ពីមួយថ្ងៃទៅមួយថ្ងៃ លោកអ្នកអាចមើលឃើញរូបភាពថ្មីមួយផ្សេងទៀតរបស់ស្មាតហ្វូន Galaxy S8។ និយាយតាមត្រង់ទៅចុះ វាពិតជាពិបាកក្នុងការតាមដានថា តើអ្វីដែលជារូបភាព Render ចុងក្រោយគេបំផុតរបស់ស្មាតហ្វូនស៊េរីថ្មីទាំង ពីរនេះនោះ? យើងធ្លាប់ឃើញអំពីរូបរាងកោង និងទំហំរបស់ស្មាតហ្វូន Galaxy S8 និង Galaxy S8+ ។ រូបភាពចុងក្រោយថ្មីបំផុតនេះ ជាគំរូម៉ូដែលមួយនៅក្នុងសហរដ្ឋអាមេរិក។ យើងអាចមើលឃើញយ៉ាងច្បាស់អំពីតួអក្សរ ‘Galaxy S8’ នៅផ្នែកខាងក្រោយ ដែលមានន័យថា ក្រុមហ៊ុន Samsung មានគម្រោងក្នុងការដាក់ម៉ាកយីហោរបស់ខ្លួនសម្រាប់ស្មាតហ្វូនស៊េរីថ្មីនេះនៅសហរដ្ឋអាមេរិក។
យើងសន្មត់ថា ស្មាតហ្វូនស៊េរីថ្មី Samsung Galaxy S8 និង Galaxy S8+ ដែលដាក់លក់នៅសហរដ្ឋអាមេរិកនោះ នឹងសរសេរនូវម៉ាកយីហោម៉ូដែលរបស់ខ្លួននៅផ្នែកខាងក្រោយ ខណៈពេលស្មាតហ្វូនស៊េរីថ្មីនេះ ដែលដាក់លក់ជាលក្ខណៈអន្តរជាតិ មិនមានសរសេរអ្វីនោះទេ។ មួយវិញទៀត យើងអាចប៉ាន់ស្មានថា ស្មាតហ្វូនស៊េរីថ្មីទាំងពីរនេះ ក៏អាចប្រើប្រាស់ម៉ាកយីហោរបស់ក្រុមហ៊ុនចែកចាយជំនួសម៉ាកយីហោរបស់ក្រុមហ៊ុន Samsung ។ ដូចនេះ អតិថិជននៅសហរដ្ឋអាមេរិកអាច នឹងមើលឃើញនូវអក្សរបន្ថែមជាច្រើនទៀតនៅផ្នែកខាងក្រោយ។ នៅផ្នែកខាងមុខ វាមិនមានកន្លែងសម្រាប់ដាក់ម៉ាកយីហោ Samsung ទៀតនោះទេ ដោយសារតែការផ្លាស់ប្តូរកញ្ចក់អេក្រង់កាន់តែធំរបស់វា។
គួររំលឹកផងដែរថា ព្រឹត្តិការណ៍ Samsung Unpacked កំណត់កាលបរិច្ឆេទសម្ភោធន៍ជាផ្លូវការរួចហើយគឺនៅថ្ងៃទី 29 ខែមីនាខាងមុខនេះ ហើយការដឹកជញ្ជូនជាលើកដំបូងនឹងចាប់ផ្តើមនៅថ្ងៃទី 21 ឬថ្ងៃទី 28 ខែមេសា៕