នៅថ្ងៃម្សិលមិញនេះ ក្រុមហ៊ុនបច្ចេកវិទ្យា ZTE ប្រកាសបង្ហាញនូវស្មាតហ្វូនស៊េរីថ្មីចំនួន 3 ស៊េរីម៉ូដែលនៅក្នុងទីផ្សាររបស់ប្រទេសចិន។ ស្មាតហ្វូនទាំង 3 ស៊េរីនេះរួមមាន nubia M2, M2 Lite និង N2 ។
-ស្មាតហ្វូន Nubia M2
ស្មាតហ្វូនស៊េរីថ្មីនេះបំពាក់នូវប្រព័ន្ធកាមេរ៉ាភ្លោះទំហំ 13MP ដូចគ្នាសម្រាប់ពណ៌កូល័រ និងសខ្មៅ (Monochrome) ។ កាមេរ៉ារបស់វាការពារដោយរង្វង់ដ៏ស្រស់ស្អាតមួយជាមួយ f/2.2 aperture ។ ស្មាតហ្វូននេះមានកាមេរ៉ាខាងមុខទំហំ 16MP សម្រាប់ថតរូប Selfie ភ្ជាប់ជាមួយមុខងារ f/2.0 aperture និងលំងាកបាន 80 ដឺក្រេ។
អេក្រង់របស់ស្មាតហ្វូននេះមានទំហំ 5.5 អ៊ីងកម្រិតភាពច្បាស់ 1080p AMOLED បន្ទះឈីប Qualcomm Snapdragon 625 រ៉េមផ្ទុកទិន្នន័យបណ្តោះអាសន្នទំហំ 4GB ម៉េមូរីក្នុងម៉ាស៊ីនទំហំ 64GB ឬ 128GB ហើយថែមទាំងមានរន្ធដោត microSD កាតថែមទៀត។ ប្រព័ន្ធស្កែនក្រយ៉ៅដៃបង្កប់នៅពីក្រោមប៊ូតុង Home ថាមពលថ្មខ្លាំង 3630mAh និងដំណើរការប្រព័ន្ធប្រតិបត្តិការ Android 6.0.1 Marshmallow ជាមួយនឹង nubia UI 4.0 ។ ស្មាតហ្វូននេះប្រើប្រាស់ 4G LTE, Wi-Fi, Bluetooth, GPS, GLONASS និង USB Type-C port ។ ស្មាតហ្វូន nubia M2 មានតម្លៃ 2,699 យ័ន ($391 ឬ €362) សម្រាប់ម៉េមូរី 64GB និងតម្លៃ 2,999 យ័ន ($434 ឬ €402) សម្រាប់ម៉េមូរីទំហំ 128GB ។ ស្មាតហ្វូននេះមានពីរពណ៌សម្រាប់ជ្រើសរើសគឺពណ៌មាស និងពណ៌ខ្មៅ។
-ស្មាតហ្វូន Nubia M2 Lite
ស្មាតហ្វូន nubia M2 Lite មិនប្រើប្រាស់ប្រព័ន្ធកាមេរ៉ាភ្លោះនោះទេនៅផ្នែកខាងក្រោយ។ វាប្រើប្រាស់កាមរ៉ាទំហំ 13 MP ភ្ជាប់ជាមួយនឹង f/2.2 aperture រួមទាំង dual-tone LED flash ថែមទៀត។ កាមេរ៉ាថតរូប Selfie ដូចគ្នាទៅនឹងស្មាតហ្វូន nubia M2 ។្ស្មាតហ្វូន M2 Lite មានអេក្រង់ទំហំ 5.5 អ៊ីងកម្រិតភាពច្បាស់ 720p IPS touchscreen បន្ទះឈីប Helio P10 រ៉េមផ្ទុកទិន្នន័យបណ្តោះអាសន្នទំហំ 3 GB ឬ 4GB និងម៉េមូរីក្នុងម៉ាស៊ីនទំហំ 32GB ឬ 64GB ហើយលោកអ្នកអាចបន្ថែមរន្ធដោត microSD កាតបានថែមទៀត។ ដូចគ្នទៅនឹងស្មាតហ្វូន M2 ដែរស្មាតហ្វូននេះភ្ជាប់នូវប្រព័ន្ធស្កែនក្រយ៉ៅដៃនៅក្រោមប៊ូតុង Home ។អ្វីដែលគួរឱ្យចាប់អារម្មណ៍ទៀតនោះ ស្មាតហ្វូនស៊េរីថ្មីនេះដំណើរការប្រព័ន្ធប្រតិបត្តិការ Android 7.0 Nougat នៅក្រោម nubia UI 4.0 ថាមពលថ្ម 3000mAh ជាមួយកម្លាំងបញ្ចូលថ្ម 5V/2A ហើយវាអាចប្រើប្រាស់បានស៊ីមពីរថែមទៀត។ ស្មតហ្វូន M2 Lite ដាក់លក់នៅក្នុងតម្លៃ 1,799 យ័ន ($260 ឬ €241) ហើយវាមានពីរពណ៌សម្រាប់ជ្រើសរើសគឺពណ៌មាស និងពណ៌ខ្មៅ។
-ស្មាតហ្វូន Nubia N2
ស្មាតហ្វូនស៊េរីថ្មីនេះមានថាមពលថ្មខ្លាំងកម្លាំង 5000mAh និងប្រើប្រាស់បច្ចេកវិទ្យា quick charging កម្លាំង 18W ។ លក្ខណៈសម្បត្តិរបស់ស្មាតហ្វូននេះស្រដៀងគ្នាទៅនឹងស្មាតហ្វូន M2 Lite គ្រាន់តែវាប្រើប្រាស់អេក្រង់ប្រភេទ 1080p AMOLED display panel រ៉េមផ្ទុកទិន្នន័យបណ្តោះអាសន្នទំហំ 4GB និងម៉េមូរីក្នុងម៉ាស៊ីនទំហំ 64GB ។ស្មាតហ្វូននេះដំណើរការប្រព័ន្ធប្រតិបត្តិការ Android 6.0 Marshmallow ហើយវាដាក់លក់នៅក្នុងតម្លៃ 1,999 យ័ន ($289 ឬ €268) ។ ស្មាតហ្វូននេះនឹងដាក់លក់នៅថ្ងៃទី 8 ខែមេសា ហើយវាមានពីរពណ៌សម្រាប់ជ្រើសរើសគឺពណ៌មាស និងពណ៌ខ្មៅ៕
