ក្រុមហ៊ុនផលិតកាមេរ៉ាសម្រាប់ថតរូប និងវីដេអូដ៏ល្បីល្បាញមួយរបស់ពិភពលោក Nikon ថ្មីៗ ទើបតែបានប្រកាសចេញកាមេរ៉ាប្រភេទ DSLR ជំនាន់ថ្មីរបស់ខ្លួនម៉ូដែល D7500។ កាមេរ៉ាជំនាន់ថ្មីនេះ ត្រូវបានធ្វើកំនែប្រែថ្មីចេញពីម៉ូដែល D7200 ដែលទទួលបានជោគជ័យខ្លាំងក្នុងទីផ្សារនាពេលកន្លងមក។ D7500DX គឺជាកាមេរ៉ាថតរូបប្រភេទ DSLR កម្រិតមធ្យមប៉ុន្តែវាបានខ្ចីគ្រឿងបំពាក់មួយចំនួនពីបងប្អូនកាមេរ៉ាស៊េរីខ្ពស់កម្រិតអាជីព D500 ដែលធ្វើឲ្យវាមានសមត្ថភាពប្រើការកាន់តែខ្លាំងជាងជំនាន់ D7200 សមស្របតាមតម្រូវការប្រើប្រាស់ទូទៅ។ កាមេរ៉ា Nikon D7500 ជំនាន់ថ្មីនេះ បំពាក់នូវកាមេរ៉ាទំហំ 20.9MP ប្រើប្រាស់សែនស័រចាប់រូប DX-format CMOS និងប្រតិបត្តិការលើអង្គគណនា EXPEED 5 image processor ដែលប្រើនៅលើម៉ូដែល D500។
យោងតាមក្រុមហ៊ុន Nikon បានបញ្ជាក់ថា ល្បឿនផ្តិតរូបភាពរបស់ D7500 គឺបាន 8 frame ក្នុងមួយវិនាទីដោយប្រើមុខងារ burst mode ជាមួយ Full AF/AE ដែលអាចចាប់រូបភាពបាន 50 សន្លឹកជាប្រភេទហ្វាល់ RAW និង 100 សន្លឹកជាប្រភេទ JPEG។ បន្ថែមពីនេះ D7500 នៅមានបំពាក់នូវប្រព័ន្ធ 51 point AF System ដែលមាន 15 ជាប្រភេទ cross-type និងប្រព័ន្ធកម្រិតពណ៌ 180K RGB metering system ដែលបានប្រើនៅលើ D500។ តួរខ្លួនរបស់ D7500 ត្រូវបានផលិតឡើងពីជ័រស្វិត និងស្បែកគ្រឿមដែលមានគុណល្អមានភាពភ្លឺរលោងជាងតួររបស់ D7200, 5% និងភ្លឺរលោងជាងតួររបស់ D500 ប្រមាណ 16%។ D7500 មានសមត្ថភាពអាចថតវីដេអូបានដល់កម្រិត 4K UHD ដែលមានគុណភាពបង្ហាញចេញបានច្បាស់ដូចវីដេអូ 4K UHD time-lapse ក្នុងខ្សែភាពយន្ត។ វីដេអូដែលថតហើយគឺអាចរក្សាទុកជាប្រភេទហ្វាល់ MOV ឬក៏ MP4 ជាមួយកម្រិតតម្រឹម1.5x។ ដោយឡែកសម្រាប់ការថតវីដេអូកម្រិត Full-HD ឬ 1080px វិញគឺវាអាចប្រើប្រាស់នូវបច្ចេកវិទ្យា 3-axis electronic stabilization ថែមទៀតផង។
ជាមួយគ្នានេះកាមេរ៉ា D7500 នៅមានកញ្ចក់អេក្រង់ប្រភេទថាច់ស្រ្គីនទំហំ 3.2” អាចបត់ផ្អិបចូលក្នុងតួរបានជាមួយកម្រិតភាពម៉ដ្ឋ 922K dot, មានប្រព័ន្ធប្លូធូស, Wi-Fi, រន្ធដោតកាស, រន្ធម៉ាក្រូហ្វូន និងគុណសម្បត្តិល្អៗជាច្រើនទៀតសម្រាប់ប្រើប្រាស់បញ្ជាថតរូប និងវីដេអូ។ Nikon D7500 ត្រូវបានក្រុមហ៊ុនដាក់លក់ក្នុងតម្លៃប្រមាណ $1,249.95 ដែលតម្លៃនេះសម្រាប់តែតម្លៃកាមេរ៉ាប៉ុណ្ណោះ ហើយប្រសិនបើមានភ្ជាប់មកជាមួយកែវលែនស៊េរី AF-S DX NIKKOR 18-140mm f/3.5-5.6G ED VR lens មួយទៀតតម្លៃរបស់វាកើនដល់ $1,749.95។ Nikon នឹងបញ្ចេញដាក់លក់កាមេរ៉ាជំនាន់ថ្មីនេះ ដំបូងក្នុងទីផ្សារសហរដ្ឋអាមេរិកនារដូវក្តៅនេះ៕