ការបង្ហោះថ្មីមួយទៀតចេញពីគណនីដ៏ល្បីល្បាញ Evan Blass ទម្លាយថា រូបភាព Renders របស់ស្មាតហ្វូនស៊េរីថ្មី Samsung Galaxy S8 និង Samsung Galaxy S8+ មាន 3 ពណ៌ស្រស់ស្អាត និងទាក់ទាញបំផុត។ ពណ៌ថ្មីទាំង 3 នេះ គឺ Black Sky, Orchid Grey និង Arctic Silver ។ ក្រុមហ៊ុនបច្ចេកវិទ្យា Samsung នឹងសម្ពោធស្មាតហ្វូនស៊េរីថ្មីរបស់ខ្លួននៅក្នុងព្រឹត្តិការណ៍ Unpacked Event ជាមួយនឹងពណ៌យ៉ាងស្រស់ស្អាតជាច្រើននៅថ្ងៃទី 29 ខែមីនាខាងមុខនេះ។ ស្មាតហ្វូន Galaxy S8 និង Galaxy S8+ ត្រូវគេរំពឹងថា នឹងដាក់លក់ជាផ្លូវការនៅថ្ងៃទី 28 ខែមេសាខាងមុខនេះ។
UPDATE: គណនី Blass បង្ហោះនូវសារជាលើកទី 2 អំពីតម្លៃរបស់ស្មាតហ្វូនស៊េរីថ្មី Samsung Galaxy S8 និង Galaxy S8+ គិតជាអ៊ឺរ៉ូ ។ យោងទៅតាមគណនី Blass ស្មាតហ្វូន Galaxy S8 នឹងមានតម្លៃ 799 អ៊ឺរ៉ូ (859 ដុល្លារ) ចំនែកស្មាតហ្វូន Galaxy S8+ នឹងមានតម្លៃ 899 អ៊ឺរ៉ូ (967 ដុល្លារ) ។
ពាក្យចចាមអារ៉ាមចុងក្រោយអំពីលក្ខណៈសម្បត្តិនៃស្មាតហ្វូន Samsung Galaxy S8 បានឱ្យដឹងថា វានឹងប្រើប្រាស់អេក្រង់ទំហំ 5.8 អ៊ីង Super AMOLED កម្រិតភាពច្បាស់ 1440x2960ភិសែល ។ ស្មាតហ្វូននេះ ប្រើប្រាស់បន្ទះឈីប Exynos 8895 ឬ Snapdragon 835 (Octa-core) រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 64GB រន្ធដោយ microSD កាតទំហំ 256GB កាមេរ៉ាខាងក្រោយទំហំ 12MP ភ្ជាប់ជាមួយនឹងមុខងារ f/1.7 Aperture, PDAF Laser Focus និង OIS ។ ចំនែកកាមេរ៉ាខាងមុខរបស់ស្មាតហ្វូននេះវិញមានទំហំ 8MP ងាយស្រួលក្នុងការថតរូប Selfie និងវីដេអូខលដោយភ្ជាប់ជាមួយនឹងមុខងារ Aperture f/1.7 ។ អ្វីដែលកាន់តែពិសេសនោះគឺថា ស្មាតហ្វូនស៊េរីថ្មីនេះនឹងមានថាមពលថ្មកម្លាំង 3000mAh និងប្រព័ន្ធប្រតិបត្តិការ Android 7.1 ។
ស្មាតហ្វូន Galaxy S8+ ក៏បំពាក់នូវលក្ខណៈសម្បត្តិដូចគ្នាដែរគ្រាន់តែអេក្រង់របស់វាមានទំហំ 6.2 អ៊ីង និងថាមពលថ្មកម្លាំង 3500mAh ។ ស្មាតហ្វូនស៊េរីថ្មីទាំងពីរនេះនឹងភ្ជាប់ជាមួយនឹងប្រព័ន្ធស្កែនក្រយ៉ៅដៃ ប្រព័ន្ធស្កែនប្រស្រីភ្នែក ហើយពេលនេះវាមានដំណឹងថ្មីមកថាស្មាតហ្វូនទាំងនេះនឹងប្រើប្រាស់ប្រព័ន្ធស្កែនមុខ (Facial Recognition) ដើម្បីដោះសោរ និងផ្ទៀងផ្ទាត់អត្តសញ្ញាណ៕