ព័ត៌មានចុងក្រោយបំផុតបានចុះផ្សាយឲ្យដឹងថា “Samsung Galaxy S8 និង S8+ នឹងធ្វើការប្រកាសចេញនៅថ្ងៃទី 29 ខែមិនា ហើយការប្រកាសចេញលក់គឺនឹងធ្វើឡើងនៅថ្ងៃទី 21 ខែមេសា 2017”។ រួចបើយោងទៅលើព័ត៌មានលេចលឺចេញពីប្រទេសកូរ៉េខាងត្បូងឯណោះវិញ បានបញ្ជាក់ថា “Samsung នឹងដាក់ឲ្យធ្វើការបញ្ជាទិញស្មាតហ្វូនជំនាន់ថ្មីទាំងពីរស៊េរីនេះ នៅថ្ងៃទី 10 ខែមេសា 2017”។
នៅក្នុងឆ្នាំនេះ ក្រុមហ៊ុន Samsung បានធ្វើការពន្យាពេលក្នុងការប្រកាសចេញស្មាតហ្វូនជំនាន់ថ្មីរបស់ខ្លួនដោយមានព័ត៌មានចចាមអារាមមួយចំនួនបានចុះផ្សាយការថា ការពន្យាពេញប្រកាសចេញ Galaxy S8/S8+ ក៏ដោយសារតែ Samsung រងចាំការប្រកាសចេញជាផ្លូវការណ៍នៃបន្ទះឈីបជំនាន់ថ្មីរបស់ Qualcomm គឺ Snapdragon 835 ដើម្បីបានប្រើប្រាស់បន្ទះឈីបនេះ នៅលើស្មាតហ្វូនរបស់ខ្លួន និងមួយទៀតក្រុមហ៊ុនទទួលបានបទពិសោធន៍ដ៏ជូរចត់ជាមួយ Galaxy Note 7 ដែលមានបញ្ហាផ្ទុះថ្មដូចនេះ Samsung ត្រូវធ្វើឲ្យប្រាកដថាជំនាន់ Galaxy S8 ត្រូវតែមានគុណភាព និងសុវត្ថិភាពខ្ពស់បំផុតមុននឹងបញ្ចេញទៅដល់ដៃរបស់អតិថិជនរបស់ខ្លួនប្រើប្រាស់។
ទន្ធឹមនេះក៏មានរបាយការណ៍ចុងក្រោយមួយទៀតបានធ្វើការចុះផ្សាយពីគុណសម្បត្តិមួយចំនួននៃស្មាតហ្វូនត្រកូល “S” ចុងក្រោយនេះផងដែរ។ ដោយក្នុងរបាយការណ៍ចុងក្រោយនេះបានឲ្យដឹងថា “Galaxy S8 បំពាក់ដោយកញ្ចក់អេក្រង់ Super AMOLED ទំហំ 5.8 អ៊ីងជាមួយកម្រិតបង្ហាញ 1440 x 2560 ភិចសែល, កាមេរ៉ាថតរូបមុខក្រោយទំហំ 12MP/8MP, មានថ្មកំលាំង 3,000mAh និងមានរ៉េមទំហំ 4GB ជាមួយទំហំផ្ទុក 64GB។ ហើយសម្រាប់ទីផ្សារសហរដ្ឋអាមេរិកពួកវានឹងប្រើប្រាស់បន្ទះឈីប Qualcomm Snapdragon 835 ដែលមានស៊ីភីយូ octa-core និងប្រើក្រាហ្វិក Adreno 540។
ចំពោះម៉ូដែល Galaxy S8+ វិញគឺមានគុណសម្បត្តិដូចគ្នាទៅនឹង Galaxy S8 ដែរ ប៉ុន្តែខុសត្រង់ S8+ មានទំហំអេក្រង់ធំរហូតដល់ទៅ 6.2 អ៊ីង និងថ្មធំកំលាំង 3.500mAh។ ប្រភពដដែលនេះបន្ថែមទៀតថា “បងប្អូនរួមជំនាន់ទាំងពីរនេះនៅមានប្រើប្រាស់រន្ធដោត USB-C, រន្ធដោតកាស 3.5mm Jack, ប្រព័ន្ធការពារជ្រាបទឹក និងធូលី “IP68 Certificate”, ប្រព័ន្ធដោះសោរទូរស័ព្ទដោយប្រើក្រយ៉ៅម្រាមដៃ “Fingerprint Sensor” និងដោយប្រស្រីភ្នែក “iris scanner” ថែមទៀតផង”៕
