ស្មាតហ្វូនស៊េរីថ្មី Samsung Galaxy S8 បានប្រកាសបង្ហាញខ្លួនជាផ្លូវការកាលពីខែមុននេះ ដោយបាននាំយកនូវបច្ចេកវិទ្យាថ្មីៗ និងមុខងារថ្មីៗដូចជាបច្ចេកវិទ្យាអេក្រង់កោង edge-to-edge display ប្រព័ន្ធស្កែនប្រស្រីភ្នែក (iris scanner) និងប្រព័ន្ធថ្មីបំផុត។ ជាទូទៅ យើងប្រើប្រាស់ប្រព័ន្ធ Bluetooth សម្រាប់ការផ្លាស់ប្តូរបញ្ជូនទិន្នន័យតាម Wireless ក្នុងចម្ងាយខ្លី។ សម្រាប់ប្រព័ន្ធ Bluetooth 5.0 នេះត្រូវសម្ភោធដោយក្រុម Bluetooth Special Interest Group នៅក្នុងព្រឹត្តិការណ៍មួយក្នុងទីក្រុងឡុងដ៏។ ខណៈពេលដែល Samsung Galaxy S8 ជាស្មាតហ្វូនដំបូងបំផុតដែលប្រើប្រាស់បច្ចេកវិទ្យាថ្មីនេះ ស្មាតហ្វូនស៊េរីថ្មីជាច្រើនទៀតក៏រំពឹងថានឹងបង្ហាញខ្លួននៅឆ្នាំនេះដូចជា Google Pixel 2 និង Samsung Galaxy Note 8 នឹងប្រើប្រាស់បច្ចេកវិទ្យានេះដូចគ្នាដែរ។
ចង់ដឹងថា វាមានលក្ខណៈខុសគ្នាអ្វីខ្លះជាមួយនឹងបច្ចេកវិទ្យាថ្មីនេះ? វាពិតជាមានសក្តានុពលច្រើនជាងនៅក្នុងកម្រិតចម្ងាយ និងល្បឿនបើធៀបជាមួយនឹងបច្ចេកវិទ្យាប្រព័ន្ធស្តង់ដារ Bluetooth 4.0។ បច្ចេកវិទ្យាថ្មីនេះ នឹងធ្វើឱ្យប្រព័ន្ធ Bluetooth អាចភ្ជាប់ទៅកាន់ឧបករណ៍ជាច្រើននៅក្នុងកម្រិតចម្ងាយ 4 ដង និងមានល្បឿនបញ្ជូនទិន្នន័យទ្វេដង និងមានកម្រិតនៃការបញ្ជូនសារលឿនជាងមុន 8 ដងបើធៀបជាមួយនឹងប្រព័ន្ធ Bluetooth 4.0។
ខាងក្រោមនេះគឺជាការផ្លាស់ប្តូរមួយចំនួនរបស់បច្ចេកវិទ្យាប្រព័ន្ធ Bluetooth 5.0 ទៅលើការប្រើប្រាស់នៅលើស្មាតហ្វូន៖
- ការភ្ជាប់ទំនាក់ទំនងតាមប្រព័ន្ធ Bluetooth កាន់តែប្រសើរ៖ ជាធម្មតា ការភ្ជាប់ទំនាក់ទំនងតាមប្រព័ន្ធ Bluetooth អាចមានភាពយឺតយ៉ាវដែលលោកអ្នកត្រូវរង់ចាំភ្ជាប់ទៅកាន់ឧបករណ៍មួយទៀតជាប់សិន។ ប្រសិនបើអ្នកភ្ជាប់ទំនាក់ទំនងទៅកាន់ឧបករណ៍ប្រើប្រាស់ប្រព័ន្ធ Bluetooth ច្រើននោះ វាពិតជាការរំខានមួយ។ ការផ្លាស់ប្តូរថ្មីនៅលើការប្រើប្រាស់ប្រព័ន្ធ Bluetooth 5.0 ជាបច្ចេកវិទ្យាថ្មីដែលអាចបញ្ជូនទិន្នន័យលឿនជាងមុន 2 ដង។ វាមិនត្រឹមតែអាចភ្ជាប់ទំនាក់ទំនងបានលឿនជាងមុននោះទេ វាថែមទាំងកាត់បន្ថយការពន្យារពេលក្នុងការបញ្ជូនសំឡេងទៅកាន់ Bluetooth Speakers និងកាសស្តាប់ផងដែរ។
- ការតភ្ជាប់ទំនាក់ទំនងរយៈចម្ងាយឆ្ងាយកាន់តែប្រសើរ៖ ភាពទន់ខ្សោយដ៏ធំមួយនៃប្រព័ន្ធ Bluetooth បើធៀបជាមួយនឹងបច្ចេកវិទ្យាជាច្រើនដូចជា Wi-Fi Direct គឺមានបញ្ហាពាក់ព័ន្ធទៅនឹងចម្ងាយទាប។ កាលពីមុន ប្រសិនបើអ្នកមានស្មាតហ្វូនមួយនៅក្នុងបន្ទប់មួយ វាពិតជាពិបាកក្នុងការភ្ជាប់ទៅកាន់ឧបករណ៍នៅក្នុងបន្ទប់មួយទៀត។ កម្រិតខ្ពស់បំផុតនៃរយៈចម្ងាយនៃការភ្ជាប់តាមប្រព័ន្ធ Bluetooth 4.0 គឺត្រឹមតែ 50 ម៉ែត្រត្រង់ ប៉ុន្តែមនុស្សភាគច្រើនប្រើប្រាស់ត្រឹមតែចំងាយ 10 ម៉ែត្រប៉ុណ្ណោះក្នុងការប្រើប្រាស់ប្រចាំថ្ងៃ។ វាមានន័យថា លោកអ្នកមិនអាចយកស្មាតហ្វូនចេញឆ្ងាយពេកពីកាស Bluetooth នោះទេនៅពេលកំពុងចាក់ស្តាប់ចម្រៀងនោះ។ ប្រព័ន្ធ Bluetooth 5.0 អាចភ្ជាប់បានចម្ងាយដល់ទៅ 200 ម៉ែត្រ និងចម្ងាយ 40 ម៉ែត្រនៅក្នុងការប្រើប្រាស់ធម្មតាប្រចាំថ្ងៃ។
- ល្បឿននៃការបញ្ជូនទិន្នន័យកាន់តែប្រសើរជាងមុន៖ ប្រព័ន្ធ Bluetooth 5.0 ផ្តល់ជូននូវការបញ្ជូនទិន្នន័យក្នុងល្បឿនលឿនជាងមុនដល់ទៅ 8 ដងបើធៀបជាមួយនឹងប្រព័ន្ធ Bluetooth 4.0 ។ ឥឡូវនេះ លោកអ្នកភ្ជាប់ស្មាតហ្វូនរបស់អ្នកទៅកាន់ឧបករណ៍ប្រព័ន្ធ Bluetooth បានដល់ទៅពីរក្នុងពេលជាមួយគ្នា។
- ការផ្សាយកាន់តែប្រសើរ៖ ការផ្សាយតាមរយៈប្រព័ន្ធ Bluetooth ជាទូទៅប្រើប្រាស់ក្រុមអ្នកអភិវឌ្ឍកម្មវិធីដើម្បីបង្កើត App ដែលមានលក្ខណៈកាន់តែងាយស្រួល។ ប្រព័ន្ធ Bluetooth 5.0 អាចផ្សាយបន្តផ្ទាល់នៅក្នុងល្បឿនលឿនជាង Bluetooth 4.0 ដល់ទៅ 8 ដងដែលជាការពង្រឹងសមត្ថភាពមួយដ៏អស្ចារ្យ៕
