លោកអ្នកលប្រាកដជាបានជ្រាបហើយថា ក្រុមហ៊ុន Samsung ធ្លាប់មានបញ្ហាចម្រូងចម្រ៉ាស់ជាយូរមកហើយដោយសារការចម្លងការរចនាម៉ូដតាមក្រុមហ៊ុនបច្ចេកវិទ្យា Apple សម្រាប់ស្មាតហ្វូនជាច្រើនរបស់ខ្លួន។ ដោយសារតែរឿងនេះហើយ ក្រុមហ៊ុន Apple ប្តឹងក្រុមហ៊ុនបច្ចេកវិទ្យា Samsung ជាច្រើនលើកច្រើនសារតាមផ្លូវច្បាប់ទៅលើការរំលោភប៉ាតង់ និងការរចនាម៉ូដ។ ប៉ុន្តែឥឡូវនេះវិញភាពមិនប្រក្រតីកំពុងតែកើតឡើងហើយនៅក្នុងវិស័យឧស្សាហកម្មហើយដោយសារតែក្រុមហ៊ុនបច្ចេកវិទ្យា Apple និង Google កំពុងតែចម្លងការរចនាម៉ូដពីក្រុមហ៊ុនបច្ចេកវិទ្យា Samsung វិញ។ ត្រឡប់ទៅកាន់ឆ្នាំ 2015 ក្រុមហ៊ុន Samsung បញ្ចេញស្មាតហ្វូន Galaxy S6 ដ៏ប្រណិតជាមួយនឹងស្មាតហ្វូន Galaxy S6 Edge ដែលប្រើប្រាស់អេក្រង់គែមកោងយ៉ាងស្រស់ស្អាតបំផុត។
ការរចនារូបរាងគឺស្រដៀងគ្នាសម្រាប់ស្មាតហ្វូន Galaxy S7 និង Galaxy S7 Edge ឆ្នាំ 2016 ។ បន្ទាប់មកកាលពីខែមុននេះ ក្រុមហ៊ុនបច្ចេកវិទ្យា Samsung សម្ពោធស្មាតហ្វូន Galaxy S8 ដែលមានអេក្រង់គែមកោងយ៉ាងស្រស់ស្អាត ស៊ុមព័ទ្ធអេក្រង់កាន់តែស្តើងផ្នែកខាងលើ និងផ្នែកខាងក្រោម ជាពិសេសអេក្រង់ផ្នែកខាងមុខជាប្រភេទ OLED ។ខណៈពេលដែលពេលនេះស្មាតហ្វូន Galaxy S8 នៅមិនទាន់ដាក់លក់ជាផ្លូវការនៅជុំវិញពិភពលោកនៅឡើយទេ (កាលបរិច្ឆេទនៃការដាក់លក់ជាផ្លូវការប្រហែលជានៅចុងខែនេះ) ស្មាតហ្វូននេះទទួលបានការគាំទ្រ និងចំណុចល្អៗជាច្រើនពីស្ថាប័នអ្នកកាសែតជាមួយនឹងរបកគំហើញនៃការរចនារូបរាងដ៏ស្រស់ស្អាត ហើយស្មាតហ្វូននេះទទួលបានការកោតសរសើរគ្រប់ៗគ្នា។
យោងទៅតាមពាក្យចចាមអារ៉ាមចុងក្រោយបំផុត វាហាក់ដូចជាក្រុមហ៊ុនបច្ចេកវិទ្យា Apple និង Google មានគម្រោងក្នុងការចម្លងការរចនាម៉ូដពី Samsung សម្រាប់ស្មាតហ្វូនស៊េរីថ្មីរបស់ខ្លួនដែលគ្រោងបង្ហាញខ្លួននាពេលខាងមុខនេះ។ ក្រុមហ៊ុន Apple ដែលមានមូលដ្ឋាននៅទីក្រុងកាលីហ្វ័ញ៉ា ត្រូវគេរំពឹងថា នឹងសម្ពោធទូរស័ព្ទ iPhone ស៊េរីថ្មីរបស់ខ្លួននៅក្នុងព្រឹត្តិការណ៍ខួបអនុស្សាវរីយ៍លើកទី 10 នៅក្នុងរដូវស្លឹកឈើជ្រុះខាងមុខនេះ។ ទូរស័ព្ទ iPhone 8 មានពាក្យចចាមអារ៉ាមលើកឡើងថានឹងមានការផ្លាស់ប្តូររូបរាងថ្មី គឺមានអេក្រង់គែមកោង កញ្ចក់ OLED ដូចគ្នាទៅនឹង Samsung Galaxy S8 ដែរ។
ចំនែកក្រុមហ៊ុនបច្ចេកវិទ្យា Google ក៏គ្រោងសម្ពោធស្មាតហ្វូនស៊េរីថ្មី Pixel ជំនាន់ទី 2 របស់ខ្លួននៅក្នុងឆ្នាំនេះផងដែរ។ របាយការណ៍ចុងក្រោយបំផុតលើកឡើងថា ស្មាតហ្វូននេះ នឹងប្រើប្រាស់អេក្រង់កោងជាមួយកញ្ចក់ OLED ផងដែរ៕