ក្រុមហ៊ុន Samsung រំពឹងថា នឹងចាប់ផ្តើមដំណើរការជំនួយការឆ្លាតវៃ AI Assistant របស់ខ្លួនសម្រាប់ស្មាតហ្វូនស៊េរីថ្មី Galaxy S8 ប៉ុន្តែឈ្មោះហៅរបស់វាស្ថិតនៅក្នុងការជជែកពិភាក្សានៅឡើយ។ ពេលនេះ គេហទំព័រ Samsung របស់ប្រទេសអ៊ីតាលី បង្ហាញយ៉ាងច្បាស់ថាជំនួយការឆ្លាតវៃថ្មីរបស់ក្រុមហ៊ុនមានឈ្មោះថា Bixby ។ ជំនួយការឆ្លាតវៃរបស់ក្រុមហ៊ុន Samsung សម្រាប់ស្មាតហ្វូន Galaxy S8 ធ្លាប់មានឈ្មោះហៅជាច្រើនដូចជា Viv, Bixby និង Kestra ។ នៅលើគេហទំព័រ Samsung របស់ប្រទេសអ៊ីតាលី វាបង្ហាញនូវឈ្មោះថា Bixby ដែលជាជំនួយការឆ្លាតវៃជាសំឡេង នេះបើយោងតាម TechRadar ។
គេហទំព័រនេះ មិនទាន់បញ្ជាក់អំពីមុខងារជាក់លាក់ណាមួយដែលជំនួយការ Bixby នេះអាចធ្វើបាននោះទេ។ អ្នកប្រើប្រាស់អាចធ្វើការគ្រប់គ្រងនូវប្រតិបត្តិការជាច្រើននៅលើស្មាតហ្វូន Galaxy S8 តាមរយៈការប្រើប្រាស់ជំនួយការឆ្លាតវៃជាសំឡេង Bixby នេះបើយោងតាម Ubergizmo ។ បន្ថែមពីនេះទៀត វាអាចចាក់បទចម្រៀងជាច្រើនចេញពី Playlist ហើយលោកអ្នកអាចស្វែងរកស្រាវជ្រាវនៅលើអ៊ីនធើណិតបានដោយប្រើប្រាស់ S Voice ។
បើទោះបីជាវាមានព័ត៌មានអំពីជំនួយការឆ្លាតវៃនេះ ជាច្រើនក្តី វាហាក់ដូចជា Bixby Voice Assistant នេះ ពិតជាមានអនុភាពខ្លាំងក្លាណាស់។ Bixby Voice Assistant នឹងក្លាយជាដៃគូប្រកួតប្រជែងដ៏ធំជាមួយនឹងជំនួយការ Siri របស់ក្រុមហ៊ុន Apple និង Google Assistant ។ ផ្អែកទៅលើពាក្យចចាមអារ៉ាមជាច្រើនកាលពីពេលមុននេះ ជំនួយការឆ្លាតវៃ Bixby Assistant របស់ក្រុមហ៊ុន Samsung អាចទ្រទ្រង់បានដល់ទៅ 8 ភាសាផ្សេងគ្នានៅពេលដែលវាដាក់ឱ្យប្រើប្រាស់។ Bixby ត្រូវគេនិយាយថា អាចធ្វើការស្វែងរក (Search) នៅលើអក្សរលើរូបភាពបានថែមទៀតផង។ ឧទាហរណ៍មួយគឺថា អ្នកប្រើប្រាស់អាចបញ្ជាទៅកាន់ជំនួយការ Bixby ឱ្យបើកប្រព័ន្ធកាមេរ៉ា។ វាអាចធ្វើការស្កែន និងស្គាល់ផលិតផលមួយដែលអ្នកប្រើប្រាស់អាចទិញបានតាមរយៈ Samsung Pay Mini នេះ បើយោងតាម Android Headlines ។ ជំនួយការឆ្លាតវៃ Bixby Voice Assistant នឹងក្លាយជាកម្មវិធីស្នូលសម្រាប់ប្រើប្រាស់នៅលើស្មាតហ្វូន Galaxy S8 និង Galaxy S8 Plus ៕
