ស្មាតហ្វូន Samsung Galaxy S8 និង Galaxy S8+ បំបែកកំណត់ត្រានៃការកម្មង់ទិញមុន (Pre-order) នៅក្នុងប្រទេសកូរ៉េខាងត្បូងដោយត្រឹមតែរយៈពេល 2 ថ្ងៃ ការកម្មង់ទិញមុនកើនឡើងដល់ 550,000 គ្រឿង។ វាមានការកើនឡើង 5 ដងបើធៀបជាមួយនឹងការកម្មង់ទិញមុនលើស្មាតហ្វូន Galaxy S7 (ប្រហែលជា 100,000 គ្រឿង) ហើយប្រហែលជាជិត 3 ដងបើធៀបជាមួយនឹងការកម្មង់ទិញមុនហ្វាប់ប្លេត Galaxy Note 7 (ប្រហែលជា 200,000 គ្រឿង) ។
ការកម្មង់ទិញមុន (Pre-order) ចាប់ផ្តើមរហូតដល់ថ្ងៃទី 17 ខែមេសា (លទ្ធផលអាចកើនឡើងដល់ខ្ទង់លានគ្រឿង) ហើយស្មាតហ្វូន Galaxy S8 នេះនឹងដាក់លក់នៅក្នុងហាងចែកចាយច្រើនជាង 3000 កន្លែងនៅក្នុងប្រទេសនេះ។ ក្រុមហ៊ុនបច្ចេកវិទ្យា Samsung នឹងផ្តល់ជូននូវ Bluetooth speaker ដោយឥតគិតថ្លៃ ឬកាតតម្លៃ 400,000 វ៉ុន។ របាយការណ៍ជាច្រើនបង្ហាញថា 80% ទៅ 90% នៃអតិថិជន ដែលមកទស្សនាបានធ្វើការកម្មង់ទិញស្មាតហ្វូនស៊េរីថ្មី Galaxy S8 ។
អ្វីដែលគួរឱ្យភ្ញាក់ផ្អើលទៀតនោះ កម្រិតនៃការកម្មង់ទិញមុនស្មាតហ្វូន Galaxy S8 និង S8+ គឺមានភាពខុសគ្នាតែតិចតួចប៉ុណ្ណោះ។ តម្រូវការនៃស្មាតហ្វូនអេក្រង់ធំចាប់ផ្តើមកើនឡើងចាប់តាំងពីហ្វាប់ប្លេត Galaxy Note 7 លែងមាននៅលើទីផ្សារ។ ក្រុមហ៊ុន Samsung និយាយថា ស្មាតហ្វូនស៊េរីថ្មី Galaxy S8 និង S8+ បំពាក់នូវរ៉េម 6GB និងម៉េមូរីក្នុងម៉ាស៊ីនទំហំ 128GB ក៏មានតម្រូវការខ្លាំងដែរ។ របាយការណ៍មួយចេញពីប្រទេសកូរ៉េខាងត្បូងបញ្ជាក់ថា គម្រោងរបស់ក្រុមហ៊ុនបច្ចេកវិទ្យា Samsung គឺបំបែកកំណត់ត្រានៃការលក់លើសស្មាតហ្វូន Galaxy S7 ដែលលក់បានចំនួន 49 លានគ្រឿងកាលពីឆ្នាំមុន។ អ្នកវិភាគជាច្រើនរំពឹងថា ត្រឹមតែរយៈពេលមួយខែ ស្មាតហ្វូនស៊េរីថ្មី Samsung Galaxy S8 ពិតជាអាចលក់បានប្រហែល 13 លានគ្រឿង៕
