ខណៈពេលដែលមនុស្សគ្រប់គ្នាកំពុងតែនិយាយអំពីស្មាតហ្វូនស៊េរីថ្មី Samsung Galaxy S8 ស៊េរីថ្មី និង Samsung Galaxy S8+ វត្តមានរបស់ថេប្លេត Samsung Galaxy Tab S3 ក៏នឹងចាប់ផ្តើមបង្ហាញវត្តមាននាពេលឆាប់ៗនេះខាងមុខដែរ។ ស្មាតហ្វូនស៊េរីថ្មីត្រកូល Galaxy S នឹងមិនទាន់ប្រកាសបង្ហាញវត្តមាននោះទេនៅក្នុងព្រឹត្តិការណ៍តាំងពិពរណ៍ MWC នៅក្នុងទីក្រុងបាសេឡូណា។ ក្រុមហ៊ុន Samsung បានផ្ញើរនូវលិខិតអញ្ជើញសម្រាប់ព្រឹត្តិការណ៍ថ្ងៃទី 26 ខែកុម្ភៈជាមួយនឹងការបង្ហាញនូវវត្តមានរបស់ថេប្លេតស៊េរីថ្មី Galaxy Tab S3 ដែលមានលក្ខណៈពិសេសថ្មីៗគួរឱ្យចាប់អារម្មណ៍ខ្លាំងដែរ។ នៅដើមសប្តាហ៍នេះ រូបភាព Renders ថ្មីមួយបានបង្ហាញនូវថេប្លេត Galaxy Tab S3 ដែលប្រើប្រាស់នូវក្តារចុចម៉ាញ៉េទិច (Keyboard Magnetic) ប្រភេទ QWERTY ដែលអាចដកចេញបានយ៉ាងងាយស្រួលនេះបើតាមការបញ្ជាក់របស់គណនី Evan Blass ។ នៅលើថេប្លេតនេះគេសង្កេតឃើញថានឹងប្រើប្រាស់ភ្ជាប់ជាមួយនឹងប៊ិក S Pen ថែមទៀតផង។
ថេប្លេត Samsung Galaxy Tab S3 នឹងមានអេក្រង់ទំហំ 9.6 អ៊ីងប្រភេទ AMOLED ជាមួយនឹងកម្រិតភាពច្បាស់ 1536 x 2048 ភិចសែល។ លើសពីនេះទៀត ថេប្លេតនេះនឹងភ្ជាប់ជាមួយនឹងបន្ទះឈីប Snapdragon 820 ដែលមាន CPU Quad-Core ក្រាហ្វិកកាតប្រភេទ Adreno 530 GPU រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 32GB/128GB កាមេរ៉ាខាងក្រោយទំហំ 12 មេហ្គាភិចសែល និងកាមេរ៉ាខាងមុខទំហំ 5 មេហ្គាភិចសែលដែលងាយស្រួលក្នុងការថតរូប Selfies និងវីដេអូខល។ ថេប្លេតនេះនឹងមាន 2 ជម្រើសសម្រាប់ធ្វើការជ្រើសរើសគឺប្រើប្រាស់ប្រព័ន្ធ Wi-Fi និង 4G LTE Connectivity ៕