បញ្ហាដែលកើតឡើងនៅលើប្រព័ន្ធស្កែនក្រយ៉ៅដៃ (Fingerprint Reader) បានក្លាយជាបញ្ហាធំមួយនៅក្នុងបញ្ហាជាច្រើនដែលធ្វើឱ្យអ្នកគាំទ្ររបស់ក្រុមហ៊ុន Sony មានការខកចិត្តខ្លាំង។ ប្រសិនបើលោកអ្នកទើបតែបានដឹងអំពីរឿងនេះ នៅពេលនេះទេនោះ យើងអាចបញ្ហាក់បានថា បញ្ហារបស់វា បានកើតឡើងនៅលើត្រកូលស្មាតហ្វូន Xperia Z5 និងស្មាតហ្វូនមួយចំនួនទៀត ដែលប្រើប្រាស់នូវប្រព័ន្ធស្កែនក្រយ៉ៅដៃ ដែលបង្កប់នៅពីក្រោមប៊ូតុង Power ។ ទោះជាយ៉ាងណាក៏ដោយ ស្មាតហ្វូនទាំងអស់នេះប្រហែលជាត្រូវបិទចោលនូវមុខងារស្កែនក្រយ៉ៅដៃនៅក្នុងទីផ្សាររបស់សហរដ្ឋអាមេរិច។
ពេលនេះ ស្មាតហ្វូនស៊េរីថ្មី XZ Premium និង XZs ក៏ស្ថិតនៅក្នុងក្រុមដូចគ្នានេះដែរ ហើយវាត្រូវបានគេដឹងថា នឹងលុបចេញនូវប្រព័ន្ធសុវត្ថិភាពនេះ នៅក្នុងទីផ្សារនៃសហរដ្ឋអាមេរិចផងដែរ។ នៅពេលដែលមានការសាកសួរអំពីបញ្ហានេះ ក្រុមហ៊ុនបច្ចេកវិទ្យាយក្សរបស់ប្រទេសជប៉ុននេះ បានសរសេរបញ្ជាក់ថា ការបិទនូវមុខងារនេះដោយសារតែកង្វះខាតនៃការចាប់អារម្មណ៍ក្នុងការប្រើប្រាស់នូវមុខងារនេះ អាស្រ័យទៅតាមតំបន់។ វាមានកត្តាជាច្រើនពីខាងក្រៅ និងខាងក្នុងដែលធ្វើឱ្យក្រុមហ៊ុនបច្ចេកវិទ្យា Sony សម្រេចចិត្តក្នុងការបិទនូវមុខងារស្កែនក្រយ៉ៅដៃ Fingerprint នេះ។
ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនបច្ចេកវិទ្យា Sony ហាក់ដូចជាមានទំនាក់ទំនងមិនសូវល្អជាមួយនឹងក្រុមហ៊ុនចែកចាយធំៗនៅសហរដ្ឋអាមេរិច។ នៅក្នុងនេះវាមានការផ្លាស់ប្តូរយឺតនៅក្នុងដំណើរការនៃការបញ្ចេញស្មាតហ្វូនម៉ូដែលថ្មី ហើយក្រុមហ៊ុនក៏បើកឱ្យមានការលក់ស៊ីម SIM សម្រាប់ទូរស័ព្ទនេះដែលជាបញ្ហាសម្រាប់ក្រុមហ៊ុន និងអ្នកចែកចាយ។
នៅក្នុងអំឡុងពេលនៃការផ្លាស់ប្តូរនេះ កុងត្រាជាច្រើន ដែលធ្លាប់បានចុះហត្ថលេខាកាលពីពេលមុននោះ ហាក់ដូចជាមានការប្រឆាំងពីក្រុមហ៊ុនចែកចាយជាច្រើនវិញ។ ហេតុផលមួយទៀតនៅក្នុងរឿងនេះនោះគឺថា ក្រុមហ៊ុនបច្ចេកវិទ្យាយក្ស Sony គឺស្ថិតនៅក្រោមការសន្យា ដែលមិនដាក់លក់នូវស្មាតហ្វូនដែលប្រើប្រាស់ប្រព័ន្ធស្កែនក្រយ៉ៅដៃនៅក្នុងទឹកដីសហរដ្ឋអាមេរិច ពីព្រោះ ក្រុមហ៊ុនបានផ្តល់នូវស្មាតហ្វូន ដែលអាចប្រើប្រាស់នូវប្រព័ន្ធស្កែនក្រយ៉ៅដៃនេះ បានសម្រាប់ក្រុមហ៊ុនចែកចាយផ្តាច់មុខរបស់ខ្លួនតែប៉ុណ្ណោះ៕