Ming-Chi Kuo គឺជាអ្នកវិភាគដ៏ល្បីល្បាញរបស់ក្រុមហ៊ុន KGI ដែលតែងតែទម្លាយនូវព័ត៌មានគួរឱ្យទុកចិត្ត និងជឿជាក់ជាច្រើនកន្លងមកហើយ។ ពេលនេះ យើងនឹងបានដឹងអំពីព័ត៌មានក្តៅគគុកមួយដែលគាត់និយាយអំពីហ្វាប់ប្លេត Galaxy Note 8 ។ អ្នកវិភាគនេះទម្លាយថា ហ្វាប់ប្លេតស៊េរីថ្មីចុងក្រោយរបស់ក្រុមហ៊ុនបច្ចេកវិទ្យាយក្ស Samsung នេះនឹងមានប្រព័ន្ធកាមេរ៉ាភ្លោះ (កាមេរ៉ាមួយប្រភេទ Wide-angle និងកាមេរ៉ាមួយទៀតប្រភេទ Telephoto 3X) ហើយវាប្រហែលជាបង្ហាញខ្លួននៅចុងឆ្នាំ 2017 នេះ។
កាមេរ៉ា Wide-angle ភ្ជាប់ជាមួយនឹងសែនស័រទំហំ 12MP ជាមួយនឹងមុខងារ Dual Pixel Autofocus ចំនែកកាមេរ៉ា Telephoto ភ្ជាប់ជាមួយសែនស័រទំហំ 13MP ។ កាមេរ៉ាភ្លោះទាំងពីរនេះភ្ជាប់ជាមួយនឹងមុខងារ Optical Image Stabilization (OIS) ។ លោក Kuo រំពឹងថា កាមេរ៉ាថ្មីនេះពិតជាអាចយកឈ្នះកាមេរ៉ារបស់ទូរស័ព្ទ iPhone 7 Plus ទាំងគុណភាព និងអាចប្រកួតប្រជែងជាមួយនឹងទូរស័ព្ទ iPhone ជំនាន់ថ្មីបានថែមទៀត។
ហ្វាប់ប្លេត Galaxy Note 8 ត្រូវគេរំពឹងថា នឹងមានអេក្រង់ទំហំ 6.4 អ៊ីងកញ្ចក់ប្រភេទ Super AMOLED កម្រិតភាពច្បាស់ QHD+ បន្ទះឈីបប្រភេទ Snapdragon 835 ឬ Exynos 8895 ។ សម្រាប់ប្រព័ន្ធស្កែនក្រយ៉ៅដៃវិញប្រហែលជាស្ថិតនៅផ្នែកខាងក្រោយ ឬផ្លាស់ប្តូរទៅដាក់នៅក្រោមអេក្រង់កញ្ចក់ផ្នែកខាងមុខវិញ។ មុនពេលដែលហ្វាប់ប្លេត Galaxy Note 8 ប្រកាសបង្ហាញខ្លួនជាផ្លូវការនោះ ក្រុមហ៊ុន Samsung ត្រូវបានគេព្យាករណ៍ថានឹងទទួលបានទិន្នផលច្រើនលើសលប់នៅក្នុងឆ្នាំនេះ។ ក្រុមហ៊ុន KGI ទស្សន៍ទាយថាស្មាតហ្វូន Galaxy S8 និង Galaxy S8+ ប្រមាណជា 50 ទៅ 55 លានគ្រឿងដែលនឹងត្រូវដឹកជញ្ជូននៅឆ្នាំនេះ (កើនឡើងពី 40 ទៅ 45 លានគ្រឿង)៕