ក្រុមហ៊ុន Samsung នឹងប្រកាសសម្ពោធជាផ្លូវការស្មាតហ្វូនស៊េរីថ្មីរបស់ខ្លួននៅក្នុងឆមាសទី 1 ឆ្នាំនេះម៉ូដែល Galaxy S8 និង Galaxy S8+ នៅថ្ងៃទី 29 ខែមីនានេះ។ ស្មាតហ្វូនទាំងពីរស៊េរីម៉ូដែល អាចនឹងដាក់ឱ្យធ្វើការកម្មង់ទិញមុននៅថ្ងៃសម្ភោធន៍នេះ ប៉ុន្តែព័ត៌មាននេះ នៅមិនទាន់មានការបញ្ជាក់ជាផ្លូវការនៅឡើយទេ។ វាហាក់ដូចជាយើងបានដឹងរួចមកហើយអំពីតម្លៃរបស់ស្មាតហ្វូនទាំងពីរស៊េរីនេះចាប់តាំងពីវាបង្ហាញខ្លួននៅលើបញ្ជីរបស់ក្រុមហ៊ុនចែកចាយមួយនៅលើហាងទំនិញអនឡាញនៅទ្វីបអ៊ឺរ៉ុប។ សម្រាប់ស្មាតហ្វូន Galaxy S8 មានតម្លៃ 815 អ៊ឺរ៉ូ ចំនែកស្មាតហ្វូន Galaxy S8+ មានតម្លៃ 925 អ៊ឺរ៉ូ។
ដំណឹងដែលល្អនោះគឺថា ក្រុមហ៊ុនបច្ចេកវិទ្យា Samsung បានសហការជាមួយនឹងក្រុមហ៊ុនចែកចាយធំៗ និងក្រុមហ៊ុនលក់រាយជាច្រើនដើម្បីលក់ស្មាតហ្វូនស៊េរីថ្មីនេះ។ ជាក់ស្តែង ក្រុមហ៊ុន Carphone Warehouse មានកម្មវិធីពិសេសដោយផ្តល់ជូន Wireless Speaker (តម្លៃ 99.99 ផោន) ដោយឥតគិតថ្លៃសម្រាប់ការកម្មង់ទិញស្មាតហ្វូន Galaxy S8 និង Galaxy S8+ ។
ការថែមជូននេះមាននៅក្នុងចក្រភពអង់គ្លេស ប៉ុន្តែយើងរំពឹងថាសម្រាប់បណ្តាប្រទេសផ្សេងទៀតនៅទ្វីបអ៊ឺរ៉ុបក៏មានការផ្តល់ជូនស្រដៀងគ្នាផងដែរ។ យោងតាមក្រុមហ៊ុន Carphone Warehouse កម្មវិធីនេះគឺជាការផ្តល់ជូនផ្តាច់មុខ ដូចនេះមិនមានក្រុមហ៊ុនចែកចាយណាមួយនៅក្នុងចក្រភពអង់គ្លេសផ្តល់ជូន Wireless Speaker នៅពេលកម្មង់ទិញស្មាតហ្វូន Galaxy S8 នោះទេ។ យ៉ាងណាមិញ វានៅតែមានវត្ថុផ្សេងទៀតដែលក្រុមហ៊ុនចែកចាយ និងលក់រាយជាច្រើននឹងផ្តល់ជូនដោយឥតគិតថ្លៃនៅពេលកម្មង់ទិញស្មាតហ្វូនស៊េរីថ្មី Samsung Galaxy S8 និង Galaxy S8+ (ការកម្មង់ទិញមុនអាចធ្វើឡើងនៅថ្ងៃសម្ពោធ ឬនៅក្នុងសប្តាហ៍ក្រោយ)៕
