Samsung Galaxy S8 និងGalaxy S8 Plus កំពុងតែក្លាយជាស្មាតហ្វូន 2 ស៊េរីម៉ូដែល ទទួលការចាប់អារម្មណ៍ខ្លាំងបំផុតសម្រាប់ឆ្នាំនេះ។ ស្មាតហ្វូនស៊េរីថ្មីទាំង 2 ម៉ូដែលនេះក៏ត្រូវបាន FCC ទម្លាយនូវព័ត៌មានដ៏គួរឱ្យចាប់អារម្មណ៍មួយចំនួនសម្រាប់លោកអ្នកដែរ។ FCC ទម្លាយថា លេខកូដរបស់ស្មាតហ្វូន Galaxy S8 គឺ SM-G950U ចំនែកលេខកូដរបស់ស្មាតហ្វូន Galaxy S8 Plus គឺ SM-G955U ។ តួអក្សរ U មានន័យថាស្មាតហ្វូនទាំងពីរនេះ ជាប្រភេទ Unlocked ។ អ្វីដែលគួរឱ្យចាប់អារម្មណ៍ទៀតនោះ ស្មាតហ្វូន Galaxy S8 និង Galaxy S8 Plus នឹងទ្រទ្រង់នូវប្រព័ន្ធ GSM, CDMA និង LTE Bands ដែលមានន័យថាស្មាតហ្វូននេះ អាចដំណើរការបាននៅគ្រប់ក្រុមហ៊ុនចែកចាយនៅអាមេរិច។
ពាក់ព័ន្ធជាមួយនឹងព័ត៌មានរបស់ស្មាតហ្វូន Galaxy S8 សារព័ត៌មាន The Korean Economic Daily រាយការណ៍ថា ស្មាតហ្វូនស៊េរីថ្មីរបស់ក្រុមហ៊ុន Samsung នឹងបំពាក់ប្រព័ន្ធស្កែនមុខ (Facial Recognition) ជាមួយនឹងប្រព័ន្ធស្កែនប្រស្រីភ្នែក (Iris Scanner) ថែមទៀត។ ការបំពាក់នូវប្រព័ន្ធទាំង 2 នេះ ដោយសារតែក្រុមហ៊ុន Samsung ចង់ពង្រឹងទៅលើល្បឿន និងការផ្ទៀងផ្ទាត់កាន់តែត្រឹមត្រូវទៅលើផ្នែក Biometric Authentication ។ បច្ចេកវិទ្យាស្កែនមុខ (Facial Recognition) ពិតជាលឿន និងអាចធ្វើការដោះសោរស្មាតហ្វូនតិចជាង 0.01 វិនាទី។
ស្មាតហ្វូន Galaxy S8 និង S8 Plus នឹងប្រកាសបង្ហាញវត្តមានជាផ្លូវការនៅថ្ងៃទី 29 ខែមីនាខាងមុខនេះ។ លោកអ្នកប្រហែលជា បានឃើញរួចមកហើយនូវរូបភាពបែកធ្លាយជាច្រើនរួមទាំងវីដេអូមួយចំនួនផងដែរ របស់ស្មាតហ្វូនទាំងពីរស៊េរីនេះ។ ពេលនេះ ស្មាតហ្វូនទាំងពីរនេះ ពិតជាធ្វើឱ្យកក្រើកទីផ្សារស្មាតហ្វូនទៀតហើយ។
ស្មាតហ្វូន Galaxy S8 និង Galaxy S8 Plus នឹងមានអេក្រង់គែមកោង ស៊ុមព័ទ្ធអេក្រង់កាន់តែតូច ហើយភ្ជាប់ជាមួយជំនួយការឌីជីថលឆ្លាតវៃ Bixby ទៀត។ ប៉ុន្តែតម្លៃរបស់វាគឺថ្លៃជាងស្មាតហ្វូនជំនាន់មុន។ តាមរបាយការណ៍មួយចំនួនបញ្ជាក់ថា តម្លៃលក់របស់ Galaxy S8 គឺ 799 អ៊ឺរ៉ូ ចំនែក Galaxy S8 Plus គឺ 899 អ៊ឺរ៉ូ៕