តើលោកអ្នកគឺជាប្រិយមិត្តគាំទ្រផលិតផលនាឡិកាឆ្លាតវៃរបស់ក្រុមហ៊ុន Apple មែនទេ? តើលោកអ្នកចង់ដឹងអំពីនាឡិកាឆ្លាតវៃ Apple Watch Series 3 ដែរទេ? យោងទៅតាមប្រភពសុំមិនបញ្ចេញឈ្មោះពីក្រុមហ៊ុន ផ្គង់ផ្គង់មួយបញ្ជាក់ថា នាឡិកាឆ្លាតវៃ Apple Watch Series 3 នឹងបង្ហាញខ្លួនជាផ្លូវការនៅក្នុងឆមាសទី 2 ឆ្នាំនេះ។ លក្ខណៈសម្បត្តិជាច្រើនរបស់នាឡិកាឆ្លាតវៃនេះនៅមិនទាន់ទម្លាយឱ្យដឹងនៅឡើយទេនៅក្នុងរបាយការណ៍នេះ ប៉ុន្តែពាក្យចចាមអារ៉ាមជាច្រើនកាលពីពេលមុនក៏បញ្ជាក់ដូចគ្នាថានាឡិកាឆ្លាតវៃនេះនឹងបង្ហាញខ្លួននៅក្នុងរដូវស្លឹកឈើជ្រុះខាងមុខនេះ។
ព័ត៌មានបែកធ្លាយជាច្រើនកន្លងមក យើងអាចដឹងថា នាឡិកាឆ្លាតវៃ Apple Watch Series 3 នឹងពង្រឹងទៅលើល្បឿននៃប្រព័ន្ធដំណើរការ និងការពង្រឹងទៅលើថាមពលថ្មកាន់តែប្រសើរបើធៀបជាមួយនឹងជំនាន់មុន។ នាឡិកាឆ្លាតវៃ Apple Watch Series 2 បង្ហាញខ្លួនជាផ្លូវការនៅក្នុងព្រឹត្តិការណ៍របសក្រុមហ៊ុន Apple ក្នុងខែកញ្ញាឆ្នាំមុនជាមួយនឹងវត្តមានរបស់ទូរស័ព្ទ iPhone 7 និង iPhone 7 Plus ។ ដូចនេះនៅក្នុងឆ្នាំនេះ Apple Watch Series 3 ពិតជាបង្ហាញខ្លួននៅក្នុងព្រឹត្តិការណ៍របស់ Apple ជាមួយនឹងទូរស័ព្ទ iPhone 8, 7s និង 7s Plus ។
យោងតាមអ្នកវិភាគជាច្រើននាក់និយាយថា ការប្រើប្រាស់ប្រព័ន្ធ LTE connectivity នឹងបន្ថែមទៅក្នុងនាឡិកាឆ្លាតវៃ Apple Watch Series 3 ។ ប៉ុន្តែសម្រាប់រូបរាងរបស់នាឡិកាឆ្លាតវៃនេះវិញត្រូវគេដឹងថាមានលក្ខណៈស្រដៀងគ្នាទៅនឹងនាឡិកា Apple Watch Series 2 ។ នាឡិកា Apple Watch Series 2 នឹងនៅតែបន្តដាក់លក់ដដែលបើទោះបីជានាឡិកាឆ្លាតវៃ Apple Watch Series 3 បង្ហាញខ្លួនក៏ដោយ។ នាឡិកាឆ្លាតវៃ Apple Watch Series 3 នឹងផលិតដោយក្រុមហ៊ុន Quanta ដែលបច្ចុប្បន្ននេះជាអ្នកផលិតទាំងស្រុងទៅលើនាឡិកាឆ្លាតវៃ Apple Watch Series 2 ៕
