តើលោកអ្នកពិតជាចង់មើលអំពីគំនិតនៃការរចនារូបរាងទៅលើហ្វាប់ប្លេតស៊េរីថ្មីរបស់ក្រុមហ៊ុនបច្ចេកវិទ្យាយក្ស Samsung មែនដែរឬទេ? នេះ គឺជារូបភាពរបស់ហ្វាប់ប្លេត Galaxy Note 8 ដែលត្រូវបានរចនាម៉ូដោយលោក Benjamin Geskin ។ វាមានរូបរាងប្រហាក់ប្រហែលទៅនឹងស្មាតហ្វូន Galaxy S8 ដែរ ហើយជាពិសេសការរចនាម៉ូដដ៏ស្រស់ស្អាតនេះប្រហែលជាអ្វីដែលក្រុមហ៊ុន Samsung ចង់បានសម្រាប់ហ្វាប់ប្លេតស៊េរីថ្មីរបស់ខ្លួនជាក់ជាមិនខាន។
Benjamin Geskin សន្មត់ថា ហ្វាប់ប្លេត Galaxy Note 8 នឹងមានអេក្រង់ទំហំ 6.4 អ៊ីងកម្រិត 4K Infinity Display (18:9 ratio) ភ្ជាប់ជាមួយនឹងប្រព័ន្ធស្កែនក្រយ៉ៅដៃនៅលើអេក្រង់ កាមេរ៉ាភ្លោះនៅខាងក្រោយ និងប្រព័ន្ធបំពងសំឡេងស្តេរីអ៉ូ (stereo speakers)។ សម្រាប់លក្ខណៈសម្បត្តិថ្មីៗផ្សេងពីនេះទៀតនៅលើហ្វាប់ប្លេត Galaxy Note 8 ក្រុមហ៊ុនបច្ចេកវិទ្យាយក្ស Samsung ប្រហែលជាប្រកាសនៅក្នុងឆមាសទី 2 ក្នុងឆ្នាំនេះ។ យើងនៅមិនទាន់ច្បាស់នោះទេអំពីការប្រើប្រាស់ប៊ិក S-Pen នៅក្នុងហ្វាប់ប្លេត Galaxy Note 8 នេះ ប៉ុន្តែក្រុមអ្នករចនាម៉ូដ និងក្រុមវិស្វករពិតជាឆ្លាតវៃណាស់អំពីរឿងនេះ។
រឿងមួយទៀតនោះ គឺថា ស្មាតហ្វូន Galaxy S8 Plus មានអេក្រង់ទំហំ 6.2 អ៊ីង ហើយតម្លៃរបស់វាក៏មិនសូវជាថ្លៃប៉ុន្មាននោះដែរ។ គួរបញ្ជាក់ផងដែរថា ក្រុមហ៊ុនបច្ចេកវិទ្យា Samsung ពិតជាខិតខំធ្វើយ៉ាងណាឱ្យហ្វាប់ប្លេត Galaxy Note 8 មានលក្ខណៈខុសគ្នាពីស្មាតហ្វូនស៊េរីថ្មីរបស់ខ្លួនជាក់ជាមិនខាន៕