ុនបច្ចេកវិទ្យាយក្សរបស់ប្រទេសកូរ៉េខាងត្បូងមួយនេះ ប្រើប្រាស់នូវបន្ទះអេក្រង់ ដែលផលិតដោយរោងចក្រផ្សេងនោះ។ ក្រុមហ៊ុន Samsung ក៏បានបង្កើតនូវបន្ទះ អេក្រង់ផ្ទាល់ខ្លួនផងដែរ គ្រាន់តែនៅខណៈពេលនេះក្រុមហ៊ុនកំពុងតែផ្តោតទៅលើបច្ចេកវិទ្យាថ្មី QLED ។ គួរបញ្ជាក់ផងដែរថា ការកែប្រែទៅលើរោងចក្រនៃក្រុមហ៊ុន Sharp បានធ្វើឱ្យក្រុមហ៊ុននេះ ត្រូវកាត់ផ្តាច់នូវការផ្គត់ផ្គង់ទាំងស្រុងសម្រាប់ក្រុមហ៊ុន Samsung ៕
