ថ្មីៗនេះ ក្រុមហ៊ុនបច្ចេកវិទ្យាយក្ស Samsung សម្ពោធស្មាតហ្វូនស៊េរីថ្មីរបស់ខ្លួន Galaxy S8 និង Galaxy S8+ ។ ចំនែកហ្វាប់ប្លេត Galaxy Note 8 របស់ក្រុមហ៊ុននេះ ក៏ត្រូវគេរំពឹងថា នឹងដាក់លក់ជាផ្លូវការនៅក្នុងត្រីមាសទី 4 នៃឆ្នាំ 2017នេះ។ ខណៈពេលដែលយើងនៅសល់រយៈពេលជាច្រើនខែទៀតទើបដែលថ្ងៃដាក់លក់ហ្វាប់ប្លេតនេះ ពាក្យចចាមអារ៉ាមជាច្រើនអំពីហ្វាប់ប្លេតនេះ ក៏បង្ហាញអំពីលក្ខណៈសម្បត្តិជាច្រើនរបស់វា។ ហ្វាប់ប្លេត Galaxy Note 8 ត្រូវគេដឹងថា នឹងមានលក្ខណៈសម្បត្តិស្រដៀងគ្នាទៅនឹងស្មាតហ្វូន Samsung Galaxy S7, Note 7 និង Galaxy S8 ។ ទាំងនេះ គឺជាលក្ខណៈសម្បត្តិទាំង 10 ដែលគេរំពឹងថាហ្វាប់ប្លេត Samsung Galaxy Note 8៖
1. អេក្រង់
ហ្វាប់ប្លេត Samsung Galaxy Note 8 ត្រូវគេដឹងថានឹងមានអេក្រង់គែមកោង Edge-to-Edge Display ស្រដៀងគ្នាទៅនឹងស្មាតហ្វូន Samsung Galaxy S8 ។ ក្រុមហ៊ុន Samsung សម្រេចចិត្តដកចេញប៊ូតុង Home ហើយវាមានកម្រិត 18.5:9 aspect ratio ។ ក្រុមហ៊ុន Samsung ត្រូវគេរំពឹងថានឹងប្រើប្រាស់អេក្រង់កាន់តែធំរហូតទៅដល់ 5.7 អ៊ីងដូចទៅនឹងហ្វាប់ប្លេត Note ជំនាន់មុនដែរ។ ហ្វាប់ប្លេត Galaxy Note 8 ត្រូវគេដឹងថានឹងប្រើប្រាស់អេក្រង់ pressure-sensitive display ស្រដៀងគ្នាទៅនឹងបច្ចេកវិទ្យា 3D Touch របស់ទូរស័ព្ទ iPhone 7 ។
2 មានប៊ូតុង Home
ដូចគ្នាទៅនឹងស្មាតហ្វូន Samsung Galaxy S8 ដែរ ក្រុមហ៊ុន Samsung ត្រូវគេរំពឹងថានឹងដកចេញប៊ូតុង Home នៅលើហ្វាប់ប្លេត Galaxy Note 8 ។ ក្រុមហ៊ុន Samsung អាចនឹងប្រើប្រាស់ប្រព័ន្ធស្កែនក្រយ៉ៅដៃនៅក្រោមអេក្រង់តែម្តង។
3. ប្រព័ន្ធកាមេរ៉ា
ហ្វាប់ប្លេត Samsung Galaxy Note 8 ត្រូវគេដឹងថានឹងប្រើប្រាស់ប្រព័ន្ធកាមេរ៉ាភ្លោះដូចគ្នាទៅនឹងទូរស័ព្ទ Apple iPhone 7 Plus ។ វាខុសពីស្មាតហ្វូន Samsung Galaxy S8 ដែលមានកាមេរ៉ាតែមួយទំហំ 12MP ខណៈពេលដែលហ្វាប់ប្លេត Galaxy Note 8 នឹងមានកាមេរ៉ាភ្លោះ។
4. ប្រព័ន្ធប្រតិបត្តិការ
ចាប់តាំងពីហ្វាប់ប្លេត Galaxy Note 8 ត្រូវគេរំពឹងថានឹងដាក់លក់ជាផ្លូវការនៅចុងឆ្នាំនេះ បន្ទាប់ពីក្រុមហ៊ុន Google បញ្ចេញ Android O និង Pixel 2 ដូចនេះហ្វាប់ប្លេត Galaxy Note 8 ពិតជាប្រើប្រាស់ប្រព័ន្ធប្រតិបត្តិការ Android ជំនាន់ចុងក្រោយបំផុតជាក់ជាមិនខាន។
5. ម៉េមូរីក្នុងម៉ាស៊ីន និងរ៉េម
ហ្វាប់ប្លេត Galaxy Note 8 ត្រូវគេដឹងថានឹងមានលក្ខណៈសម្បត្តិកាន់តែអស្ចារ្យជាងហ្វាប់ប្លេតជំនាន់មុន។ ហ្វាប់ប្លេតនេះនឹងមានរ៉េមផ្ទុកទិន្នន័យបណ្តោះអាសន្នទំហំ 6GB និងម៉េមូរីក្នុងម៉ាស៊ីនទំហំ 256GB ដែលអាចទ្រទ្រង់នូវការងារធំៗ ឬលេងហ្គេមដែលមានក្រាហ្វិកធំបានដោយគ្មានបញ្ហានោះទេ។
6. បន្ទះឈីប
ហ្វាប់ប្លេត Galaxy Note 8 ត្រូវគេដឹងថានឹងប្រើប្រាស់បន្ទះឈីប 10nm processor ។ ក្រុមហ៊ុន Samsung ប្រហែលជាជ្រើសរើសបន្ទះឈីប Snapdragon 835 និង Exynos 8895 សម្រាប់ហ្វាប់ប្លេតនេះ។
7. បច្ចេកវិទ្យាស្កែនប្រស្រីភ្នែក
ក្រុមហ៊ុនបច្ចេកវិទ្យា Samsung ត្រូវគេរំពឹងថានឹងរក្សាប្រព័ន្ធស្កែនប្រស្រីភ្នែករបស់ហ្វាប់ប្លេត Galaxy Note 7 ហើយហ្វាប់ប្លេត Galaxy Note 8 ក៏មានលក្ខណៈស្រដៀងគ្នាដែរ។
8. ប៊ិក S-Pen
ក្រុមហ៊ុនបច្ចេកវិទ្យា Samsung ត្រូវគេរំពឹងថានឹងប្រើប្រាស់ប៊ិក S-Pen ថ្មីដែលបង្កើននូវប្រព័ន្ធ Sensitivity ដែលអាចបំពេញការងារបានច្រើន។
9. ជំនួយការឆ្លាតវៃ Bixby AI
ហ្វាប់ប្លេត Galaxy Note 8 ត្រូវគេរំពឹងថានឹងប្រើប្រាស់ប្រព័ន្ធជំនួយការឆ្លាតវៃជាសំឡេងដែលក្រុមហ៊ុន Samsung ដាក់ឈ្មោះថា Bixby ។
10. ថាមពលថ្ម
ថាមពលថ្មពិតជារឿងមួយដ៏សំខាន់សម្រាប់ក្រុមហ៊ុន Samsung ព្រោះថាបញ្ហាផ្ទុះរបស់ហ្វាប់ប្លេត Galaxy Note 7 ធ្វើឱ្យក្រុមហ៊ុនខាតបង់ទឹកប្រាក់ជាច្រើនរួចមកហើយ។ ហ្វាប់ប្លេត Galaxy Note 8 នឹងប្រើប្រាស់ថាមពលថ្មទំហំ 3,500 mAh ។
តែទោះជាយ៉ាងណាក៏ដោយរហូតមកដល់ពេលនេះ ក្រុមហ៊ុនបច្ចេកវិទ្យាយក្ស Samsung នៅមិនទាន់បញ្ជាក់អំពីលក្ខណៈសម្បត្តិ និងមុខងាររបស់ហ្វាប់ប្លេត Galaxy Note 8 នោះទេ៕
