ស្មាតហ្វូន Mi5 របស់ក្រុមហ៊ុនចិន Xiaomi ដែលបានប្រលែងចេញកាលពីឆ្នាំ 2016 គឺពិតជាទទួលបានទីផ្សារល្អមែនទែនព្រោះថាស្មាតហ្វូនមួយនេះមានការរចនារូបរាងល្អប្រណីត សមត្ថភាពប្រើការខ្លាំងគួរសម និងមានកាមេរ៉ាថតរូបបានច្បាស់ល្អជាមួយបច្ចេកវិទ្យាចាប់រូបភាព Sony IMX Sensor ហើយជាពិសេសតម្លៃរបស់វាក៏ធូរថ្លៃអាចទទួលយកបាន។ ហើយបើគិតមកទល់នឹងពេលនេះគឺជាងមួយឆ្នាំទៅហើយ Xiaomi នៅមិនទាន់បានបញ្ចេញជំនាន់បន្ទាប់របស់វានៅឡើយទេ ទើបតែពេលនេះមានលេចលឺព័ត៌មានមកថា Xiaomi បានត្រៀមប្រកាសចេញជំនាន់បន្ទាប់របស់ហើយគឺ Mi 6។
តាមប្រភពព័ត៌មានចេញពីប្រទេសចិន បានឲ្យដឹងថា Xiaomi អាចនឹងធ្វើការប្រកាសចេញស្មាតហ្វូនជំនាន់ថ្មីគឺ Mi6 ចំនួនពីរម៉ូដែលផ្សេងគ្នាគឺម៉ូដែលបំពាក់អេក្រង់ទំហំ 5.15 អ៊ីងដូច Mi5 និងម៉ូដែលបំពាក់អេក្រង់ទំហំ 5.7 អ៊ីង។ ហើយស្មាតហ្វូនទាំងពីរម៉ូដែលនេះគឺនឹងប្រើប្រាស់បន្ទះឈីប Snapdragon 835 ដូចគ្នា។ ចំពោះព័ត៌មានដែលគួរឲ្យចាប់អារម្មណ៍បំផុតនោះគឺថា Xiaomi នឹងធ្វើការពង្រឹងលើសមត្ថភាពកាមេរ៉ាថតរូបនៅលើជំនាន់ថ្មីនេះដោយក្រុមហ៊ុននៅតែចាប់ដៃគូសហការជាមួយក្រុមហ៊ុន Sony ក្នុងការប្រើប្រាស់ប្រព័ន្ធចាប់រូបភាពនៅលើកាមេរ៉ាស្មាតហ្វូនរបស់ខ្លួន។
ប្រភពបានឲ្យដឹងទៀតថា Xiaomi Mi6 នឹងបំពាក់កាមេរ៉ាថតរូបគុណភាពល្អបំផុតជាមួយបច្ចេកវិទ្យាចាប់រូបភាពជំនាន់ថ្មី Sony IMX400 Sensor ដែលប្រើនូវប្រព័ន្ធ 3-layer CMOS imager ដែល SONY បានប្រកាសបង្ហាញកាលពីខែមុននៅទីក្រុងបាសេឡូណា ហើយ Sensor ថ្មីនេះ SONY បានប្រើនៅលើកាមេរ៉ាស្មាតហ្វូន Sony Xperia XZ Premium និង XZs ដែលបានធ្វើបទបង្ហាញពីសមត្ថភាពចាប់រូបភាពរួចមកហើយគឺបានដល់ទៅ 960fps។
យើងមិនទាន់ដឹងច្បាស់ទេថា តើ Xiaomi Mi6 នឹងប្រើប្រាស់ Sensor ជំនាន់ថ្មីរបស់ Sony ឬក៏យ៉ាងណានោះទេ ព្រោះមានព័ត៌មានចចាមអារ៉ាមផ្សេងទៀតបានលើកឡើងថាកាមេរ៉ារបស់ Mi6 នឹងប្រើ Sensor SONY IMX386។ ដូចនេះយើងនឹងបន្តតាមដានព័ត៌មានបែកធ្លាយរបស់វាបន្តទៀតរហូតដល់ថ្ងៃវាបង្ហាញវត្តមានជាផ្លូវការណ៍។ ហើយបើតាមព័ត៌មានលេចលឺមួយចំនួនទៀតបានបង្ហើបថា Xiaomi Mi6 នឹងបង្ហាញវត្តមាននៅថ្ងៃទី 16 មេសា, 2017 ខាងមុខនេះ៕