Bixby ជំនួយការឆ្លាតវៃថ្មីរបស់ក្រុមហ៊ុនបច្ចេកវិទ្យា Samsung គឺជាផ្នែកមួយនៃមុខងារដ៏សំខាន់សម្រាប់ស្មាតហ្វូនស៊េរីថ្មី Galaxy S8 និង Galaxy S8+ ។ រឿងពិតមួយគឺថា ក្រុមហ៊ុន Samsung សម្រេចចិត្តក្នុងការបន្ថែមនូវប៊ូតុង Bixby សម្រាប់ការបញ្ជាជាសំឡេងទៅលើស្មាតហ្វូនស៊េរីថ្មីនេះ ប៉ុន្តែអ្នកប្រើប្រាស់មួយចំនួនមានការខកចិត្តផងដែរដោយសារប្រព័ន្ធជំនួយការឆ្លាតវៃនេះ អាចនិយាយបានតែភាសាអង់គ្លេស និងភាសាកូរ៉េ តែប៉ុណ្ណោះ ហើយមុខងារនៃការប្រើប្រាស់របស់វា ក៏នៅមិនទាន់ច្រើនគ្រប់គ្រាន់ផងដែរ។
ដូចនេះ តើពេលណាដែលជំនួយការឆ្លាតវៃ Bixby ធ្វើការអាប់ឌែត (update) ជាមួយនឹងមុខងារថ្មីៗ និងការទ្រទ្រង់ភាសាបានច្រើននោះ? រហូតមកទល់ពេលនេះ គ្មានអ្នកណាម្នាក់ដឹងនោះទេ ប៉ុន្តែគេហទំព័រ (Support Page) មួយរបស់ក្រុមហ៊ុន Samsung នៅអាឡឺម៉ង់ទើបតែផ្តល់ចម្លើយសម្រាប់រឿងនេះ។ អ្នកប្រើប្រាស់ភាគច្រើនស្វែងរកចម្លើយរបស់ពួកគេនៅក្នុងផ្នែក FAQ នៅលើគេហទំព័រមួយនេះ ហើយពេលនេះគេដឹងថា ជំនួយការឆ្លាតវៃ Bixby នឹងធ្វើការបន្ថែមនូវមុខងារថ្មីៗ និងការទ្រទ្រង់ភាសាជាច្រើនបាននៅក្នុងត្រីមាសទី 4 ឆ្នាំ 2017 ខាងមុខនេះ។ នៅក្នុងរូបភាព Screenshot មួយភ្ជាប់ជាមួយនឹងឃ្លាមួយថា “Bixby អាចនិយាយពាក្យថា Hello ” ជាភាសាអាឡឺម៉ង់។
បើទោះបីជាមិនទាន់មានព័ត៌មានបន្ថែមអំពីរឿងនេះក្តី ដំណឹងនេះផ្តល់នូវភាពជឿជាក់ និងទុកចិត្តមួយថា ក្រុមហ៊ុនបច្ចេកវិទ្យា Samsung ពិតមានមានគម្រោងក្នុងការអាប់ឌែត (Update) ទៅលើជំនួយការឆ្លាតវៃ Bixby របស់ខ្លួនពិតមែននៅក្នុងរដូវស្លឹកឈើជ្រុះនាពេលខាងមុខនេះ។ លោកអ្នកប្រហែលជាដឹងហើយថា ជំនួយការឆ្លាតវៃ Bixby មិនមែនផ្តាច់មុខសម្រាប់ស្មាតហ្វូន Galaxy S8 នោះទេ ហើយ Bixby ក៏អាចនឹងបង្ហាញខ្លួននៅលើហ្វាប់ប្លេត Galaxy Note 8 ផងដែរ។ ហ្វាប់ប្លេត Galaxy Note 8 ប្រហែលជានឹងបង្ហាញខ្លួននៅក្នុងសប្តាហ៍ទីមួយនៃខែកញ្ញាក្នុងព្រឹត្តិការណ៍ IFA (ធ្វើឡើងនៅទីក្រុងប៊ែកឡាំង) ហើយហ្វាប់ប្លេតនេះនឹងនាំយកនូវការអាប់ឌែតយ៉ាងច្រើនទៅលើផ្នែក Software របស់ខ្លួន៕