ក្រុមហ៊ុន Apple ប្រហែលជាចង់ធ្វើរឿងដ៏គួរឱ្យភ្ញាក់ផ្អើលបំផុតសម្រាប់ខួបអនុស្សាវរីយ៍លើកទី 10 របស់ទូរស័ព្ទ iPhone របស់ខ្លួននៅក្នុងរដូវស្លឹកឈើជ្រុះខាងមុខនេះ ដោយក្រុមហ៊ុន នឹងដាក់បង្ហាញទូរស័ព្ទស៊េរីថ្មី ដែលភ្ជាប់ជាមួយនឹងមុខងារថ្មីៗ ជាច្រើន និងការរចនារូបរាងកាន់តែស្រស់ស្អាតបំផុត។ ទូរស័ព្ទ iPhone 8 ស៊េរីថ្មីនេះ អាចនឹងមានតម្លៃប្រហែលជា 1000 ដុល្លារ នៅក្នុងសហរដ្ឋអាមេរិច និង 1000 ផោន នៅក្នុងចក្រភពអង់គ្លេស។ ប៉ុន្តែបើមើលទៅដៃគូប្រកួតប្រជែងធំបំផុតរបស់ខ្លួនក្រុមហ៊ុន Samsung ដាក់លក់ស្មាតហ្វូនស៊េរីថ្មី Galaxy S8 នៅក្នុងតម្លៃត្រឹមតែ 689 ផោននៅចក្រភពអង់គ្លេស ដូចនេះ ក្រុមហ៊ុន Apple ក៏ត្រូវពិចារណាទៅលើតម្លៃរបស់ទូរស័ព្ទស៊េរីថ្មីរបស់ខ្លួនផងដែរ។
ក្រុមអ្នកវិភាគជាច្រើននាក់ បានទស្សន៍ទាយថា ក្រុមហ៊ុន Apple នឹងដាក់លក់ទូរស័ព្ទស៊េរីថ្មីរបស់ខ្លួននៅក្នុងតម្លៃប្រហែលជា 1000 ដុល្លារសហរដ្ឋអាមេរិច។ ប៉ុន្តែរបាយការណ៍ពីអ្នកវិភាគម្នាក់មកពី Longbow ផ្ញើរទៅកាន់វិនិយោគិនជាច្រើននាក់នៅថ្ងៃអង្គារ៍នេះថា ក្រុមហ៊ុន Apple កំពុងតែពិចារណាទៅលើតម្លៃរបស់ iPhone 8។ អ្នកវិភាគលោក Shawn M. Harrison និងលោក Frank Carson សរសេរថា តម្លៃរបស់ទូរស័ព្ទ iPhone នឹងមានការកើនឡើងដោយសារតែការរចនារូបរាងដ៏ស្រស់ស្អាត ការប្រើប្រាស់អេក្រង់ OLED ដែលធ្វើឱ្យតម្លៃរបស់ទូរស័ព្ទ iPhone នេះមានការកើនឡើង 30% លើតម្លៃរបស់វា។
ពួកគេបន្ថែមទៀតថា ទូរស័ព្ទ iPhone អេក្រង់ OLED នឹងមានតម្លៃ 30 ដុល្លារអាមេរិច (23 ផោន) បន្ថែមពីលើតម្លៃដើម ដែលជាហេតុធ្វើឱ្យទូរស័ព្ទនេះ អាចកើនឡើងតម្លៃ។ បើតាមដឹង តម្លៃរបស់ទូរស័ព្ទ iPhone 8 នៅក្នុងខួបអនុស្សាវរីយ៍លើកទី 10 របស់ក្រុមហ៊ុន Apple អាចនឹងមានតម្លៃប្រហែលជា 1000 ដុល្លារអាមេរិច ប៉ុន្តែក្រុមហ៊ុនក៏កំពុងពិចារណាក្នុងការដាក់លក់នៅក្នុងតម្លៃប្រហែល 849 ដុល្លារអាមេរិច (663 ផោន) ។ អ្នកវិភាគផ្សេងទៀតទស្សន៍ទាយថា តម្លៃរបស់វាប្រហែលជា 850 ដុល្លារអាមេរិច (664 ផោន) ទៅ 900 ដុល្លារ (703 ផោន) ។
ពួកគេបានសរសេរថា ជាមួយនឹងការផ្លាស់ប្តូរសម្រាប់ខួបអនុស្សាវរីយ៍ទី 10 របស់ទូរស័ព្ទ iPhone តម្លៃរបស់វាអាចននឹងកើនឡើងលើសពី 30% ខណៈពេលដែលបច្ចុប្បន្ននេះទូរស័ព្ទ iPhone 7 Plus មានតម្លៃ 769 ដុល្លារអាមេរិច។ ពាក្យចចាមអារ៉ាម បាននិយាយដែរថា ទូរស័ព្ទ iPhone 8 នឹងមានតម្លៃខ្ទង់ 1000 ដុល្លារអាមេរិច វានឹងធ្វើអោយ iPhone ពិបាកនៅក្នុងប្រកួតប្រជែងជាមួយនឹងស្មាតហ្វូន Samsung នេះគឺដោយសារតែ Galaxy S8+ មានតម្លៃត្រឹមតែ 840 ដុល្លារអាមេរិចប៉ុណ្ណោះ ហើយតម្រូវការរបស់ស្មាតហ្វូនត្រកូល Galaxy S8 ពេលនេះ ក៏មានការកើនឡើងខ្ពស់ខ្លាំងដែរ បើប្រៀបធៀបនឹងឆ្នាំមុននេះ៕