នៅក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនផលិតនូវស្មាតហ្វូនជាច្រើនចូលចិត្តបង្កើតនូវទម្លាប់មួយក្នុងការផ្សាយបន្តផ្ទាល់នូវការប្រកាសបង្ហាញនូវផលិតផលបច្ចេកវិទ្យាថ្មីរបស់ពួកគេ ទៅកាន់ពិភពលោកទាំងមូលឱ្យបានដឹង។ ដូចនេះ វាហាក់ដូចជាគ្មានអ្វីដែលគួរឱ្យភ្ញាក់ផ្អើលនោះទេដែលថា ក្រុមហ៊ុនបច្ចេកវិទ្យា LG នឹងធ្វើការផ្សាយបន្តផ្ទាល់នៃការប្រកាសបង្ហាញវត្តមានរបស់ស្មាតហ្វូន LG G6 នៅចុងសប្តាហ៍នេះ។ ដូចអ្វីដែលបានបញ្ជាក់កាលពីលើកមុននេះ ស្មាតហ្វូន LG G6 នឹងបង្ហាញខ្លួនជាផ្លូវការនៅថ្ងៃទី 26 ខែកុម្ភៈ នៅក្នុងព្រឹត្តិការណ៍តាំងពិពរណ៍ MWC 2017 នៅក្នុងទីក្រុងបាសេឡូណា នៃប្រទេសអេស្ប៉ាញ។
ដើម្បីអាចធ្វើការទស្សនានៅការផ្សាយផ្ទាល់របស់ស្មាតហ្វូនស៊េរីថ្មី LG G6 បានអ្វីដែលលោកអ្នកត្រូវការនៅលើ Browser របស់អ្នកគឺតំណរនៅលើ YouTube មួយនេះ www.youtube.com/watch?v=aoPrW_bbSK8 ដែលនឹងធ្វើការផ្សាយផ្ទាល់នៅថ្ងៃអាទិត្យ។ ព្រឹត្តិការណ៍នេះនឹងចាប់ផ្តើមនៅវេលាម៉ោង 12 p.m ដែលមានន័យថាប្រសិនបើលោកអ្នករស់នៅក្នុងទឹកដីសហរដ្ឋអាមេរិច លោកអ្នកប្រហែលជាត្រូវក្រោកលឿនបន្តិចដើម្បីអាចមើលការផ្សាយផ្ទាល់នេះបាន។
ខាងក្រោមនេះជាតារាងនៃពេលវេលាដែលលោកអ្នកអាចធ្វើការទស្សនា៖
6 a.m. ET (Eastern Time)
5 a.m. CT (Central Time)
4 a.m. MT (Mountain Time)
3 a.m. PT (Pacific Time)
អ្វីដែលកាន់តែគួរឱ្យចាប់អារម្មណ៍ទៀតនោះ វាមានការបែកធ្លាយនូវលក្ខណៈសម្បត្តិ និងរូបរាង Renders ជាច្រើនរបស់ស្មាតហ្វូន LG G6 ។ ស្មាតហ្វូននេះត្រូវបានគេដឹងថានឹងប្រើប្រាស់នូវទំហំអេក្រង់ 5.7 អ៊ីងជាមួយនឹងកម្រិតភាពច្បាស់ 1440 x 2880 ភិចសែលហើយវាមានគែមកោងថែមទៀត។ LG G6 នឹងប្រើប្រាស់នូវមុខងារមិនជ្រាបទឹក ការពង្រឹងទៅលើកាមេរ៉ាមុខ និងកាមេរ៉ាខាងក្រោយ បន្ទះឈីប Snapdragon 821 ថាមពលថ្មកម្លាំង 3200mAh និងប្រព័ន្ធប្រតិបត្តិការ Android Nougat ដែលដំណើរការជាមួយនឹង LG UX 6.0 ថែមទៀតផង។ ស្មាតហ្វូនស៊េរីថ្មីនេះគ្រោងដាក់លក់នៅក្នុងប្រទេសកូរ៉េខាងត្បូង និងទីផ្សារជាច្រើនទៀតនៅក្នុងខែមីនា ហើយគ្រោងនឹងដាក់លក់នៅទីផ្សារអាមេរិចមុនខែមេសាផងដែរ៕