កាលពីឆ្នាំ 2016 យើងឃើញថាមានស្មាតហ្វូនស៊េរីថ្មីៗ និងទំនើបៗជាច្រើនស៊េរីបានចេញខ្លួនបង្អួតរាងប្រគូតប្រជែងគ្នាលើទីផ្សារ។ ក៏ប៉ុន្តែស្មាតហ្វូនដែលទាក់ទាញក្រសែភ្នែកអ្នកប្រើប្រាស់ និងបង្កឲ្យមានភាពភ្ញាក់ផ្អើលខ្លាំងក្លាបំផុត ក្នុងចំនោមស្មាតហ្វូនទាំងនោះគឺ Xiaomi Mi Mix ដែលជាស្មាតហ្វូនដំបូងបំផុតលើលោកដែលមានផ្ទៃកញ្ចក់អេក្រង់បង្ហាញស្ទើរពេញអេក្រង់ទាំងមូលតែម្តងគឺមានកម្រិត 91.3% នៃផ្ទៃអេក្រង់សរុប។ ហើយថ្មីៗនេះមានព័ត៌មានចចាមអារាមបានបង្ហើបថា ក្រុមហ៊ុនផលិតស្មាតហ្វូន Xiaomi បានត្រៀមបញ្ចេញជំនាន់ទីពីរនៃស្មាតហ្វូនអេក្រង់យក្សមួយនេះក្នុងពេលឆាប់ៗនេះ។
ហើយអ្វីដែលកាន់តែអស្ចារ្យបំផុតសម្រាប់ព័ត៌មានដែលបានបែកធ្លាយនេះគឺថា Xiaomi នឹងបង្កើនទំហំផ្ទៃបង្ហាញរូបភាពនៅលើ Mi Mix 2 ឲ្យកាន់តែធំជាងជំនាន់មុនគឺឡើងរហូតដល់ទៅ 93% និងមានគែមអេក្រង់កាន់តែរួមតូចស្តើងជាងមុខទៀតផង( bezels less)។ គេមិនទាន់ដឹងថាតើ Xiaomi នឹងកែប្រែបន្ថែមលើចំនុចអ្វីខ្លះទៀតទេក្រៅតែពីការពង្រីកទំហំផ្ទៃអេក្រង់បង្ហាញនៅលើ Mi Mix 2 ដូច្នេះមានតែរងចាំការប្រកាសចេញជាផ្លូវការណ៍នៅថ្ងៃខែណាមួយក្នុងឆ្នាំ 2017 នេះតែប៉ុណ្ណោះ។
យើងសង្កេតឃើញថាក្នុងរយះពេលប៉ុន្មានឆ្នាំចុងក្រោយនេះក្រុមហ៊ុនអ្នកផលិតទូរស័ព្ទស្មាតហ្វូនល្បីៗក្នុងពិភពលោកបានខិតខំប្រឹងប្រែធ្វើការវិវត្តន៍កែប្រែពង្រីកទំហំអេក្រង់នៅលើស្មាតហ្វូនរបស់ខ្លួនឲ្យកាន់តែធំតាមដែលអាចធ្វើទៅបានដើម្បីប្រគូតដណ្តើមទីផ្សារនៃអ្នកប្រើប្រាស់ក្នុងនោះក្រុមហ៊ុន Apple បានពង្រីកទំហំកញ្ចក់អេក្រង់លើ iPhone រហូតដល់ទៅ 5.5 អ៊ីងនៅលើ iPhone Plus Series ហើយថ្មីៗនេះ LG ក៏បានប្រកាសចេញកំពូលស្មាតហ្វូន LG G6 ដែលមានកញ្ចក់អេក្រង់ប្រភេទ FullVision Display ជាមួយកម្រិត aspect ratio 18:9 ហើយក្រុមហ៊ុន Samsung ក៏ត្រូវបានលេចលឺព័ត៌មានដែរថានឹងប្រកាសចេញកំពូលស្មាតហ្វូនជំនាន់ថ្មី Galaxy S8+ ដែលបានកញ្ចក់អេក្រង់ធំរហូតដល់ទៅ 6.2 អ៊ីងក្នុងពេលឆាប់ៗនេះផងដែរ៕
