កាលពីដើមឆ្នាំ 2017 ក្នុងព្រឹត្តិការណ៍ CES ក្រុមហ៊ុន Asus បានប្រកាសចេញកុំព្យូទ័រយូរដៃស៊េរីថ្មីម៉ូដែល Asus Zenbook 3 Deluxe ដើម្បីធ្វើការប្រគូតប្រជែងជាមួយកុំព្យូទ័រ Macbook ស៊េរី 2016 របស់ Apple, Yoga 900s របស់ Lenovo និង EliteBook Folio G1 របស់ HP ហើយវាក៏ទទួលបានការចាប់អារម្មណ៍ច្រើនផងដែរពីសំណាក់អ្នកដែលបានចូលរួមទស្សនាក្នុងព្រឹត្តិការណ៍នោះ។ ដោយឡែកក្នុងពេលថ្មីៗនេះ Asus ក៏បានប្រកាសចេញកុំព្យូទ័រស៊េរីថ្មីមួយម៉ូដែលបន្ថែមទៀតគឺ Asus ZenBook UX305 ដើម្បីបំពេញតម្រូវការទីផ្សារអ្នកប្រើប្រាស់ដែលចង់បានម៉ាស៊ីនកុំព្យូទ័រមួយដែលមានគុណភាព សមត្ថភាព ព្រមជាមួយតម្លៃសមរម្យសម្រាប់ជាវយកទៅប្រើប្រាស់ក្នុងកិច្ចការងារទូទៅប្រចាំថ្ងៃរបស់ពួកគេ។
Asus ZenBook UX305 ត្រូវបានក្រុមហ៊ុនប្រកាសចេញដាក់លក់ក្នុងតម្លៃចាប់ពី $ 699 ឡើងទៅ។ កុំព្យូទ័រយូរដៃស៊េរីថ្មីនេះ ត្រូវបានក្រុមហ៊ុនធ្វើការរចនាឡើងយ៉ាងពិសេសជាមួយតួរខ្លួនស្រោបដោយអាលុយមីញ៉ូមដ៏ប្រណីតជាមួយកម្រាស់ស្តើង ទំងន់ស្រាលត្រឹមតែ 1.17 គីឡូក្រាមតែប៉ុណ្ណោះ និងមានកញ្ចក់អេក្រង់ទំហំ 13 អ៊ីង ព្រមទាំងមានស៊ុមជុំវិញអេក្រង់យ៉ាងរឹងមាំទៀតផង។ Asus ZenBook UX305 ដំណើរការដោយ Windows 10 ប្រើស៊ីភីយូស៊េរី Intel Skylake Core M ជាមួយរ៉េមទំហំ 8GB និងបានបំពាក់មកជាមួយប្រព័ន្ធបំភាយកំដៅ Asus Cooling System ដែលជួយកាត់បន្ថយកំដៅនៅលើម៉ាស៊ីនរបស់វាទោះបីជាបើកប្រើយូរ ឬក៏ដំណើរការកម្មវិធីធំៗក្តី។
ក្រៅពីនេះ Asus ZenBook UX305 នៅមានភ្ជាប់មកនូវរន្ធដោត USB3.0, រន្ធ HDMI, microphone, រន្ធសម្រាប់ដោតជើងម៉េមូរីកាតដែលហៅថា “SD Card Reader” និងគុណសម្បត្តិមួយចំនួនទៀតដែលសមស្របតាមតម្រូវការប្រើប្រាស់ទូទៅប្រចាំថ្ងៃបាន។ Asus ZenBook UX305 គឺមានដាក់លក់ហើយនៅលើបណ្តាញលក់ទំនិញអនឡាញ Amazon ជាមួយតម្លៃប្រមាណ $699.97 ៕