ខណៈពេលដែលការលក់ស្មាតហ្វូន LG G6 មានចំនួនយ៉ាងច្រើនសន្ធឹកសន្ធាប់នៅថ្ងៃដាក់លក់ដំបូងនោះ ច្រើនជាងស្មាតហ្វូន Galaxy S7 Edge និង Galaxy A5 (2017) ដែលបានដាក់លក់ដូចគ្នានៅក្នុងប្រទេសកូរ៉េ ពេលនេះ ក្រុមហ៊ុន Samsung បានបង្ហាញនូវការបារម្ភពីចំណែកទីផ្សារនៅក្នុងប្រទេសកំនើតរបស់ខ្លួន ដោយបានចាប់ផ្តើមបញ្ចេញនូវវីដេអូផ្សព្វផ្សាយពាណិជ្ជកម្មសម្រាប់ស្មាតហ្វូន Galaxy S8 ដែលគ្រោងសម្ពោធជាផ្លូវការនៅរយៈពេល 2 សប្តាហ៍ខាងមុខទៀតនៅក្នុងប្រទេសនេះ។
នៅអំឡុងពេលចុងសប្តាហ៍នេះ ក្រុមហ៊ុន LG បានអួតថា ស្មាតហ្វូន LG G6 លក់បានចំនួន 30,000 គ្រឿងហើយ ចាប់តាំងពីដាក់លក់កាលពីថ្ងៃសុក្រសប្តាហ៍មុននេះនៅក្នុងប្រទេសកូរ៉េខណៈពេលដែលការកម្មង់ទិញមុនចាប់ពីថ្ងៃទី 2 ខែមីនា មកមានចំនួន 82,000 គ្រឿង។ យោងទៅតាមលោក Kim Dong-won អ្នកវិភាគរបស់ក្រុមហ៊ុន KB Securities និយាយថា “ស្មាតហ្វូន LG G6 ចំនួន 20,000 គ្រឿងលក់ដាច់នៅថ្ងៃដំបូង ដែលបំបែកកំណត់ត្រាខ្ពស់បំផុតបើធៀបជាមួយនឹងស្មាតហ្វូនជំនាន់មុនៗ។ តួរលេខនេះគឺខ្ពស់ជាងមុនទេ្វដង ហើយវាច្រើនជាងចំនួននៃការលក់របស់ស្មាតហ្វូន Galaxy S7 Edge និងGalaxy A5 (2017) ។ ប្រសិនបើនិន្នាការនេះ នៅតែបន្តនោះ អាជីវកម្មស្មាតហ្វូនរបស់ក្រុមហ៊ុន LG ទំនងជាអាចកាត់កង ក៏ដូចជាទប់ទល់ជាមួយនឹងខាតបង់ទឹកប្រាក់ច្រើនជាង 1 ពាន់ពាន់លានវ៉ុន ដែលបានបាត់ បង់កាលពីឆ្នាំមុន។
អ្នកវិភាគម្នាក់ទៀតនៅក្រុមហ៊ុននេះនិយាយថា “ក្រុមហ៊ុន Samsung កម្ររក្នុងការបញ្ចេញវីដេអូផ្សព្វផ្សាយពាណិជ្ជកម្មណាស់របស់ស្មាតហ្វូនស៊េរីថ្មី Galaxy S8 ។ វាហាក់ដូចជាការប៉ុនប៉ងមួយក្នុងការបង្អាក់ក្រុមហ៊ុន LG ពីការលក់ស្មាតហ្វូនស៊េរីថ្មីនៅលើទីផ្សារមុនពេលដែលស្មាតហ្វូន Galaxy S8 បង្ហាញខ្លួន។” នៅក្នុងវីដេអូនេះមិនទាន់ទម្លាយអ្វីក្រៅពីកាលបរិច្ឆេទនៃការសម្ភោធន៍នោះទេ គ្រាន់តែបង្ហាញនូវពាក្យថា “Next Galaxy” និងគ្រាប់មូលរាប់ដល់លេខ 8 ។
យើងរំពឹងថា ស្មាតហ្វូនស៊េរីថ្មីនេះនឹងមានជម្រើសមិនតិចជាង 7 ពណ៌នោះទេ រួមទាំងតួខ្លួនធ្វើពីកញ្ចក់។ ពណ៌របស់ស្មាតហ្វូនស៊េរីថ្មីនេះ មានដូចជាពណ៌មាស ពណ៌ខ្មៅ ពណ៌ខ្មៅរលោង ពណ៌ខៀវ ពណ៌អ័រគីដេ ពណ៌ទឹកប្រាក់ និងពណ៌ផ្កាឈូក៕