យើងធ្លាប់រាយការណ៍ចំនួន 2 លើករួចមកហើយអំពីទូរស័ព្ទម៉ាកយីហោ Nokia ជាច្រើនស៊េរីដែលគ្រោងនឹងចេញលក់ជាផ្លូវការនៅក្នុងត្រីមាសទី 2 ឆ្នាំនេះ ប៉ុន្តែនេះប្រហែលជាព័ត៌មានថ្មីមួយទៀតដែលទាក់ទងជាមួយនឹងទូរស័ព្ទ Nokia 3310 (2017) ។ នៅក្នុងការប្រកាសបង្ហាញនៅក្នុងខែកុម្ភៈនៅក្នុងព្រឹត្តិការណ៍តាំងពិពរណ៍ Mobile World Congress 2017 តម្លៃរបស់ទូរស័ព្ទ Nokia 3310 គឺ 49 អ៊ឺរ៉ូ។ ទូរស័ព្ទ Nokia 3310 មានរូបរាងស្រស់ស្អាតដែលធ្វើឱ្យអ្នកគាំទ្រពិតជាចង់ទិញប្រើប្រាស់ទូរស័ព្ទនេះខ្លាំងមែនទែន។
ទោះបីជាយ៉ាងណាក៏ដោយ វាហាក់ដូចជាទីផ្សារនៅក្នុងទ្វីបអ៊ឺរ៉ុបជាច្រើនដាក់តម្លៃផ្សេងៗគ្នានៅលើទូរស័ព្ទ Nokia 3310 ដែលតម្លៃរបស់វាពិតជាខ្ពស់ជាងមុនបន្តិចបើធៀបជាមួយនឹងតម្លៃរបស់ក្រុមហ៊ុនបច្ចេកវិទ្យា HMD Global ប្រកាសកាលពីប៉ុន្មានខែមុននេះ។ ឧទាហរណ៍ នៅក្នុងប្រទេសអូទ្រីស ទូរស័ព្ទស៊េរីថ្មីនេះ នឹងដាក់លក់នៅថ្ងៃទី 28 ខែមេសានៅក្នុងតម្លៃ 59 អ៊ឺរ៉ូ ។ ក្រុមហ៊ុនលក់រាយមួយចំនួន ចង់ទាក់ទាញអតិថិជន កាន់តែច្រើនដោយទម្លាក់តម្លៃបន្តិច ដោយសារពួកគេដាក់លក់ទូរស័ព្ទ Nokia 3310 (2017) នៅក្នុងតម្លៃ 53 អ៊ឺរ៉ូ។
អ្វីដែលគួរឱ្យភ្ញាក់ផ្អើលនោះ ក្រុមហ៊ុនលក់រាយជាច្រើននៅស៊ុយអែតផ្តល់ជូននូវទូរស័ព្ទ Nokia 3310 (2017) ដំណើរការប្រព័ន្ធ 3G តែប៉ុណ្ណោះ ហើយវានឹងដាក់លក់នៅក្នុងខែឧសភានៅក្នុងតម្លៃត្រឹមតែ 93 អ៊ឺរ៉ូ។ នៅក្នុងប្រទេសអាឡឺម៉ង់ ទូរស័ព្ទ Nokia 3310 (2017) នឹងដាក់ឱ្យកម្មង់ទិញនៅក្នុងតម្លៃ 58 អ៊ឺរ៉ូ ។ ក្រុមហ៊ុនលក់រាយជាច្រើននៅក្នុងប្រទេសនេះនឹងដាក់លក់នៅថ្ងៃទី 28 ខែមេសា ប៉ុន្តែម៉ូដែលនេះដំណើរការប្រព័ន្ធ 2G គឺស្ថិតនៅក្នុងបញ្ជីតែមួយប៉ុណ្ណោះ។ អត្រានៃពន្ធនៅតាមប្រទេសនីមួយៗគឺមិនដូចគ្នានោះទេ ដូចនេះទូរស័ព្ទ Nokia 3310 (2017) អាចមានតម្លៃខ្ពស់ជាងតម្លៃធម្មតាដែលក្រុមហ៊ុន HDM Global ប្រកាសពីមុន៕