នៅថ្ងៃនេះ សារព័ត៌មាន Korean Media អះអាងថា ផលិតកម្មស្មាតហ្វូនត្រកូល Galaxy S8 ដំបូងនេះ មានការកម្មង់ទិញពីក្រុមហ៊ុនចែកចាយជាច្រើនលើស្មាតហ្វូន Galaxy S8 ច្រើនជាងស្មាតហ្វូន Galaxy S8+ ។ ការផលិតសរុបសម្រាប់ស្មាតហ្វូនស៊េរីថ្មីនេះ ត្រូវគេរាយការណ៍ថាមានចំនួនរហូតទៅដល់ 12.5 លានគ្រឿង ដែលការកម្មង់ទិញនៅក្នុងខែមីនានេះ មានចំនួន 2.6 លានគ្រឿង ខណៈពេលដែលស្មាតហ្វូន Galaxy S8 មានការកម្មង់ចំនួនដល់ទៅ 2.1 លានគ្រឿង។ ក្រុមហ៊ុន Samsung មានគម្រោងក្នុងការបញ្ចេញស្មាតហ្វូន Galaxy S8 ចំនួន 4.5 លានបន្ថែមទៀតនៅក្នុងខែមេសា និងស្មាតហ្វូន Galaxy S8+ ចំនួន 3.3 លានគ្រឿង។ សរុបមក ការចាប់ផ្តើមដឹកជញ្ជូនស្មាតហ្វូនត្រកូល Galaxy S8 ទៅកាន់ហាងចែកចាយមានចំនួនដល់ទៅ 7.1 លានគ្រឿង ហើយស្មាតហ្វូន Galaxy S8+ មានចំនួន 5.4 លានគ្រឿង។
លើសពីនេះទៀត ប្រភពដដែលនេះ បានអះអាងថា ស្មាតហ្វូន Galaxy S8 នឹងភ្ជាប់ជាមួយនឹងបច្ចេកវិទ្យា Y-Octa Screen ធ្លាប់ប្រើនៅលើហ្វាប់ប្លេត Galaxy Note 7 ប៉ុន្តែមិនបំពាក់នៅលើស្មាតហ្វូន Galaxy S8+ នោះទេ។ បច្ចេកវិទ្យា Y-Octa Screen ភ្ជាប់ជាមួយនឹងស្រទាប់ Touch Layer នៅលើអេក្រង់តែម្តងដែលពង្រឹកទៅលើប្រព័ន្ធសែនស័រ។ វាស្រដៀងគ្នាទៅនឹងបច្ចេកវិទ្យា In-cell Touch ដែលធ្លាប់ប្រើប្រាស់នៅលើអេក្រង់ LCD របស់ក្រុមហ៊ុន Apple, LG និងក្រុមហ៊ុនផលិតស្មាតហ្វូនជាច្រើនទៀត គ្រាន់តែពេលនេះ វានឹងដាក់ឱ្យដំណើរការនៅលើអេក្រង់ OLED ។ ខណៈពេលនេះ យើងអាចមើលឃើញនូវរូបភាព Renders ជាច្រើនសន្លឹករបស់ស្មាតហ្វូនស៊េរីថ្មីទាំងពីរដែលក្រុមហ៊ុនបច្ចេកវិទ្យាយក្ស Samsung ពិតជាបង្រួមនូវស៊ុមព័ទ្ធអេក្រង់កាន់តែតូចនៅផ្នែកខាងលើ និងផ្នែកខាងក្រោមដែលធ្វើឱ្យអេក្រង់របស់វាអាចមានទំហំទៅដល់ 6.2 អ៊ីង (សម្រាប់ស្មាតហ្វូន Galaxy S8+) ៕