ក្រុមហ៊ុនបច្ចេកវិទ្យាយក្ស Samsung ប្រហែលជាត្រូវគេស្គាល់ឈ្មោះដោយសារឧស្សាហកម្មស្មាតហ្វូនចល័តរបស់ខ្លួន ប៉ុន្តែក្រុមហ៊ុនបច្ចេកវិទ្យាយក្សរបស់កូរ៉េខាងត្បូងនេះក៏ផលិតនូវឧបករណ៍បច្ចេកវិទ្យាជាច្រើនទៀតផងដែរ។ ក្រុមហ៊ុន Samsung ផលិតនូវទូរទស្សន៍ សមាសភាគ Semiconductor និង OLED ដែលជួយក្រុមហ៊ុនបំបែកកំណត់ត្រានៃប្រាក់ចំណេញយ៉ាងច្រើនសន្ធឹកសន្ធាប់ ប៉ុន្តែផ្នែកអាជីវកម្មមួយ ដែលដំណើរការនៅមិនទាន់ជោគជ័យនោះ គឺកាមេរ៉ា។
ក្រុមហ៊ុនបច្ចេកវិទ្យា Samsung ត្រូវគេរកឃើញថា ទទួលជោគជ័យខ្លាំងស្ទើរតែគ្រប់ផ្នែកនៅក្នុងអាជីវកម្មរបស់ខ្លួន ប៉ុន្តែពាក្យចចាមអារ៉ាមជាច្រើនបង្ហាញថាក្រុមហ៊ុន Samsung អាចនឹងបោះបង់ចោលអាជីវកម្មកាមេរ៉ាឌីជីថលរបស់ខ្លួន។ ក្រុមហ៊ុន Samsung នៅមិនទាន់បញ្ចេញកាមេរ៉ាឌីជីថលអ្វីថ្មីនោះទេបន្ទាប់ពីកាមេរ៉ា NX500 ដែលបង្ហាញខ្លួននៅក្នុងឆ្នាំ 2015 នោះ។ ក្រុមហ៊ុន Samsung ក៏បោះបង់ចោលទីផ្សារកាមេរ៉ាឌីជីថល នៅក្នុងទឹកដីចក្រភពអង់គ្លេសផងដែរ ដោយសារតែតម្រូវការមានការធ្លាក់ចុះបន្តិចម្តងៗ ទៅលើកាមេរ៉ាឌីជីថល និងម៉ាស៊ីនថតនេះ។
របាយការណ៍ជាច្រើនបង្ហាញថា ពេលនេះ ក្រុមហ៊ុនបច្ចេកវិទ្យា Samsung កំពុងបោះបង់ចោលទាំងស្រុងអាជីវកម្មកាមេរ៉ាឌីជីថលរបស់ខ្លួនចេញពីគេហទំព័រនៅកូរ៉េខាងត្បូង។ ប្រភពអនាមិកនៅក្នុងក្រុមហ៊ុន Samsung អះអាងថា ក្រុមហ៊ុន Samsung ចាប់ផ្តើមការសម្រេចចិត្តរបស់ខ្លួនរួចទៅហើយ។ នាយកប្រតិបត្តិសុំមិនបញ្ចេញឈ្មោះម្នាក់និយាយថា “យើងលែងផលិត និងលក់កាមេរ៉ាឌីជីថលទៀតហើយ។ ប៉ន្តែយើងនឹងបង្កើតនូវកាមេរ៉ាឌីជីថលថ្មីសម្រាប់បន្តអាជីវកម្មរបស់យើងឡើងវិញ។”
អាជីវកម្មកាមេរ៉ាឌីជីថលថ្មីនេះ គឺប្រហែលផ្តោតទៅលើកាមេរ៉ា Gear 360 របស់ក្រុមហ៊ុន Samsung ដែលអនុញ្ញាតឱ្យអតិថិជនអាចថតរូបកម្រិត 360 ដឺក្រេនៅជុំវិញខ្លួនរបស់ពួកគេ។ កាមេរ៉ា Gear 360 ជំនាន់ទី 2 នេះទើបតែបង្ហាញវត្តមាននាពេលថ្មីៗនេះជាមួយនឹងស្មាតហ្វូន Galaxy S8 ។ ក្រុមហ៊ុន Samsung កំពុងបង្កើនគុណភាព និងលក្ខណៈសម្បត្តិកាន់តែអស្ចារ្យនៅលើកាមេរ៉ារបស់ស្មាតហ្វូន ហើយក្រុមហ៊ុន Samsung ក៏ដើរតួយ៉ាងសំខាន់នៅក្នុងទីផ្សារកាមេរ៉ាឌីជីថលស្មាតហ្វូនសម្រាប់អ្នកប្រើប្រាស់ផងដែរ៕