ស្ងាត់ៗ ក្រុមហ៊ុន Apple ដាក់លក់ទូរស័ព្ទ iPhone 7 ពណ៌ក្រហម និងថេប្លេត iPad ថ្មីនៅថ្ងៃទី 21 ខែមីនាដែលពិតជារឿងគួរឱ្យភ្ញាក់ផ្អើលមួយ។ ប៉ុន្តែវានៅមិនអ្វីមួយដែលមិនទាន់បានបង្ហាញខ្លួននៅឡើយនោះគឺថេប្លេតស៊េរីថ្មី iPad Pro 2 អេក្រង់ 10.5 អ៊ីង។ យោងទៅតាមរបាយការណ៍ថ្មីមួយបញ្ជាក់ថា ថេប្លេតស៊េរីថ្មីនេះបានផលិតបញ្ចប់រួចរាល់ហើយ ចំនែកការលក់ប្រហែលជានៅថ្ងៃទី 4 ខែមេសាខាងមុខនេះ។
អ្នកវិភាគ Rhoda Alexander របស់ក្រុមហ៊ុន IHS Markit ប្រាប់ទស្សនាវដ្តី Forbes កាលពីថ្ងៃអាទិត្យថា “ភស្តុតាងជាច្រើនបង្ហាញថាការផលិតថេប្លេតស៊េរីថ្មីអេក្រង់ 10.5 អ៊ីងធ្វើឡើងនៅក្នុងខែនេះ ចំនែកការដាក់លក់ថេប្លេតនេះគឺនៅក្នុងខែមេសា។ ការផលិតថេប្លេតស៊េរីថ្មីនេះមានចំនួនកំណត់មួយប៉ុណ្ណោះ ហើយក្រុមហ៊ុន Apple ក៏ដាក់លក់នៅក្នុងប្រទេសដែលខ្លួនបានកំណត់គោលដៅផងដែរ។”
ចាប់តាំងពីវត្តមានរបស់ iPad ស៊េរីថ្មីមានតម្លៃរហូតដល់ទៅ 329 ដុល្លារ ហើយលក្ខណៈសម្បត្តិរបស់វាក៏មិនមានអ្វីប្លែកអស្ចារ្យនោះទេ វាមានពាក្យចចាមអារ៉ាមជាច្រើននិយាយថា ថេប្លេត iPad Pro 2 ពិតជាមានសមត្ថភាពអស្ចារ្យ និងជាប្រភេទ Premium Tablet ភ្ជាប់ជាមួយលក្ខណៈសម្បត្តិអស្ចារ្យជាច្រើន។
ទោះបីជាដឹងថាថេប្លេត iPad Pro 2 នឹងដាក់លក់នៅថ្ងៃទី 4 ខែមេសាក៏ដោយ វានៅមិនទាន់មានការបញ្ជាក់ជាផ្លូវការណាមួយពីក្រុមហ៊ុន Apple នៅឡើយទេ។ ក្រុមហ៊ុន Apple អាចនឹងបង្ហាញថេប្លេត iPad Pro 2 នេះជាមួយនឹងទូរស័ព្ទស៊េរីថ្មីរបស់ខ្លួននៅក្នុងព្រឹត្តិការណ៍ធំប្រចាំរបស់ខ្លួននៅក្នុងនិទាយរដូវឆ្នាំនេះ។ លោកស្រី Rhoda Alexander អះអាងថា ក្រុមហ៊ុន Apple នឹងផលិតថេប្លេត iPad Pro 2 នេះនៅក្នុងចំនួនកំណត់មួយប៉ុណ្ណោះ។
ថេប្លេត iPad Pro 2 ត្រូវបានគេដឹងថានឹងមានតម្លៃរហូតដល់ទៅ 799 ដុល្លារហើយវានឹងភ្ជាប់មកជាមួយមុខងារ Touch Bar ដូចទៅនឹង MacBook Pro 2016 ការប្រើប្រាស់ជាមួយ Apple Pencil 2 ប្រព័ន្ធប្រតិបត្តិការ iOS 10.3 និងបន្ទះឈីប Apple A10X processor ៕
