លោក Jeff Bezos ដែលជាអគ្គនាយករបស់ក្រុមហ៊ុន Amazon បានទម្លាយឱ្យដឹងនៅចុងឆ្នាំ 2013 នៅក្នុងកម្មវិធី 60 Minutes ថា ក្រុមហ៊ុនរបស់គាត់កំពុងតែអភិវឌ្ឍយ៉ាងសកម្មទៅលើការចែកចាយតាមរយៈយន្តហោះដែលគ្មានមនុស្សបើក (Drone) ។ ប៉ុន្មានថ្ងៃក្រោយមក ក្រុមហ៊ុន UPS បានបញ្ជាក់ថា ក្រុមហ៊ុនខ្លួននឹងដោះស្រាយទៅលើបញ្ហានេះផងដែរ។ នៅក្នុងរយៈពេលជាង 3 ឆ្នាំនេះ ក្រុមហ៊ុនទាំងពីរបានបោះជំហានយ៉ាងខ្លាំងនៅក្នុងទីផ្សារបច្ចេកវិទ្យាថ្មីនេះដែលក្រុមហ៊ុន Amazon បានបង្កើតនូវយន្តហោះ Prime Air Drone សម្រាប់ចែកចាយទំនិញដែលបានដាក់ឱ្យដំណើរការជាច្រើនខែកន្លងមកហើយ។ ពេលនេះ យើងអាចនិយាយបានថា ដំណោះស្រាយនៃការចែកចាយទំនិញតាមរយៈយន្តហោះ Drone ពិតជាទទួលបានជោគជ័យហើយ។
ក្រោមការសហការគ្នាជាមួយនឹងក្រុមហ៊ុន Workhorse Group ដែលផ្តោតទៅលើការអភិវឌ្ឍនូវរថយន្តប្រើប្រាស់អគ្គីសនី និងយន្តហោះ Drone ក្រុមហ៊ុន UPS បានបញ្ជាក់ថា ក្រុមហ៊ុនបានប្រើប្រាស់នូវរថយន្ត Workhorse HorseFly UAV ដើម្បីតេស្តទៅលើការប្រើប្រាស់យន្តហោះ Drone ក្នុងការចែកចាយទំនិញ ខណៈពេលដែលអ្នកបើករថយន្ត UPS នេះបន្តរដំណើរតាមផ្លូវដើម្បីចែកចាយនូវទំនិញរបស់ពួកគេតាមរយៈ Drone ដែលចេញពីរថយន្តនេះ។
យន្តហោះ Drone នេះស្ថិតនៅលើដំបូលនៃរថយន្តដែលលោកអ្នកអាចភ្ជាប់ឥវ៉ាន់ជាមួយនឹងយន្តហោះ Drone នេះជាមុនសិនមុននឹងចាប់ផ្តើមការដឹកជញ្ជូន។ យន្តហោះ Drone នេះអាចហោះហើរបាននៅក្នុងរយៈពេល 30 នាទីនៅក្នុងល្បឿន 45 ម៉ាយ៍ក្នុងមួយម៉ោងនិងអាចទ្រទ្រង់នូវទំនិញទម្ងន់ដល់ទៅ 10 ផោនហើយវាអាចធ្វើការសាកបញ្ចូលថ្មបានដោយខ្លួនឯងនៅពេលដែលស្ថិតនៅលើដំបូលរបស់រថយន្ត UPS នេះ។ នៅក្នុងការសាកល្បងនេះ យន្តហោះ Drone នេះអាចធ្វើការដឹកទំនិញទៅកាន់គោលដៅបានតាមរយៈការកំណត់របស់អ្នកបើកបររថយន្ត UPS នៅលើកម្មវិធីរបស់វា។ បញ្ហាតិចតួចដែលគួរឱ្យព្រួយបារម្ភផងដែរនោះគឺថា យន្តហោះ Drone នេះនៅមិនទាន់ដំណើរបានល្អឥតខ្ចោះនៅឡើយទេដូចជាពាក់ព័ន្ធជាមួយនឹងត្រីវិស័យ និងការចាប់ផ្តើមហោះហើរ ពិសេសវាអាចនឹងហោះបុកនៅត្រង់កន្លែងចុះចតនៅលើដំបូលនៃរថយន្ត UPS ដែលកំពុងតែបិទដោយគម្របនោះ៕