នៅក្នុងព្រឹត្តិការណ៍តាំងពិពរណ៍ MWC 2017 ក្រុមហ៊ុនបច្ចេកវិទ្យា Samsung ប្រកាសបង្ហាញនូវថេប្លេត Galaxy Tab S3 និង Samsung Galaxy Book ដែលដំណើរការប្រព័ន្ធប្រតិបត្តិការ Inten-Based Windows 10 ដែលមានពីរម៉ូដែល សម្រាប់ជ្រើសរើស (10.6 អ៊ីង និង 12 អ៊ីង) ភ្ជាប់មកជាមួយប៊ិក S Pen Stylus ។ ខណៈពេលដែលថេប្លេត Galaxy Tab S3 អាចរកកម្មង់ទិញមុនបានហើយនោះ វានៅមិនទាន់មានការបញ្ជាក់ជាផ្លូវការអំពីកាលបរិច្ឆេទនៃការលក់ Galaxy Book នោះទេ។ ទោះជាយ៉ាងណាក្តី នៅថ្ងៃនេះ ក្រុមហ៊ុន Samsung បង្ហោះវីដេអូពាណិជ្ជកម្មផ្លូវការអំពីថេប្លេតស៊េរីថ្មីនេះ ដែលមានន័យថា វាពិតជានឹងដាក់លក់នាពេលឆាប់ៗនេះ។
វីដេអូពាណិជ្ជកម្មនេះ បង្ហាញពីការបង្កើតថេប្លេត Galaxy Book ទាំងមូលតែម្តងដែលផ្តល់ឱ្យអ្នកប្រើប្រាស់ទទួលបានឧបករណ៍ដែលមានសមត្ថភាពអស្ចារ្យសម្រាប់អ្នកប្រើប្រាស់ប្រចាំថ្ងៃ។ Galaxy Book 12 អ៊ីង និង Galaxy Book 10.6 អ៊ីងមានទាំងម៉ូដែលប្រភេទ Wi-Fi និង Wi-Fi LTE ភ្ជាប់ជាមួយ Keyboard និងប៊ិក S-PEN ស្រាប់នៅក្នុងប្រអប់។ យើងនៅមិនទាន់ដឹងអំពីតម្លៃរបស់ Galaxy Book នៅឡើយទេ ប៉ុន្តែវាពិតជាមិនមែនមានតម្លៃថោកនោះទេ៕
